Dummugudem: దుమ్ముగూడెం ఆనకట్ట పనులను పరిశీలించిన మంత్రి తుమ్మల

Dummugudem: రానున్న వేసవిలో తాగునీటి కొరత రాకుండా ప్రభుత్వం ముందస్తు ఏర్పాట్లు చేస్తోంది. ఎల్‌నినో ప్రభావం దృష్ట్యా అందుబాటులో ఉన్న గోదావరి జలాలను సమర్థవంతంగా వినియోగించుకోవాలని మంత్రి తుమ్మల నాగేశ్వరరావు అధికారులను ఆదేశించారు. భద్రాద్రి కొత్తగూడెం జిల్లా దుమ్ముగూడెం ఆనకట్టపై ఇసుక బస్తాలతో 1 టీఎంసీ నీటిని నిల్వ చేసే పనులను ఆయన స్వయంగా పరిశీలించారు.

భద్రాచలం సబ్ కలెక్టర్, ఇరిగేషన్ అధికారులతో కలిసి మంత్రి తుమ్మల పడవలో ప్రయాణిస్తూ ఆనకట్ట పనులను పరిశీలించారు. ఆనకట్టపై ఒక మీటర్ ఎత్తున దాదాపు లక్షన్నర ఇసుక బస్తాలు పేర్చి నీటిని నిల్వ చేయాలని లక్ష్యంగా పెట్టుకున్నట్లు తెలిపారు. రోజుకు 10 వేల నుంచి 15 వేల బస్తాలు వేసేలా పనులు వేగవంతం చేయాలని అధికారులను ఆదేశించారు.

ఈ ఏడాది వర్షపాతం తక్కువగా ఉన్నందున ప్రజలు నీటిని పొదుపుగా వాడుకోవాలని మంత్రి కోరారు. రైతులు కూడా రబీ సీజన్‌లో తక్కువ నీటితో పండే ఆరుతడి పంటలు, చిరుధాన్యాలు, కూరగాయల సాగుకే ప్రాధాన్యత ఇవ్వాలని సూచించారు. తాగునీటి సరఫరాకు ఎక్కడా ఇబ్బంది రాకుండా అన్ని శాఖల అధికారులు సమన్వయంతో పనిచేయాలని మంత్రి తుమ్మల స్పష్టం చేశారు.