‘ఫుడ్ డివోర్స్’ అంటే ఏంటి? క‌పుల్స్‌ ఈ కొత్త ట్రెండ్‌ను ఎందుకు ఫాలో అవుతున్నారు?

Lifestyle: భార్యాభర్తలు లేదా కపుల్స్ మధ్య చిన్నచిన్న విషయాలపై అభిప్రాయ భేదాలు రావడం సహజమే. అయితే ప్రతి విషయంలోనూ ఒకేలా ఆలోచించాల్సిన అవసరం లేదు. తీసుకునే ఆహారం విష‌యంలో కూడా భిన్నాభిప్రాయాలు ఉంటాయి. ఈ విష‌యంలో తాజాగా క‌పుల్స్ ‘ఫుడ్ డివోర్స్’ అనే విధానాన్ని పాటిస్తున్నారు.

ఫుడ్ డివోర్స్ అంటే ఏంటి?

‘ఫుడ్ డివోర్స్’ అంటే భార్యాభర్తలు లేదా పార్ట్‌నర్స్ విడిపోవడం కాదు. ఒకే ఇంట్లో ఉంటూనే ఆహారం విషయంలో ప్రతిసారీ ఒకరి ఇష్టానికి మరొకరు రాజీ పడాల్సిన అవసరం లేదని నిర్ణయించుకోవడం. ఉదాహరణకు ఒకరికి రోటీ, కూర తినాలని ఉంటే.. మరొకరికి నూడుల్స్ తినాలని అనిపించవచ్చు. ఇలాంటి సమయంలో ఇద్దరూ ఒకే వంటకం తినాలని పట్టుబట్టాల్సిన అవసరం లేదు. ఎవరి ఇష్టానికి తగ్గ ఆహారాన్ని వారు తినవచ్చు. అలాగే ఒకరు త్వరగా డిన్నర్ చేయాలనుకుంటే, మరొకరికి రాత్రి ఆలస్యంగా తినే అలవాటు ఉంటే.. ఇద్దరూ తమకు అనుకూలమైన సమయంలో భోజనం చేయవచ్చు. డైట్, ఫుడ్ అలర్జీలు, శాకాహారం, మాంసాహారం వంటి కారణాలతో ఆహారపు అలవాట్లు వేర్వేరుగా ఉన్న కపుల్స్‌కు కూడా ఈ విధానం ఉపయోగపడొచ్చు.

‘ఈరోజు ఏం తినాలి?’ అనే సమస్యకు పరిష్కారం

చాలా ఇళ్లలో సాయంత్రం అయ్యేసరికి ఒక సాధారణ ప్రశ్న మొదలవుతుంది. ‘ఈరోజు ఏం తినాలి?’ అని ఒకరు అడిగితే.. ‘నువ్వే చెప్పు’ అని మరొకరు అంటారు. చివరికి ఏం వండాలి, బయట నుంచి తెప్పించుకోవాలా, ఎవరి ఇష్టానికి ప్రాధాన్యత ఇవ్వాలి అనే విషయంలో చర్చ మొదలవుతుంది. ఒకరికి పాస్తా కావాలనిపిస్తే.. మరొకరికి అన్నం తినాలని ఉండొచ్చు. ఒకరు ఇంట్లో వండాలని అనుకుంటే.. ఇంకొకరు బయట నుంచి ఫుడ్ తెప్పించుకోవాలని అనుకోవచ్చు. ఇలాంటి చర్చలు ప్రతిరోజూ గొడవగా మారితే ఆహారం కూడా ఒత్తిడికి కారణమవుతుంది.

ఆహారం విషయంలో నిర్ణయం తీసుకోవడం మాత్రమే కాదు.. సరుకులు కొనడం, వంట చేయడం, ఎవరి ఇష్టానికి తగ్గట్టు ఉండాలి అనే విషయాలు కూడా రోజువారీ బాధ్యతలుగా మారతాయి. ఇలాంటి ఒత్తిడిని తగ్గించుకోవడానికి కొందరు కపుల్స్ ‘ఫుడ్ డివోర్స్’ విధానాన్ని ఎంచుకుంటున్నారు.

ప్రతిసారీ రాజీ పడాల్సిన అవసరం లేదు

‘ఫుడ్ డివోర్స్’ అంటే ఇకపై ఇద్దరూ కలిసి భోజనం చేయకూడదని కాదు. ఇద్దరికీ ఒకే ఆహారం తినాలని అనిపిస్తే కలిసి తినొచ్చు. వారాంతాల్లో కలిసి బ్రేక్‌ఫాస్ట్ చేయొచ్చు. ప్రత్యేక సందర్భాల్లో బయటకు వెళ్లి కలిసి డిన్నర్ చేయొచ్చు. అయితే ఏదైనా రోజు ఇద్దరి ఆహారపు ఇష్టాలు పూర్తిగా భిన్నంగా ఉంటే దానిపై గొడవ పడాల్సిన అవసరం లేదనేది ఈ విధానం ఉద్దేశం. ఒకరు తనకు నచ్చిన ఆహారం తీసుకోవచ్చు. మరొకరు తనకు నచ్చిన ఆహారం తినవచ్చు. దీంతో ప్రతిరోజూ ఒకరు తమ ఇష్టాన్ని వదులుకుని మరొకరి కోసం రాజీ పడాల్సిన పరిస్థితి ఉండదు. ఒకరి ఆహారపు అలవాట్లను మరొకరు గౌరవించడానికి కూడా ఇది సహాయపడొచ్చు.

వేర్వేరుగా తినడం వల్ల రిలేషన్‌షిప్ దెబ్బతింటుందా?

అలా అని తప్పనిసరిగా చెప్పలేం. ప్రతి సంబంధానికి కొన్ని ప్రత్యేకమైన అలవాట్లు ఉంటాయి. కొందరు కపుల్స్ కలిసి అన్ని పనులు చేయడానికి ఇష్టపడతారు. మరికొందరు కొన్ని విషయాల్లో తమకు నచ్చిన విధంగా స్వేచ్ఛగా ఉండటానికి ఇష్టపడతారు. ఒకరికి నిద్రపోయే సమయం వేరుగా ఉండొచ్చు. మరొకరికి వేరే హాబీలు ఉండొచ్చు. అలాగే ఆహారం విషయంలో కూడా ఇద్దరి ఇష్టాలు వేరుగా ఉండటం సాధారణమే. కాబట్టి కేవలం వేర్వేరు ఆహారం తినడం వల్ల సంబంధంలో సమస్య ఉందని భావించాల్సిన అవసరం లేదు.

అయితే పార్ట్నర్‌తో సమయం గడపకుండా ఉండటానికి, మాట్లాడకుండా ఉండటానికి లేదా ఒకరినొకరు పూర్తిగా దూరం చేసుకోవడానికి వేర్వేరుగా తినడాన్ని కారణంగా చేసుకుంటే మాత్రం అది సంబంధంలో మరేదైనా సమస్యకు సంకేతం కావచ్చు. అందుకే ‘ఫుడ్ డివోర్స్’లో ముఖ్యమైన విషయం ఆహారం వేర్వేరుగా తీసుకోవడం కాదు.. ఒకరి ఇష్టాలను మరొకరు గౌరవించుకోవడం, అవసరమైనప్పుడు కలిసి సమయం గడపడం.