Sathupalli: సత్తుపల్లిలో రూ.41.12 లక్షల సంక్షేమ చెక్కులు పంపిణీ చేసిన ఎమ్మెల్యే

సత్తుపల్లి: పేద కుటుంబాలకు ఆర్థిక భరోసా కల్పించడమే ప్రభుత్వ సంక్షేమ పథకాల ప్రధాన లక్ష్యమని సత్తుపల్లి శాసనసభ్యురాలు డాక్టర్ మట్టా రాగమయి దయానంద్ అన్నారు. గురువారం సత్తుపల్లి పట్టణంలోని ద్వారకాపురి కాలనీలో ఉన్న శాసనసభ్యురాలి కార్యాలయంలో వేంసూరు మండలానికి చెందిన లబ్ధిదారులకు కళ్యాణలక్ష్మి, షాదీ ముబారక్, ముఖ్యమంత్రి సహాయ నిధి చెక్కులను పంపిణీ చేశారు.

ఈ కార్యక్రమంలో భాగంగా 25 మంది లబ్ధిదారులకు రూ.25,02,900 విలువైన కళ్యాణలక్ష్మి, షాదీ ముబారక్ చెక్కులను, మరో 37 మంది లబ్ధిదారులకు రూ.16,09,200 విలువైన ముఖ్యమంత్రి సహాయ నిధి చెక్కులను అందజేశారు. మొత్తం 62 మంది లబ్ధిదారులకు రూ.41,12,100 విలువైన చెక్కులను పంపిణీ చేశారు.

ప్రజా సంక్షేమమే ప్రభుత్వ ధ్యేయం

ఈ సందర్భంగా ఎమ్మెల్యే డాక్టర్ మట్టా రాగమయి దయానంద్ మాట్లాడుతూ తెలంగాణ రాష్ట్ర ప్రభుత్వం పేదలు, మహిళలు, రైతులు, విద్యార్థులు, నిరుపేద కుటుంబాల సంక్షేమానికి పలు పథకాలను అమలు చేస్తోందని తెలిపారు. అర్హులైన ప్రతి ఒక్కరికీ ప్రభుత్వ పథకాల ప్రయోజనాలు అందేలా కృషి చేస్తున్నట్లు పేర్కొన్నారు.

పేదలకు సన్నబియ్యం పంపిణీ, గృహాలకు 200 యూనిట్ల వరకు ఉచిత విద్యుత్, మహిళలకు ఆర్టీసీ బస్సుల్లో ఉచిత ప్రయాణం, రైతులకు వ్యవసాయానికి ఉచిత విద్యుత్, రైతు భరోసా, పంటల బీమా, వితంతువులు, దివ్యాంగులకు ఆసరా పింఛన్లు వంటి సంక్షేమ కార్యక్రమాలను వివరించారు. మహిళా సంఘాలకు రుణ సదుపాయాలు కల్పించడం ద్వారా వారి ఆర్థిక స్వావలంబనకు ప్రభుత్వం తోడ్పడుతోందని అన్నారు.

ప్రజల అవసరాలను గుర్తించి సంక్షేమ, అభివృద్ధి కార్యక్రమాలను అమలు చేస్తున్న ముఖ్యమంత్రి రేవంత్ రెడ్డి, ఉప ముఖ్యమంత్రి మల్లు భట్టి విక్రమార్క, మంత్రులు తుమ్మల నాగేశ్వరరావు, పొంగులేటి శ్రీనివాసరెడ్డిలకు ప్రజల తరఫున ఎమ్మెల్యే కృతజ్ఞతలు తెలిపారు.

ప్రభుత్వ పథకాలను అర్హులైన ప్రతి ఒక్కరూ సద్వినియోగం చేసుకోవాలని ఆమె సూచించారు. ఈ కార్యక్రమంలో స్థానిక ప్రజాప్రతినిధులు, నాయకులు, కార్యకర్తలు, లబ్ధిదారులు పాల్గొన్నారు.