డయాబెటిస్ ఉన్నవారు సీతాఫలం తినవచ్చా? ఎంత తినాలి?

సీతాఫలం తినడం చాలామందికి ఇష్టం. ముఖ్యంగా చలికాలంలో లభించే ఈ పండులో పలు పోషకాలు ఉంటాయి. అయితే డయాబెటిస్ ఉన్నవారు సీతాఫలం తినవచ్చా? ఎంత మోతాదులో తీసుకోవాలి? అనే సందేహాలు చాలామందికి ఉంటాయి.

సీతాఫలంలో సహజ చక్కెరతో పాటు ఫైబర్ కూడా ఉంటుంది. ఫైబర్ కారణంగా పండులోని చక్కెర శరీరంలోకి ఒక్కసారిగా కాకుండా నెమ్మదిగా విడుదలయ్యే అవకాశం ఉంటుంది. అందువల్ల డయాబెటిస్ ఉన్నవారు పూర్తిగా సీతాఫలానికి దూరంగా ఉండాల్సిన అవసరం లేదని నిపుణులు చెబుతున్నారు. అయితే మోతాదును మాత్రం తప్పనిసరిగా నియంత్రించాలి.

వరంగల్‌కు చెందిన జనరల్ ఫిజీషియన్ డాక్టర్ సలీం తెలిపిన వివరాల ప్రకారం.. డయాబెటిస్ అదుపులో ఉన్నవారు సీతాఫలాన్ని పరిమిత మోతాదులో తీసుకోవచ్చు. రోజుకు ఒక చిన్న సీతాఫలం వరకు తీసుకోవచ్చని సూచించారు. అయితే ప్రతి ఒక్కరి రక్తంలో చక్కెర స్థాయిలు, ఆరోగ్య పరిస్థితి భిన్నంగా ఉంటాయి కాబట్టి వైద్యుల సలహా తీసుకోవడం మంచిది.

డయాబెటిస్ అదుపులో లేకపోతే జాగ్రత్త

రక్తంలో చక్కెర స్థాయిలు నియంత్రణలో లేని వారు సీతాఫలాన్ని తీసుకోకపోవడం మంచిదని నిపుణులు సూచిస్తున్నారు. ఈ సమయంలో సీతాఫలం తినడం వల్ల రక్తంలో చక్కెర స్థాయిలు పెరిగే అవకాశం ఉంటుంది. కాబట్టి డయాబెటిస్ నియంత్రణలో లేనివారు వైద్యుల సూచన లేకుండా ఈ పండును తీసుకోకపోవడం ఉత్తమం.

అధిక బరువు ఉన్నవారు కూడా జాగ్రత్త

ఊబకాయం లేదా అధిక బరువుతో బాధపడేవారు సీతాఫలాన్ని ఎక్కువగా తినకూడదు. ఇందులో కేలరీలు అధికంగా ఉండటంతో మోతాదుకు మించి తీసుకుంటే బరువు పెరిగే అవకాశం ఉంటుంది. ఆరోగ్యంగా ఉన్నవారు కూడా పరిమిత మోతాదులోనే తీసుకోవడం మంచిదని నిపుణులు సూచిస్తున్నారు.

ముఖ్యంగా గుర్తుంచుకోవాల్సింది ఏమిటంటే.. డయాబెటిస్ ఉన్నవారు సీతాఫలాన్ని తినాలా వద్దా అనేది వారి రక్తంలో చక్కెర నియంత్రణ, ఆహార విధానం, ఇతర ఆరోగ్య పరిస్థితులపై ఆధారపడి ఉంటుంది. కాబట్టి వ్యక్తిగత వైద్యుల సూచనకు ప్రాధాన్యం ఇవ్వాలి.