మీ గుండె ఆరోగ్యంగానే ఉందా.? 40 ఏళ్లు దాటిన వారు క‌చ్చితంగా చేసుకోవాల్సిన ప‌రీక్ష‌లు ఇవే!

Heart Tests After 40: ప్రస్తుత జీవనశైలి, ఆహారపు అలవాట్లు, మానసిక ఒత్తిడి, అధిక బరువు కారణంగా చిన్న వయసులోనే చాలామంది గుండె సంబంధిత సమస్యల బారిన పడుతున్నారు. అందుకే 40 ఏళ్లు దాటిన తర్వాత గుండె ఆరోగ్యంపై ప్రత్యేక శ్రద్ధ పెట్టాలని వైద్య నిపుణులు సూచిస్తున్నారు. ఈ వయసు నుంచి క్రమం తప్పకుండా చేయించుకోవాల్సిన మూడు ముఖ్యమైన పరీక్షల గురించి తెలుసుకుందాం.

బ్లడ్ ప్రెజర్ పరీక్ష.. నిర్లక్ష్యం చేయకూడదు

గుండె జబ్బులకు ప్రధాన కారణాల్లో అధిక రక్తపోటు ఒకటి. రక్తపోటు పెరిగినా చాలామందిలో ఎలాంటి లక్షణాలు కనిపించవు. అందుకే దీన్ని సైలెంట్ కిల్లర్ అని కూడా పిలుస్తారు. బీపీ ఎక్కువగా ఉంటే గుండెపై ఒత్తిడి పెరుగుతుంది. దీర్ఘకాలంలో గుండె జబ్బులు, గుండెపోటు వచ్చే ప్రమాదం ఉంటుంది.

40 ఏళ్లు దాటిన వారు కనీసం ఏడాదికి ఒకసారైనా బీపీ పరీక్ష చేయించుకోవాలి. ఇప్పటికే అధిక రక్తపోటు ఉన్నవారు, అధిక బరువు లేదా ఇతర ఆరోగ్య సమస్యలు ఉన్నవారు వైద్యుల సూచన మేరకు తరచూ పరీక్షలు చేయించుకోవాలి. అవసరమైతే ప్రతి మూడు నెలలకు ఒకసారి లేదా అంతకంటే ముందుగానే బీపీని పర్యవేక్షించాలి. సమయానికి రక్తపోటును గుర్తిస్తే ఆహారపు అలవాట్లు, వ్యాయామం, అవసరమైన చికిత్స ద్వారా నియంత్రించుకోవచ్చు.

లిపిడ్ ప్రొఫైల్.. కొలెస్ట్రాల్ స్థాయిలను తెలుసుకోండి

గుండె ఆరోగ్యాన్ని తెలుసుకోవడానికి లిపిడ్ ప్రొఫైల్ పరీక్ష కూడా చాలా ముఖ్యం. ఈ పరీక్ష ద్వారా రక్తంలో కొలెస్ట్రాల్, ఇతర కొవ్వు పదార్థాల స్థాయిలను తెలుసుకోవచ్చు. ఇందులో ముఖ్యంగా టోటల్ కొలెస్ట్రాల్, ఎల్‌డీఎల్ (చెడు కొలెస్ట్రాల్), హెచ్‌డీఎల్ (మంచి కొలెస్ట్రాల్), ట్రైగ్లిజరైడ్స్ స్థాయిలను పరీక్షిస్తారు.

రక్తంలో చెడు కొలెస్ట్రాల్ ఎక్కువగా ఉంటే అది క్రమంగా గుండెకు రక్తాన్ని సరఫరా చేసే రక్తనాళాల్లో పేరుకుపోతుంది. దీంతో రక్తప్రసరణకు అడ్డంకులు ఏర్పడి గుండెపోటు వచ్చే ప్రమాదం పెరుగుతుంది. అందుకే కొలెస్ట్రాల్ స్థాయిలను ఎప్పటికప్పుడు తెలుసుకోవాలి. వ్యక్తి వయసు, ఆరోగ్య పరిస్థితి, కుటుంబ చరిత్ర, ఇతర రిస్క్ ఫ్యాక్టర్లను బట్టి కొలెస్ట్రాల్ ఎంత ఉండాలనేది వైద్యులు నిర్ణయిస్తారు. అవసరాన్ని బట్టి పరీక్షలు చేయించుకోవాలి.

