Mutton Curry Recipe: ఫస్ట్ టైమ్ మటన్ వండుతున్నారా? ఇలా చేస్తే ముక్కలు మెత్తగా.. టేస్ట్ అదుర్స్!

Mutton Curry Recipe: మటన్ కర్రీ అంటే నాన్‌వెజ్ ప్రియులకు ప్రత్యేకమైన ఇష్టం. అయితే ఇంట్లో మటన్ కర్రీ తయారు చేసేటప్పుడు ముక్కలు మెత్తగా ఉడకడం, గ్రేవీ చిక్కగా రావడం, పచ్చివాసన లేకుండా రుచి బాగా ఉండటం చాలామందికి కాస్త కష్టంగానే అనిపిస్తుంది. ముఖ్యంగా కొత్తగా వంట నేర్చుకునేవారు మటన్ కర్రీ చేయాలంటే మరింత జాగ్రత్తగా తయారు చేయాల్సి ఉంటుంది.

అయితే కొన్ని సింపుల్ చిట్కాలు పాటిస్తూ ఈ పద్ధతిలో మటన్ కర్రీ తయారు చేస్తే మంచి రుచితో పాటు మెత్తని మటన్ ముక్కలు, చిక్కటి గ్రేవీ వస్తాయి. ముందుగా మటన్‌ను నూనెలో బాగా వేయించి, ఆ తర్వాత ప్రత్యేకంగా తయారు చేసుకున్న మసాలా పేస్ట్‌తో ప్రెజర్ కుక్ చేయడం ఈ రెసిపీలో ముఖ్యమైన విధానం.

కావాల్సిన పదార్థాలు

కిలో లేత మటన్, పావు కప్పు కంటే కొద్దిగా ఎక్కువ నూనె, ఒక బిర్యానీ ఆకు, కొద్దిగా జాపత్రి, 10 పచ్చిమిర్చి, గుప్పెడు పుదీనా, మూడు మీడియం సైజు ఉల్లిపాయలు, రెండు టేబుల్ స్పూన్ల అల్లం వెల్లుల్లి పేస్ట్, అర టీ స్పూన్ పసుపు, తగినంత ఉప్పు, మూడు టీ స్పూన్ల కారం, ఒక పండిన టమాటా, అవసరమైనంత వేడి నీళ్లు తీసుకోవాలి.

మసాలా కోసం..

మూడు టేబుల్ స్పూన్ల ధనియాలు, ఒక టీ స్పూన్ జీలకర్ర, ఒక టీ స్పూన్ మిరియాలు, 10 లవంగాలు, కొద్దిగా దాల్చినచెక్క, నాలుగైదు అనాసపువ్వు రేకులు, 10 యాలకులు, గుప్పెడు ఎండుకొబ్బరి ముక్కలు, రెండు టేబుల్ స్పూన్ల గసగసాలు సిద్ధంగా ఉంచుకోవాలి.

ముందుగా మటన్‌ను ఇలా వేయించాలి

ముందుగా మటన్‌ను శుభ్రంగా కడిగి పక్కన పెట్టుకోవాలి. స్టవ్‌పై కుక్కర్ పెట్టి నూనె వేసి వేడి చేయాలి. నూనె వేడెక్కిన తర్వాత బిర్యానీ ఆకు, జాపత్రి, సన్నగా తరిగిన పచ్చిమిర్చి, పుదీనా వేసి వేయించాలి.

ఆ తర్వాత సన్నగా తరిగిన ఉల్లిపాయలు వేసి మంచి బంగారు రంగు వచ్చే వరకు వేయించుకోవాలి. ఇప్పుడు అల్లం వెల్లుల్లి పేస్ట్, పసుపు వేసి పచ్చివాసన పోయే వరకు వేయించాలి.

ఇందులో శుభ్రం చేసి పెట్టుకున్న మటన్ వేసి హై ఫ్లేమ్‌పై ఐదారు నిమిషాలు బాగా కలుపుతూ వేయించాలి. మటన్‌ను ముందుగా నూనెలో ఇలా వేయించడం వల్ల పచ్చివాసన తగ్గి కూరకు మంచి రుచి వస్తుంది. ఆ తర్వాత మంటను తగ్గించి కుక్కర్‌కు మూత పెట్టి మటన్ నుంచి నీళ్లు బయటకు వచ్చే వరకు ఉడికించాలి. మటన్ నుంచి వచ్చిన నీళ్లు చాలావరకు ఆవిరైన తర్వాత ముందుగా వేసిన బిర్యానీ ఆకు, జాపత్రిని తీసేయాలి.

