Thyroid: మహిళల్లో సంతానలేమికి 'థైరాయిడ్' కారణమా? వైద్యులు ఏమంటున్నారు?

Thyroid: మహిళల్లో వచ్చే అత్యంత సాధారణ హార్మోన్ సమస్యల్లో థైరాయిడ్ ఒకటి. ముఖ్యంగా సంతానోత్పత్తి వయసులో ఉన్న మహిళలపై ఇది తీవ్ర ప్రభావం చూపుతుంది. మెడ భాగంలో ఉండే థైరాయిడ్ గ్రంథి విడుదల చేసే హార్మోన్లు శరీర జీవక్రియలను, శక్తి స్థాయిలను నియంత్రించడమే కాకుండా.. పునరుత్పత్తి వ్యవస్థను కూడా శాసిస్తాయి. ఈ హార్మోన్ల సమతుల్యత దెబ్బతిన్నప్పుడు అండాల విడుదల, పీరియడ్స్ సైకిల్ మారిపోయి గర్భం దాల్చడం కష్టంగా మారుతుంది.

హైపోథైరాయిడిజం ఎలా దెబ్బతీస్తుంది?

శరీరంలో థైరాయిడ్ హార్మోన్లు తగినంతగా ఉత్పత్తి కానప్పుడు హైపోథైరాయిడిజం వస్తుంది. దీనివల్ల నీరసం, బరువు పెరగడం, చలిని తట్టుకోలేకపోవడం వంటి లక్షణాలతో పాటు పీరియడ్స్ సరిగ్గా రావు. ఇది అండాల విడుదలను నిలిపివేయడం లేదా క్రమం తప్పేలా చేస్తుంది. అంతేకాకుండా, దీనివల్ల 'ప్రోలాక్టిన్' హార్మోన్ స్థాయిలు పెరిగి, సంతానోత్పత్తి సామర్థ్యం మరింత తగ్గుతుంది.

హైపర్ థైరాయిడిజం ప్రభావం ఏంటి?

ఇది అంతగా కనిపించకపోయినప్పటికీ, శరీరంలో థైరాయిడ్ హార్మోన్లు ఎక్కువైతే పీరియడ్స్ చాలా తక్కువ రోజులు కావడం లేదా పూర్తిగా రాకపోవడం జరుగుతుంది. దీనివల్ల కూడా అండం సరిగ్గా విడుదల కాదు. ఒకవేళ గర్భం దాల్చినా.. అబార్షన్ అయ్యే ప్రమాదం ఎక్కువగా ఉంటుంది. ఇది అండం నాణ్యతను, గర్భాశయంలో పిండం అంటుకునే సామర్థ్యాన్ని దెబ్బతీస్తుంది.

ఆటోఇమ్యూన్ థైరాయిడ్ సమస్యలు

కొందరిలో రోగనిరోధక వ్యవస్థ పొరపాటున థైరాయిడ్ గ్రంథిపై దాడి చేస్తుంది. ల్యాబ్ రిపోర్టుల్లో థైరాయిడ్ నార్మల్‌గా ఉన్నట్లు కనిపించినప్పటికీ, శరీరంలో థైరాయిడ్ యాంటీబాడీస్ ఉంటే గర్భం దాల్చడం కష్టమవ్వడం లేదా పదే పదే గర్భస్రావాలు కావడం జరుగుతుంది.

ఫెర్టిలిటీ చికిత్సలు (IUI, IVF) తీసుకునేవారిలో..

IVF లేదా IUI వంటి సంతాన సాఫల్య చికిత్సలు చేయించుకునే వారికి థైరాయిడ్ పరీక్షలు తప్పనిసరి. థైరాయిడ్ సమస్యలను నయం చేయకుండా చికిత్సలు అందిస్తే సక్సెస్ రేటు చాలా వరకు తగ్గిపోతుంది. అందుకే వైద్యులు ముందుగా TSH, Free T4 పరీక్షల ద్వారా వీటిని గుర్తిస్తారు.

పరిష్కారం ఉందా?

మంచి విషయమేమిటంటే.. థైరాయిడ్ సమస్యలను మందుల ద్వారా సులభంగా నియంత్రించవచ్చు. హైపోథైరాయిడిజం ఉన్నవారికి థైరాయిడ్ హార్మోన్ రీప్లేస్‌మెంట్ థెరపీ (టాబ్లెట్లు) ఇస్తారు. దీనివల్ల హార్మోన్లు సాధారణ స్థితికి వచ్చి, పీరియడ్స్ క్రమబద్ధీకరించబడతాయి. థైరాయిడ్ అదుపులోకి రాగానే చాలామంది మహిళల్లో ఫెర్టిలిటీ రేటు పెరిగి, సహజంగానే గర్భం దాల్చుతారు.

గర్భం దాల్చిన తర్వాత కూడా జాగ్రత్త అవసరం

గర్భం వచ్చిన మొదటి కొన్ని నెలలు పిండం యొక్క మెదడు, నాడీ వ్యవస్థ అభివృద్ధికి తల్లి థైరాయిడ్ హార్మోన్లే ఆధారం. ఒకవేళ ప్రెగ్నెన్సీ సమయంలో థైరాయిడ్‌ను నిర్లక్ష్యం చేస్తే.. అబార్షన్, నెలలు నిండకుండానే కాన్పు కావడం, పుట్టే పిల్లలు తక్కువ బరువు ఉండటం లేదా వారి మానసిక ఎదుగుదల దెబ్బతినడం వంటి ప్రమాదాలు ఉన్నాయి.

అందుకే, పెళ్లయిన తర్వాత గర్భం కోసం ప్రయత్నిస్తూ.. కొన్ని నెలలైనా ఫలితం లేకపోయినా, పీరియడ్స్ క్రమం తప్పినా, గతంలో అబార్షన్లు అయినా వెంటనే థైరాయిడ్ పరీక్షలు చేయించుకోవడం ఉత్తమం. సరైన సమయంలో గుర్తించి చికిత్స తీసుకుంటే ఆరోగ్యకరమైన ప్రెగ్నెన్సీ మీ సొంతమవుతుంది.