Ashwaraopeta: ఊట్లపల్లిలో సర్పంచ్, ఉప సర్పంచ్ మధ్య వివాదం

Ashwaraopeta: అశ్వారావుపేట మండలం ఊట్లపల్లిలో నిధుల దుర్వినియోగ ఆరోపణలు, చెక్ పవర్ రద్దు కోరుతూ సర్పంచ్, ఉప సర్పంచ్ ప్రజావాణిలో పరస్పర ఫిర్యాదులు చేశారు.

SANKURATHRI SATISH, ASWARAOPETA
Published on: 16 Nov 2026 11:16 PM IST
Ashwaraopeta
X

Ashwaraopeta: ఊట్లపల్లిలో సర్పంచ్, ఉప సర్పంచ్ మధ్య వివాదం

అశ్వారావుపేట: భద్రాద్రి కొత్తగూడెం జిల్లా అశ్వారావుపేట మండలం ఊట్లపల్లి గ్రామపంచాయతీలో సర్పంచ్, ఉప సర్పంచ్ మధ్య వివాదం రోజురోజుకూ ముదురుతోంది. గ్రామపంచాయతీ నిధుల వినియోగం, అభివృద్ధి పనుల నిర్వహణ అంశాలు ఇరువురి మధ్య విభేదాలకు కారణమవుతున్నాయి. ఈ క్రమంలో ఒకరిపై ఒకరు ఆరోపణలు చేసుకుంటూ మండల పరిషత్ కార్యాలయంలో నిర్వహిస్తున్న ప్రజావాణి కార్యక్రమాన్ని ఆశ్రయించడం స్థానికంగా చర్చనీయాంశంగా మారింది.

గత వారం సోమవారం నిర్వహించిన ప్రజావాణి కార్యక్రమంలో ఊట్లపల్లి గ్రామపంచాయతీ ఉప సర్పంచ్ సాధు జోసెఫ్ కులకర్ణి సర్పంచ్ సత్యం లక్ష్మీకుమారిపై తీవ్ర ఆరోపణలు చేస్తూ మండల పరిషత్ అధికారులకు ఫిర్యాదు చేశారు. గ్రామపంచాయతీ నిధులను దుర్వినియోగం చేశారని, తప్పుడు లెక్కలు చూపించి నిధులు డ్రా చేశారని తన ఫిర్యాదులో పేర్కొన్నారు. గ్రామపంచాయతీకి సంబంధించిన నిధుల ఖర్చుల వివరాలను పరిశీలించి, నిధుల వినియోగంపై సమగ్ర విచారణ చేపట్టాలని అధికారులను కోరారు.

ఈ ఫిర్యాదుపై చర్చ కొనసాగుతుండగానే తాజాగా ఈరోజు సోమవారం నిర్వహించిన ప్రజావాణి కార్యక్రమంలో సర్పంచ్ సత్యం లక్ష్మీకుమారి ఉప సర్పంచ్ సాధు జోసెఫ్ కులకర్ణి పై ఫిర్యాదు చేయడం మరో మలుపుగా మారింది. గ్రామపంచాయతీ అభివృద్ధి పనులకు ఉప సర్పంచ్ అడ్డంకులు సృష్టిస్తున్నారని ఆమె ఆరోపించారు. గ్రామ అభివృద్ధి సజావుగా సాగేందుకు ఆటంకాలు కలగకుండా అధికారులు తగిన చర్యలు తీసుకోవాలని కోరారు.

తనపై ఉప సర్పంచ్ చేసిన నిధుల దుర్వినియోగం ఆరోపణలపై మండల స్థాయి అధికారులు తక్షణమే సమగ్ర విచారణ జరిపించాలని సర్పంచ్ లక్ష్మీకుమారి డిమాండ్ చేశారు. గ్రామపంచాయతీకి వచ్చిన నిధులు ఎంత? ఏయే పనులకు ఎంత ఖర్చు చేశారు? నిధుల వినియోగంలో అక్రమాలు జరిగాయా? అనే అంశాలపై పంచాయతీ రికార్డులు, బిల్లులు, ఖర్చుల వివరాలను క్షుణ్ణంగా పరిశీలించి వాస్తవాలను గ్రామ ప్రజలకు తెలియజేయాలని తన ఫిర్యాదులో పేర్కొన్నారు.

అంతేకాకుండా ఊట్లపల్లి ఉప సర్పంచ్ సాధు జోసెఫ్ కులకర్ణి కి ఉన్న చెక్ పవర్‌ను రద్దు చేయాలని కూడా మండల అధికారులకు వినతిపత్రం అందజేశారు. గ్రామపంచాయతీ అభివృద్ధి కార్యక్రమాలకు ఆటంకాలు కలగకుండా, పాలనాపరమైన సమస్యలు పరిష్కారమయ్యేలా అధికారులు తగిన నిర్ణయం తీసుకోవాలని కోరారు.

ఒకే గ్రామపంచాయతీ.. రెండు ఫిర్యాదులు!

ఒకవైపు గ్రామపంచాయతీ నిధుల దుర్వినియోగం జరిగిందని ఉప సర్పంచ్ ఆరోపిస్తుండగా, మరోవైపు గ్రామాభివృద్ధికి ఉప సర్పంచ్ అడ్డుపడుతున్నారని సర్పంచ్ ఫిర్యాదు చేయడం ఊట్లపల్లి గ్రామంలో చర్చనీయాంశంగా మారింది. గ్రామ ప్రజలకు అందాల్సిన అభివృద్ధి, మౌలిక సదుపాయాల పనులపై ఈ వివాదం ప్రభావం చూపుతుందా అనే ఆందోళన వ్యక్తమవుతోంది.

అధికారుల విచారణతోనే అసలు నిజాలు వెలుగులోకి!

ఇరువురు ప్రజాప్రతినిధులు చేసిన ఆరోపణల నేపథ్యంలో మండల పరిషత్, గ్రామపంచాయతీ సంబంధిత అధికారులు నిష్పక్షపాతంగా విచారణ చేపట్టాల్సిన అవసరం ఉంది. గ్రామపంచాయతీ నిధుల డ్రాయింగ్ వివరాలు, చెక్కులు, ఖర్చుల బిల్లులు, తీర్మానాలు, అభివృద్ధి పనుల పురోగతిని పరిశీలించి వాస్తవాలను వెల్లడించాలని గ్రామస్థులు కోరుతున్నారు.

ప్రజల కోసం పనిచేయాల్సిన గ్రామపంచాయతీలో ప్రజాప్రతినిధుల మధ్య నెలకొన్న ఈ వివాదానికి అధికారులు ఎలాంటి పరిష్కారం చూపుతారు? నిధుల వినియోగంపై వచ్చిన ఆరోపణల్లో వాస్తవాలేమిటి? ఉప సర్పంచ్ చెక్ పవర్ రద్దుపై అధికారులు ఎలాంటి నిర్ణయం తీసుకుంటారు? అన్నది ఇప్పుడు ఆసక్తికరంగా మారింది.

SANKURATHRI SATISH, ASWARAOPETA

SANKURATHRI SATISH, ASWARAOPETA