Skin Care Tips: పెద్దలు బేబీ లోషన్లు వాడుతున్నారా.? ఈ షాకింగ్ నిజాలు తెలుసుకోండి.!

Skin Care Tips : మృదువైన చర్మం కోసం పాకులాడే క్రమంలో చాలా మంది పెద్దలు చిన్నారుల కోసం తయారు చేసిన సోపులు, లోషన్లు, పౌడర్లను వాడుతుంటారు. "పిల్లల చర్మానికే సురక్షితం అయినప్పుడు, మాకు ఎందుకు కాదు?" అనే లాజిక్ వినడానికి బాగున్నా, చర్మవ్యాధి నిపుణులు (Dermatologists) మాత్రం దీనిపై భిన్నమైన అభిప్రాయాన్ని వ్యక్తం చేస్తున్నారు. బేబీ ప్రొడక్ట్స్ వాడటం వల్ల చర్మం మెరుస్తుందన్నది కేవలం ఒక భ్రమ మాత్రమేనని, వాస్తవానికి ఇది మీ చర్మానికి కొన్ని రకాల ఇబ్బందులను కూడా తెచ్చిపెట్టవచ్చని హెచ్చరిస్తున్నారు.

పిల్లల చర్మం వేరు.. పెద్దల చర్మం వేరు

చిన్న పిల్లల చర్మం పెద్దల కంటే సుమారు 30 శాతం పల్చగా ఉంటుంది. వారి చర్మంలో నూనెను ఉత్పత్తి చేసే గ్రంథులు అంతగా క్రియాశీలకంగా ఉండవు. అందుకే బేబీ ప్రొడక్ట్స్‌ను చర్మానికి కేవలం ఒక రక్షణ కవచంలా ఉండేలా, నీటిని కోల్పోకుండా ఉండేలా (Occlusive) రూపొందిస్తారు. కానీ పెద్దల చర్మం మందంగా ఉండటమే కాకుండా నిత్యం కాలుష్యం, ధూళి, సూర్యరశ్మి , మేకప్ వంటి ఒత్తిళ్లను ఎదుర్కొంటుంది. పెద్దల చర్మానికి ఎక్స్‌ఫోలియేషన్ (మృతకణాల తొలగింపు), యాంటీ ఆక్సిడెంట్స్ , సూర్యరశ్మి నుంచి రక్షణ (SPF) వంటివి అవసరం. ఇవేవీ బేబీ ఉత్పత్తుల ద్వారా లభించవు.

మొటిమలు , చర్మ రంధ్రాల సమస్య

బేబీ లోషన్లు , ఆయిల్స్‌లో చర్మానికి తేమను అందించడానికి మినరల్ ఆయిల్స్ లేదా వాసెలిన్ వంటి పదార్థాలను ఎక్కువగా ఉపయోగిస్తారు. ఇవి పిల్లల పొడి చర్మానికి మేలు చేస్తాయి కానీ, పెద్దల చర్మంపై ఇవి ఒక మందపాటి పొరలా పేరుకుపోతాయి. దీనివల్ల చర్మ రంధ్రాలు మూసుకుపోయి , మొటిమలు, బ్లాక్ హెడ్స్ , వైట్ హెడ్స్ రావడానికి దారితీస్తాయి. ముఖ్యంగా జిడ్డు చర్మం ఉన్న పెద్దలు ఈ ఉత్పత్తులను వాడితే వారి సమస్య మరింత తీవ్రమయ్యే ప్రమాదం ఉంది. బేబీ ప్రొడక్ట్స్ వాడటం వల్ల చర్మం సహజంగా ఊపిరి పీల్చుకోవడాన్ని ఇవి అడ్డుకుంటాయి.

PH స్థాయి , సంరక్షణలో వైవిధ్యం

పిల్లల చర్మం pH స్థాయి పెద్దల కంటే కొంచెం భిన్నంగా ఉంటుంది. పిల్లల ఉత్పత్తులు వారి చర్మానికి తగినట్లుగా న్యూట్రల్ pH తో రూపొందించబడతాయి. కానీ పెద్దల చర్మం సహజ రక్షణ కవచం (Acid Mantle) సరిగ్గా పనిచేయాలంటే కొంత ఆమ్లత్వం (Acidic pH) అవసరం. బేబీ ఉత్పత్తులను క్రమం తప్పకుండా వాడటం వల్ల పెద్దల చర్మం సహజ pH దెబ్బతిని, బ్యాక్టీరియా , ఇన్ఫెక్షన్ల బారిన పడే అవకాశం ఉంది. అలాగే పెద్దల చర్మానికి అవసరమైన యాంటీ-ఏజింగ్ గుణాలు అంటే కొల్లాజెన్ పెంచే విటమిన్ C, రెటినోల్ వంటివి వీటిలో అస్సలు ఉండవు.

ఎవరు వాడవచ్చు? నిపుణులు ఏమంటున్నారు?

అయితే, బేబీ ప్రొడక్ట్స్ అందరికీ హానికరం అని చెప్పలేం. ఎక్జిమా లేదా అత్యంత సున్నితమైన చర్మం ఉండి, మార్కెట్లో దొరికే సాధారణ సోపులు పడనప్పుడు డాక్టర్ల సూచన మేరకు వీటిని వాడవచ్చు. వీటిలో ఘాటైన రసాయనాలు, సల్ఫేట్లు ఉండవు కాబట్టి అలర్జీల ముప్పు తక్కువగా ఉంటుంది. కానీ, మీరు అందం , యవ్వనం కోసం ఈ ఉత్పత్తులపై ఆధారపడితే మాత్రం నిరాశ తప్పదు. మీ వయసు, మీ చర్మం ఎదుర్కొంటున్న సమస్యలకు తగినట్లుగా రూపొందించిన క్లెన్సర్లు , మాయిశ్చరైజర్లను ఎంచుకోవడమే శ్రేయస్కరం. పిల్లల వస్తువులు పిల్లలకు ఎంత ముద్దుగా ఉంటాయో.. పెద్దల చర్మానికి అవి అంతగా సరిపోవని గుర్తించాలి.