Cardiac Arrest: గుండెపోటు వస్తే ఆ ఐదు నిమిషాలే కీలకం.. ప్రాణాలు కాపాడేందుకు చేయాల్సిన పని ఇదే

Cardiac Arrest: దేశ రాజధాని ఢిల్లీలోని మయూర్ విహార్ ప్రాంతంలో తొమ్మిదేళ్ల చిన్నారి కార్డియాక్ అరెస్ట్ కారణంగా ప్రాణాలు కోల్పోవడం అందరినీ కలచివేసింది. సకాలంలో సరైన వైద్య సహాయం లేదా సీపీఆర్ అందితే ఆ పసిబిడ్డ ప్రాణాలు దక్కేవని వైద్య నిపుణులు అభిప్రాయపడుతున్నారు. సాధారణంగా గుండెపోటు లేదా కార్డియాక్ అరెస్ట్ వంటి అత్యవసర పరిస్థితులు ఎదురైనప్పుడు ఆంబులెన్స్ వచ్చే వరకు ఏం చేయాలో తెలియక చాలా మంది అయోమయంలో పడుతుంటారు. ఆ కీలకమైన మొదటి ఐదు నిమిషాలలో తీసుకునే సరైన నిర్ణయాలే ఒక మనిషి ప్రాణాలను కాపాడటంలో కీలక పాత్ర పోషిస్తాయి.

గుండెపోటు లక్షణాలు గుర్తించడం ఎలా?

కార్డియాలజిస్ట్ డాక్టర్లు తెలిపిన వివరాల ప్రకారం.. గుండెపోటు వచ్చే ముందు శరీరం కొన్ని సంకేతాలను ఇస్తుంది. ఛాతిలో తీవ్రమైన నొప్పి, ఒత్తిడి లేదా బరువుగా అనిపించడం, ఎడమ చేతికి అలాగే భుజాలు, వీపు లేదా దవడ వరకు నొప్పి పాకడం, శ్వాస తీసుకోవడంలో ఇబ్బంది కలగడం, చల్లటి చెమటలు పట్టడం వంటి లక్షణాలు కనిపిస్తే వెంటనే అప్రమత్తం కావాలి. ఇలాంటి సమయంలో ఎలాంటి ఆలస్యం చేయకుండా వెంటనే అత్యవసర సేవలైన 112 లేదా 108 నంబర్లకు ఫోన్ చేసి ఆంబులెన్స్‌ను రప్పించాలి.

ఆంబులెన్స్ వచ్చే వరకు పాటించాల్సిన జాగ్రత్తలు

వైద్య సహాయం అందేలోపు రోగిని నడవనివ్వకుండా లేదా సొంతంగా వాహనం నడిపి ఆసుపత్రికి వెళ్లకుండా సౌకర్యవంతమైన భంగిమలో కూర్చోబెట్టాలి లేదా సగం పడుకోబెట్టాలి. రోగి ధరించిన గట్టి దుస్తులను వదులు చేసి చుట్టూ గాలి ఆడేలా చూడాలి. రోగి స్పృహలో ఉండి అతనికి ఎస్పిరిన్ మందుల వల్ల ఎలాంటి అలెర్జీ లేకపోతే, వైద్యుల సూచన మేరకు 150 నుంచి 300 మిగ్రా ఎస్పిరిన్ మాత్రను నమలడానికి ఇవ్వవచ్చు. అయితే వైద్య సలహా లేకుండా ఎలాంటి ఇతర మందులు రోగికి బలవంతంగా మింగించకూడదు.

సీపీఆర్ ప్రాముఖ్యత మరియు అత్యవసర చర్యలు

రోగి స్పృహ కోల్పోయి సాధారణంగా శ్వాస తీసుకోకపోతే వెంటనే సీపీఆర్ ప్రారంభించడం అత్యంత ముఖ్యం. ఛాతి మధ్య భాగంలో రెండు చేతులతో నిమిషానికి 100 నుంచి 120 సార్లు వేగంగా ఒత్తిడి ఇవ్వాలి. ఒకవేళ ఏఈడీ యంత్రం అందుబాటులో ఉంటే దాని సూచనలను పాటించాలి. నొప్పి తగ్గిపోతుందని వేచి చూస్తూ కాలయాపన చేయడం ప్రాణాంతకం కావచ్చు. రోగికి నీళ్లు, ఆహారం ఇవ్వడం లేదా అనవసరమైన దేశీ చిట్కాలు చేస్తూ సమయం వృథా చేయకుండా నేరుగా అత్యవసర చికిత్సకు ప్రాధాన్యత ఇవ్వాలి.

తొలి ఐదు నిమిషాలే మనిషి ప్రాణాలను కాపాడే ఆధారం

గుండెపోటు లేదా కార్డియాక్ అరెస్ట్ బారిన పడిన వారికి ప్రారంభ 5 నిమిషాలు పునర్జన్మను ఇచ్చే సమయంగా భావించవచ్చు. ఆ సమయంలో కుటుంబ సభ్యులు లేదా పక్కన ఉన్న వారు భయపడకుండా ధైర్యంగా వ్యవహరించి సరైన ప్రథమ చికిత్స అందిస్తే గుండెకు జరిగే నష్టాన్ని గణనీయంగా తగ్గించవచ్చు. ప్రాణాలను కాపాడే ఈ ప్రాథమిక మెలకువలపై ప్రతి ఒక్కరూ అవగాహన కలిగి ఉండటం నేటి కాలంలో ఎంతో అవసరమని వైద్య నిపుణులు గట్టిగా సూచిస్తున్నారు.