Yawning Causes: అతిగా ఆవలింతలు వస్తున్నాయా? గుండెపోటు సంకేతం కావచ్చు!

Excessive Yawning Causes: ఆవలింతలు రావడం సాధారణ శారీరక ప్రక్రియ. అలసట, నిద్రలేమి, విసుగు వంటి కారణాలతో మనకు తరచుగా ఆవలింతలు వస్తుంటాయి. అయితే నిద్రకు సంబంధం లేకుండా అసాధారణంగా ఎక్కువసార్లు ఆవలింతలు వస్తుంటే మాత్రం దాన్ని నిర్లక్ష్యం చేయకూడదని నిపుణులు సూచిస్తున్నారు.

ఆవలింతలు ఒకరి నుంచి మరొకరికి కూడా వ్యాపించినట్లు అనిపిస్తుంటాయి. ఎవరైనా ఆవలించడం చూసినా, ఆవలింతల గురించి ఆలోచించినా మనకు కూడా ఆవలింత రావడం సాధారణమే. కొన్ని అధ్యయనాల ప్రకారం.. ఆవలింతలు శరీర ఉష్ణోగ్రత, ముఖ్యంగా మెదడు ఉష్ణోగ్రతను నియంత్రించడంలో కొంత పాత్ర పోషించవచ్చని భావిస్తున్నారు.

గుండె సమస్యలకు ఆవలింతలకు సంబంధం ఉందా?

అసాధారణంగా తరచుగా ఆవలింతలు రావడం కొన్ని సందర్భాల్లో ఇతర ఆరోగ్య సమస్యలతో సంబంధం కలిగి ఉండవచ్చని వైద్య నిపుణులు చెబుతున్నారు. ముఖ్యంగా ఆవలింతలతో పాటు ఛాతిలో నొప్పి, శ్వాస తీసుకోవడంలో ఇబ్బంది, తీవ్రమైన అలసట వంటి లక్షణాలు కనిపిస్తే వెంటనే వైద్య సహాయం తీసుకోవాలి.

గుండెపోటు సమయంలో గుండె కండరాలకు రక్తప్రసరణ తగ్గడం లేదా ఆగిపోవడం వల్ల తీవ్రమైన నష్టం కలగవచ్చు. అయితే ఆవలింత ఒక్కటే గుండెపోటుకు నిర్ధిష్టమైన లక్షణం కాదు. తరచుగా ఆవలింతలు రావడాన్ని మాత్రమే ఆధారంగా చేసుకుని గుండెపోటును అంచనా వేయడం సరికాదు.

గుండెపోటుకు ముందు కనిపించే లక్షణాలు

గుండెపోటుకు ముందు లేదా సమయంలో కనిపించే సాధారణ లక్షణాల్లో ఛాతిలో నొప్పి లేదా బిగుతుగా అనిపించడం, దవడ, మెడ, భుజాలు, వీపు వైపు నొప్పి, శ్వాస తీసుకోవడంలో ఇబ్బంది, వికారం, అసాధారణమైన అలసట వంటివి ఉంటాయి.

కొంతమందిలో లక్షణాలు తేలికగా కూడా ఉండవచ్చు. ముఖ్యంగా శారీరక శ్రమ చేస్తున్నప్పుడు తీవ్రమైన ఆయాసం లేదా అసౌకర్యం కనిపిస్తే దాన్ని నిర్లక్ష్యం చేయకూడదు.

ఆవలింతలతో పాటు ఇవి ఉంటే జాగ్రత్త

తరచుగా ఆవలింతలు రావడంతో పాటు శరీరంలో బలహీనత, తిమ్మిరి, మాట్లాడటంలో ఇబ్బంది, అకస్మాత్తుగా తల తిరగడం వంటి లక్షణాలు కనిపిస్తే వెంటనే వైద్యులను సంప్రదించాలి. ముఖ్యంగా అకస్మాత్తుగా ముఖం, చేయి లేదా కాలు ఒక వైపు బలహీనపడటం, మాట తడబడటం వంటి లక్షణాలు ఉంటే అది స్ట్రోక్‌కు సంకేతం కావచ్చు.

అందువల్ల తరచుగా ఆవలింతలు వస్తున్నాయని మాత్రమే భయపడాల్సిన అవసరం లేదు. అయితే అవి సాధారణం కంటే ఎక్కువగా ఉండి, ఇతర అసాధారణ లక్షణాలతో కలిసి కనిపిస్తే వైద్యుడిని సంప్రదించి కారణాన్ని తెలుసుకోవడం మంచిది. గుండె లేదా ఇతర ఆరోగ్య సమస్యలను ముందుగానే గుర్తించేందుకు అవసరమైన పరీక్షలు చేయించుకోవాలని నిపుణులు సూచిస్తున్నారు.