గుండెపోటు ముప్పును ముందే ఆపొచ్చు.. హై డయాబెటిస్ రోగులకు 'ఇవొలుకుమాబ్' మందుతో ఊరట!

Evolocumab for Heart Health: డయాబెటిస్ మరియు అధిక కొలెస్ట్రాల్‌తో బాధపడుతున్న వారిలో గుండెపోటు (Heart Attack), స్ట్రోక్ (Stroke) రిస్క్‌ను తగ్గించే విషయంలో వైద్య శాస్త్రం మరో అడుగు ముందుకు వేసింది. కొలెస్ట్రాల్‌ను తగ్గించే 'ఇవొలుకుమాబ్' (Evolocumab) అనే ఔషధం, హై రిస్క్ డయాబెటిస్ ఉన్న రోగులలో గుండె సంబంధిత సమస్యలు రాకుండా అడ్డుకుంటుందని శాస్త్రవేత్తలు గుర్తించారు.

పరిశోధనలోని కీలక అంశాలు:

మాస్ జనరల్ బ్రిఘామ్ హార్ట్ అండ్ వాస్కులర్ ఇన్‌స్టిట్యూట్ నిపుణుడు డాక్టర్ ఎ. మార్స్టన్ నేతృత్వంలో జరిగిన ఈ అధ్యయనం ప్రకారం.. గత దశాబ్ద కాలంగా కొలెస్ట్రాల్ మందులను కేవలం గుండె జబ్బులు ఉన్నవారికి మాత్రమే సూచించేవారు. కానీ, కొత్త పరిశోధన ప్రకారం ప్రారంభ దశలోనే కొలెస్ట్రాల్‌ను నియంత్రించడం ద్వారా భవిష్యత్తులో వచ్చే స్ట్రోక్ మరియు హార్ట్ ఎటాక్ ముప్పును గణనీయంగా తగ్గించవచ్చు.

గుండెపోటుకు 'ప్లాక్' ఎలా కారణమవుతుంది?

రక్తంలో ఎల్‌డిఎల్ (LDL) కొలెస్ట్రాల్ ఎక్కువగా ఉన్నప్పుడు ధమనుల గోడలపై 'ప్లాక్' (పొర) పేరుకుపోతుంది. ఇది రక్త ప్రవాహానికి అడ్డంకిగా మారుతుంది. ఇవొలుకుమాబ్ మందు రక్తనాళాల్లో ఈ ప్లాక్ పేరుకుపోకుండా అడ్డుకుంటుంది, తద్వారా గుండెకు రక్త సరఫరా సాఫీగా సాగేలా చేస్తుంది.

ఏమిటీ 'ఇవొలుకుమాబ్' (Evolocumab)?

ఇది 'PCSK9 ఇన్హిబిటర్స్' అనే రకానికి చెందిన సరికొత్త ఔషధం. ఇది రక్తంలోని చెడు కొలెస్ట్రాల్‌ను (LDL) ఏకంగా 60 శాతం వరకు తగ్గిస్తుంది. 'VESALIUS-CV Trial'లో భాగంగా 3,655 మంది హై రిస్క్ డయాబెటిస్ రోగులపై ఈ అధ్యయనం నిర్వహించారు. 10 ఏళ్లకు పైగా డయాబెటిస్ ఉన్నవారు లేదా ప్రతిరోజూ ఇన్సులిన్ తీసుకునే వారిని ఈ కేటగిరీ కింద పరిగణించారు.

చెడు కొలెస్ట్రాల్ (LDL) ఎందుకు ప్రమాదకరం?

ప్రస్తుతం ప్రపంచవ్యాప్తంగా సంభవిస్తున్న మరణాలలో గుండె జబ్బులు ప్రధాన కారణంగా ఉన్నాయి. రక్తనాళాల్లో కొలెస్ట్రాల్ పేరుకుపోయి బ్లాకేజీలు ఏర్పడటమే దీనికి ప్రధాన కారణం. మన శరీరంలో ఎల్‌డిఎల్ స్థాయి ఎంత తక్కువగా ఉంటే, గుండె జబ్బుల ముప్పు అంత తక్కువగా ఉంటుంది.

గమనిక: ఈ సమాచారం కేవలం అవగాహన కోసం మాత్రమే. ఏదైనా మందును వాడే ముందు తప్పనిసరిగా మీ వ్యక్తిగత వైద్యుడిని సంప్రదించి సలహా తీసుకోవాలి.