బ్లడ్ షుగర్ పరీక్ష.. మధుమేహాన్ని గుర్తించండి

గుండె జబ్బులకు మధుమేహం కూడా ఒక ముఖ్యమైన రిస్క్ ఫ్యాక్టర్. రక్తంలో చక్కెర స్థాయిలు ఎక్కువగా ఉండటం వల్ల రక్తనాళాలు దెబ్బతినే అవకాశం ఉంటుంది. దీనివల్ల గుండె సంబంధిత సమస్యలు వచ్చే ప్రమాదం పెరుగుతుంది.

బ్లడ్ షుగర్ పరీక్ష ద్వారా మధుమేహం ఉందా? లేదా ప్రీ డయాబెటిస్ దశలో ఉన్నారా? అనేది తెలుసుకోవచ్చు. ప్రీ డయాబెటిస్ అంటే రక్తంలో చక్కెర స్థాయిలు సాధారణం కంటే ఎక్కువగా ఉన్నప్పటికీ, పూర్తిస్థాయి డయాబెటిస్ స్థాయికి చేరుకోని పరిస్థితి.

ఈ దశలోనే గుర్తిస్తే ఆహారపు అలవాట్లలో మార్పులు, రోజువారీ వ్యాయామం, బరువు నియంత్రణ ద్వారా మధుమేహం వచ్చే ప్రమాదాన్ని తగ్గించుకోవచ్చు. వైద్యుల సూచన మేరకు ఫాస్టింగ్ బ్లడ్ షుగర్, హెచ్‌బీఏ1సీ వంటి పరీక్షలు చేయించుకోవచ్చు.

కుటుంబ చరిత్ర, జీవనశైలిని కూడా గమనించాలి

కుటుంబంలో తల్లిదండ్రులు, దగ్గరి బంధువులకు గుండె సంబంధిత వ్యాధులు ఉంటే మరింత జాగ్రత్తగా ఉండాలి. ముఖ్యంగా చిన్న వయసులోనే కుటుంబ సభ్యులకు గుండెపోటు వచ్చిన చరిత్ర ఉంటే వైద్యులను సంప్రదించి తగిన పరీక్షలు చేయించుకోవాలి. వీటితో పాటు పొగతాగడం, పొగాకు వినియోగం, మద్యం సేవించడం, సరైన నిద్ర లేకపోవడం, శారీరక శ్రమ తగ్గడం, అసమతుల్య ఆహారం తీసుకోవడం వంటి అలవాట్లు గుండె ఆరోగ్యాన్ని దెబ్బతీస్తాయి.

క్రమం తప్పకుండా ఆరోగ్య పరీక్షలు చేయించుకోవడం వల్ల గుండె జబ్బులు పూర్తిగా రాకుండా ఉంటాయని చెప్పలేం. అయితే వ్యాధులకు కారణమయ్యే ప్రమాద కారకాలను ముందుగానే గుర్తించి తగిన జాగ్రత్తలు తీసుకోవచ్చు. కాబట్టి 40 ఏళ్లు దాటిన వారు బీపీ, లిపిడ్ ప్రొఫైల్, బ్లడ్ షుగర్ పరీక్షలను నిర్లక్ష్యం చేయకుండా వైద్యుల సలహాతో చేయించుకోవాలి. ఆరోగ్యకరమైన ఆహారం తీసుకోవడం, రోజూ వ్యాయామం చేయడం, బరువును అదుపులో ఉంచుకోవడం ద్వారా గుండెను ఆరోగ్యంగా కాపాడుకోవచ్చు.

గమనిక: ఇది సాధారణ ఆరోగ్య సమాచారం మాత్రమే. పరీక్షల సంఖ్య, వాటిని చేయించుకోవాల్సిన సమయం వ్యక్తిగత ఆరోగ్య పరిస్థితిని బట్టి మారవచ్చు. వైద్యుల సలహా తీసుకోవడం మంచిది.