Heart Attack: 24 ఏళ్లకే హార్ట్ ఎటాక్.. యువతలో పెరుగుతున్న గుండె జబ్బులపై హెచ్చరిక

Heart Attack: సాధారణంగా గుండెపోటు అంటే వయసు పెరిగిన వారికే వస్తుందని చాలామంది అనుకుంటారు. కానీ మారుతున్న జీవనశైలి, ధూమపానం, ఆహారపు అలవాట్లు, ఒత్తిడి, కుటుంబ చరిత్ర వంటి కారణాలతో యువకుల్లోనూ గుండె జబ్బుల కేసులు కనిపిస్తున్నాయి. తాజాగా 24 ఏళ్ల యూపీఎస్సీ అభ్యర్థికి గుండెపోటు రావడం దీనికి మరో ఉదాహరణగా నిలిచింది.

ఢిల్లీ-ఎన్‌సీఆర్‌లోని ఫోర్టిస్ గురుగ్రామ్ ఆసుపత్రికి తీసుకెళ్లిన ఈ యువకుడికి పరీక్షలు నిర్వహించగా డబుల్-వెసెల్ కరోనరీ ఆర్టరీ డిసీజ్ ఉన్నట్లు వైద్యులు గుర్తించారు. అనంతరం అతనికి యాంజియోప్లాస్టీ చేశారు.

మొదట ఎసిడిటీ అనుకున్నారు..

సివిల్ సర్వీసెస్ పరీక్షకు సిద్ధమవుతున్న ఈ 24 ఏళ్ల యువకుడు స్నేహితులతో కలిసి ఉంటున్నాడు. ఇటీవల రాత్రి సమయంలో ఛాతిలో నొప్పి రావడంతో.. తాను, తన స్నేహితులు దాన్ని ఎసిడిటీ లేదా గ్యాస్ సమస్యగా భావించారు.

అయితే మరుసటి రోజు ఉదయం కూడా ఛాతి నొప్పి తగ్గలేదు. దీంతో అతడిని ఆసుపత్రికి తరలించారు. అక్కడ నిర్వహించిన ECGలో గుండెపోటు వచ్చినట్లు గుర్తించారు.

రెండు ప్రధాన రక్తనాళాల్లో సమస్య

ఆ తర్వాత చేసిన యాంజియోగ్రామ్‌లో రెండు ప్రధాన కరోనరీ రక్తనాళాల్లో బ్లాకేజీలు ఉన్నట్లు తేలింది. వైద్య పరిభాషలో దీనిని డబుల్-వెసెల్ కరోనరీ ఆర్టరీ డిసీజ్‌గా పేర్కొన్నారు. పరిస్థితిని దృష్టిలో ఉంచుకుని యాంజియోప్లాస్టీ నిర్వహించినట్లు ఫోర్టిస్ గురుగ్రామ్ కార్డియాలజీ సీనియర్ డైరెక్టర్ డాక్టర్ సంజత్ చివానే తెలిపారు.

ధూమపానం, అస్తవ్యస్త జీవనశైలి..

ఈ యువకుడి గుండె జబ్బుల ప్రమాదానికి ఒక్క కారణమే కాకుండా పలు అంశాలు కలిసి ప్రభావం చూపినట్లు వైద్యులు తెలిపారు.

అతను సుమారు ఐదు నుంచి ఆరు సంవత్సరాలుగా ధూమపానం చేస్తున్నట్లు వెల్లడైంది. గతంలో మాదకద్రవ్యాల వినియోగం కూడా ఉన్నట్లు వైద్యులు తెలిపారు. మరోవైపు UPSC ప్రిపరేషన్ కారణంగా నిద్ర, ఆహారపు అలవాట్లు కూడా క్రమబద్ధంగా లేవని చెప్పారు.

కుటుంబ చరిత్ర కూడా కీలకమే..

ఈ కేసులో కుటుంబంలో గుండె జబ్బుల చరిత్ర కూడా ముఖ్యమైన అంశంగా మారింది. ఆ యువకుడి తండ్రి 35 నుంచి 40 ఏళ్ల మధ్య వయసులోనే మరణించినట్లు డాక్టర్ చివానే తెలిపారు.

అంతేకాకుండా పరీక్షల్లో అతని LDL కొలెస్ట్రాల్ స్థాయి 190 mg/dL కంటే ఎక్కువగా ఉన్నట్లు గుర్తించారు. అలాగే Lipoprotein(a), అంటే Lp(a) స్థాయి సుమారు 150గా ఉన్నట్లు వైద్యులు తెలిపారు. ఇవి కూడా గుండె జబ్బుల ప్రమాదాన్ని అంచనా వేయడంలో పరిగణనలోకి తీసుకునే అంశాలు.

యువత ఏం గుర్తుంచుకోవాలి?

చిన్న వయసులో ఉన్నామని గుండె జబ్బుల ప్రమాదం ఉండదని భావించకూడదని ఈ ఘటన సూచిస్తోంది. ముఖ్యంగా కుటుంబంలో చిన్న వయసులో గుండె జబ్బుల చరిత్ర ఉన్నవారు, ధూమపానం చేసేవారు, కొలెస్ట్రాల్ సమస్యలు ఉన్నవారు తమ ఆరోగ్యంపై మరింత శ్రద్ధ పెట్టాలి.

ఛాతిలో నొప్పి, బిగుతుగా అనిపించడం, శ్వాస తీసుకోవడంలో ఇబ్బంది, అసాధారణ చెమటలు లేదా నొప్పి చేతి/దవడ/వెనుక భాగానికి వ్యాపించడం వంటి లక్షణాలు కనిపిస్తే వాటిని కేవలం గ్యాస్ లేదా ఎసిడిటీగా భావించి నిర్లక్ష్యం చేయకుండా వెంటనే వైద్య సహాయం తీసుకోవడం ముఖ్యం.