Bandi Atmakur: పశువుల కాపరిపై దాడి, 4 తులాల బంగారం దోపిడీ!

బండి ఆత్మకూరు: నంద్యాల జిల్లా బండి ఆత్మకూరు మండలం ఈర్నపాడు గ్రామంలో దారుణ ఘటన చోటుచేసుకుంది. పొలంలో పశువులను మేపుకుంటున్న మహిళపై గుర్తుతెలియని వ్యక్తి దాడి చేసి, బంగారు ఆభరణాలను దోచుకెళ్లాడు.

ఈర్నపాడు గ్రామానికి చెందిన ఎర్రం పార్వతి (48), తన భర్త గోపాల్‌రెడ్డితో కలిసి నివసిస్తోంది. ఈర్నపాడు, పార్నపల్లి గ్రామాల మధ్య ఉన్న పొలాల్లో కేఈసీ కాలువ సమీపంలో ఆమె పశువులను మేపుతుండేది.

ఈ క్రమంలో బుధవారం ఉదయం పశువులను తోలుకొని పొలానికి వెళ్లిన పార్వతి.. మధ్యాహ్నం సుమారు మూడు గంటల సమయంలో పొలంగట్టుపై కూర్చుని ఉండగా, వెనుక నుంచి వచ్చిన గుర్తుతెలియని వ్యక్తి ఆమెపై ఒక్కసారిగా దాడి చేశాడు. ముఖంపై, కళ్లపై పిడిగుద్దులు గుద్ది తీవ్రంగా గాయపరిచాడు.

అనంతరం ఆమె మెడలో ఉన్న సుమారు నాలుగు తులాల బంగారు తాళిబొట్టు గొలుసును లాక్కొని పారిపోయాడు. చెవులకు ఉన్న కమ్మలను సైతం బలవంతంగా లాగడంతో పార్వతి చెవి సగభాగం తెగిపోయింది...

పట్టపగలే మహిళపై దాడి చేసి బంగారు ఆభరణాలను దోచుకెళ్లిన ఘటన స్థానికంగా కలకలం రేపింది. ఘటనపై పోలీసులు కేసు నమోదు చేసి దర్యాప్తు చేస్తున్నట్లు సమాచారం. నిందితుడిని గుర్తించేందుకు పోలీసులు చర్యలు చేపట్టారు.

పట్టపగలే మహిళపై దాడి.. బంగారు ఆభరణాల కోసం క్రూరత్వం.. ఈర్నపాడు ఘటనతో స్థానికుల్లో ఆందోళన నెలకొంది...