Kothagudem: వర్షాభావ పరిస్థితుల్లో నీటి సంరక్షణకు ప్రాధాన్యత ఇవ్వాలి

కొత్తగూడెం: భద్రాద్రి కొత్తగూడెం జిల్లాలో ఈ ఏడాది ఆశించిన స్థాయిలో వర్షపాతం నమోదు కాకపోవడంతో అందుబాటులో ఉన్న నీటి వనరులను పొదుపుగా వినియోగించుకోవాలని జిల్లా వైద్య ఆరోగ్యశాఖ అధికారి డాక్టర్ తుకారామ్ రాథోడ్ సూచించారు. వర్షాభావ పరిస్థితులను దృష్టిలో ఉంచుకొని నీటి సంరక్షణతో పాటు తక్కువ నీటితో సాగు చేసే పంటలకు ప్రాధాన్యత ఇవ్వాలని పిలుపునిచ్చారు.

కొత్తగూడెంలోని శ్రీ రామచంద్ర ప్రభుత్వ డిగ్రీ కళాశాలలో గురువారం నిర్వహించిన కార్యక్రమంలో ఆయన పాల్గొని ఎల్‌నినో ప్రభావం, వాతావరణ మార్పులు, వర్షపాతం తగ్గుదల వల్ల వ్యవసాయ రంగం, ప్రజల జీవన విధానంపై పడే ప్రభావాలను వివరించారు.

ఈ సందర్భంగా ఆయన మాట్లాడుతూ.. వాతావరణ పరిస్థితులకు అనుగుణంగా రైతులు పంటల ఎంపిక చేసుకోవాలని సూచించారు. అధిక నీటి అవసరం ఉండే పంటలకు బదులుగా కొర్రలు, సామలు తదితర చిరుధాన్యాలు, ఇతర ఆరుతడి పంటలను సాగు చేయడం వల్ల నీటి వినియోగాన్ని తగ్గించుకోవచ్చని తెలిపారు. తద్వారా రైతులు వర్షాభావ పరిస్థితులను అధిగమించేందుకు అవకాశం ఉంటుందని పేర్కొన్నారు.

చిరుధాన్యాలు వ్యవసాయానికి మాత్రమే కాకుండా ప్రజల ఆరోగ్యానికి కూడా ఎంతో మేలు చేస్తాయని చెప్పారు. వీటిలో పోషక విలువలు అధికంగా ఉంటాయని, సమతుల్య ఆహారంలో భాగంగా తీసుకోవడం ద్వారా ఆరోగ్యాన్ని కాపాడుకోవచ్చని వివరించారు.

ప్రతి ఒక్కరూ తాగునీటిని వృథా చేయకుండా పొదుపుగా వినియోగించాలని, వర్షపు నీటిని ఒడిసిపట్టి భూగర్భ జలాల పెంపునకు కృషి చేయాలని కోరారు. నీటి సంరక్షణ, పర్యావరణ పరిరక్షణ, చిరుధాన్యాల సాగు, ఆరోగ్యకరమైన ఆహారపు అలవాట్లతో భవిష్యత్ తరాలకు సుస్థిరమైన జీవనాన్ని అందించవచ్చని డాక్టర్ తుకారామ్ రాథోడ్ పేర్కొన్నారు. ఈ కార్యక్రమంలో కళాశాల అధ్యాపకులు, విద్యార్థులు, ఇతర ప్రముఖులు పాల్గొన్నారు.