Kothagudem: కొత్తగూడెంలో ఘనంగా ఇండియన్ మెడికల్ అసోసియేషన్ వార్షిక సమావేశం!

Kothagudem: వైద్యం అంటే కేవలం వృత్తి కాదు... అది ఒక సేవ, ఒక తపన, ఒక బాధ్యత అని మరోసారి చాటిచెప్పింది కొత్తగూడెం వేదిక.ఇండియన్ మెడికల్ అసోసియేషన్ వార్షిక సమావేశం 2026 కొత్తగూడెంలో ఘనంగా జరిగింది. రాష్ట్ర నలుమూలల నుంచి వచ్చిన వైద్య రంగంలోని అన్ని విభాగాల ప్రముఖులు, అనుభవజ్ఞులైన వక్తలు తమ జ్ఞానాన్ని, అనుభవాలను పంచుకున్నారు.

ఈ సమావేశానికే ప్రత్యేక ఆకర్షణగా నిలిచింది ప్రతిష్టాత్మక డాక్టర్ భాగ్యరెడ్డి అవార్డు ప్రకటన.సమాజానికి అంకితభావంతో సేవ చేసే ఉత్తమ వైద్యుడిని గౌరవించేందుకు డాక్టర్ భాగ్యరెడ్డి కుమారులు డాక్టర్ సతీష్ చంద్రారెడ్డి మరియు డాక్టర్ హరీష్ చంద్రారెడ్డి ఈ అవార్డును స్థాపించారు.

ప్రతి సంవత్సరం ఆదర్శప్రాయమైన సామాజిక, కమ్యూనిటీ వైద్య సేవలు అందించిన వైద్యునికి ఈ అవార్డును అందజేస్తారు.దశాబ్దానికి పైగా యూకేలో సైకియాట్రీలో శిక్షణ పొంది, అక్కడే ప్రాక్టీస్ చేసిన డాక్టర్ భాగ్యరెడ్డి... తన మాతృభూమిపై ప్రేమతో, తెలంగాణ ప్రజలకు సేవ చేయాలనే సంకల్పంతో స్వదేశానికి తిరిగి వచ్చారు.

యువ వైద్యులు కేవలం వృత్తికే పరిమితం కాకుండా, సమాజ సేవకు కొంత సమయాన్ని కేటాయించాలని... జీవనశైలి రుగ్మతలపై ప్రజల్లో అవగాహన పెంచాలని ఆయన కలలు కన్నారు. అదే స్ఫూర్తితో ఈ అవార్డు పుట్టింది.ఈ అవార్డు యువ వైద్యులకు కేవలం గుర్తింపు మాత్రమే కాదు, వైద్య సేవ అంటే మానవత్వానికి చేసే సేవ అని గుర్తుచేసే ప్రేరణ అని వక్తలు కొనియాడారు.