మటన్ కర్రీకి ప్రత్యేక మసాలా పేస్ట్

ఇప్పుడు మరో పాన్ తీసుకుని ధనియాలు, జీలకర్ర, మిరియాలు, లవంగాలు, దాల్చినచెక్క, అనాసపువ్వు, యాలకులు వేసి తక్కువ మంటపై రెండు మూడు నిమిషాలు వేయించాలి. మసాలా దినుసుల నుంచి మంచి వాసన వచ్చే వరకు కలుపుతూ వేయించుకుంటే సరిపోతుంది.

వాటిని ఒక ప్లేట్‌లోకి తీసుకున్న తర్వాత అదే పాన్‌లో ఎండుకొబ్బరి ముక్కలు వేసి వేయించాలి. అనంతరం గసగసాలు వేసి మరో నిమిషం పాటు వేయించి స్టవ్ ఆఫ్ చేయాలి.

మసాలా దినుసులు పూర్తిగా చల్లారిన తర్వాత ముందుగా వేయించిన మసాలా దినుసులను మిక్సీ జార్‌లో వేసి మెత్తని పొడిలా చేసుకోవాలి. ఆ తర్వాత కొబ్బరి ముక్కలు, గసగసాలు వేసి మరోసారి గ్రైండ్ చేయాలి. అవసరమైనంత నీళ్లు పోసి మెత్తని పేస్ట్‌లా చేసుకోవాలి. గసగసాలు బాగా నలిగేలా పేస్ట్‌ను మెత్తగా గ్రైండ్ చేసుకోవడం ముఖ్యం.

మసాలా పేస్ట్‌ను మటన్‌లో కలపాలి

మటన్ నుంచి వచ్చిన నీళ్లు పూర్తిగా ఆవిరైన తర్వాత తగినంత ఉప్పు, కారం వేసుకోవాలి. మంచి రంగు కోసం కాశ్మీరీ కారం కూడా ఉపయోగించుకోవచ్చు. ఆ తర్వాత పండిన టమాటాను గ్రేటర్‌తో తురిమి గుజ్జును మాత్రమే వేసుకోవాలి.

టమాటా, మటన్‌ను ఒక నిమిషం పాటు బాగా కలిపి వేయించిన తర్వాత సిద్ధం చేసుకున్న మసాలా పేస్ట్‌ను మొత్తం వేసుకోవాలి. మసాలా మటన్ ముక్కలకు బాగా పట్టేలా రెండు మూడు నిమిషాలు కలుపుతూ వేయించాలి.

వేడి నీళ్లతో ప్రెజర్ కుక్ చేయాలి

ఇప్పుడు కూరకు సరిపడినంత వేడి నీళ్లు పోయాలి. మటన్ ముక్కలు మునిగేంత నీళ్లు లేదా మీకు కావాల్సిన గ్రేవీకి సరిపడేంత నీళ్లు వేసుకోవచ్చు. మసాలా గ్రైండ్ చేసిన మిక్సీ జార్‌ను కొద్దిగా నీళ్లతో కడిగి ఆ నీటిని కూడా కుక్కర్‌లో వేసుకోవచ్చు.

నీళ్లు పోసిన వెంటనే గ్రేవీ పలుచగా అనిపించినా ఆందోళన అవసరం లేదు. మటన్ ఉడికిన తర్వాత గ్రేవీ చిక్కబడుతుంది. కాబట్టి నీళ్లను మరీ ఎక్కువగా పోయకుండా అవసరాన్ని బట్టి సర్దుబాటు చేసుకోవాలి.

చివరగా ఉప్పు, కారం సరిగ్గా ఉన్నాయో చూసుకుని కుక్కర్‌కు మూత పెట్టాలి. మంటను తక్కువ చేసి మూడు విజిల్స్ వచ్చే వరకు ఉడికించుకోవాలి. లేత మటన్ అయితే సాధారణంగా మూడు విజిల్స్‌కు మెత్తగా ఉడికే అవకాశం ఉంటుంది. మటన్ ముదురుగా ఉంటే మరికొన్ని విజిల్స్ అవసరం కావచ్చు.

కుక్కర్‌లో ప్రెజర్ పూర్తిగా తగ్గిన తర్వాత మూత తీస్తే గుమగుమలాడే మటన్ కర్రీ సిద్ధం. మెత్తని మటన్ ముక్కలు, చిక్కటి గ్రేవీతో ఉండే ఈ కర్రీని వేడి అన్నం, చపాతీ లేదా రోటీతో కలిపి తింటే రుచి అదిరిపోతుంది.