Pattikonda: పత్తికొండలో ఎమ్మెల్యే కేఈ శ్యామ్ కుమార్

పత్తికొండ: పట్టణంలోని తేరుబజార్ పెద్ద ఆంజనేయస్వామి దేవాలయం సమీపంలో సోమవారం ఉదయం నిర్వహించిన పింఛన్ల పంపిణీ కార్యక్రమంలో పత్తికొండ శాసనసభ్యులు కె.ఈ. శ్యామ్ కుమార్ పాల్గొన్నారు. ఈ సందర్భంగా వృద్ధులు, వితంతువులు, దివ్యాంగులకు ప్రభుత్వం అందిస్తున్న సామాజిక భద్రత పింఛన్లను పంపిణీ చేసి వారి యోగక్షేమాలను అడిగి తెలుసుకున్నారు.

ఈ సందర్భంగా ఎమ్మెల్యే లబ్ధిదారులతో ప్రత్యక్షంగా మాట్లాడి వారి సమస్యలను తెలుసుకుని, ప్రభుత్వం అమలు చేస్తున్న సంక్షేమ పథకాలు ప్రతి అర్హుడికి చేరేలా కృషి చేస్తున్నామని తెలిపారు. ముఖ్యమంత్రి చంద్రబాబు నాయుడు నాయకత్వంలోని కూటమి ప్రభుత్వం ప్రజా సంక్షేమానికి అత్యంత ప్రాధాన్యత ఇస్తూ, సమాజంలోని అన్ని వర్గాల అభ్యున్నతికి కట్టుబడి పనిచేస్తోందని పేర్కొన్నారు.

ప్రజల అవసరాలు, సమస్యలను తెలుసుకుంటూ వాటి పరిష్కారానికి ప్రభుత్వం ఎల్లప్పుడూ ప్రజల పక్షాన నిలుస్తుందని ఎమ్మెల్యే అన్నారు. పింఛన్లు అందుకున్న వృద్ధులు, మహిళలు ప్రభుత్వం అందిస్తున్న సేవల పట్ల సంతృప్తి వ్యక్తం చేస్తూ ఎమ్మెల్యే కృతజ్ఞతలు తెలిపారు.

ఈ కార్యక్రమంలో స్థానిక ప్రజాప్రతినిధులు, పార్టీ నాయకులు, అధికారులు, కార్యకర్తలు, మరియు ప్రజలు పాల్గొన్నారు. ప్రజల సమస్యల పరిష్కారమే తమ ప్రధాన ధ్యేయమని ఎమ్మెల్యే కె.ఈ. శ్యామ్ కుమార్ స్పష్టం చేశారు.