Food: చేపలు తిన్న వెంటనే పాలు తాగితే ఏం జరుగుతుంది.? నిపుణులు ఏమంటున్నారంటే

Food: చేపలు తిన్న తర్వాత పాలు తాగకూడదని చాలా మంది పెద్దలు చెబుతుంటారు. ఇలా చేస్తే చర్మంపై తెల్ల మచ్చలు వస్తాయని, ఆరోగ్యానికి హానికరమని తరతరాలుగా ఒక నమ్మకం కొనసాగుతోంది. అయితే ఇందులో ఎంత వరకు నిజం ఉందో ఇప్పుడు తెలుసుకుందాం.

తెల్ల మచ్చలు అంటే ఏమిటి?

విటిలిగో (Vitiligo) అనేది ఒక చర్మ సంబంధిత వ్యాధి. ఇందులో శరీరంలోని కొన్ని భాగాల్లో చర్మం తన సహజ రంగును కోల్పోయి తెల్లగా మారుతుంది. మన చర్మానికి రంగును ఇచ్చే మెలానిన్ అనే పదార్థాన్ని ఉత్పత్తి చేసే మెలానోసైట్స్ అనే కణాలు దెబ్బతినడం లేదా పనిచేయకపోవడం వల్ల ఈ సమస్య వస్తుంది. ఇది ఏ వయసులోనైనా రావచ్చు. శరీరంలోని ఏ భాగంపైనైనా కనిపించే అవకాశం ఉంటుంది. విటిలిగో అంటువ్యాధి కాదు. అలాగే ఇది కేవలం ఒక ప్రత్యేక ఆహారాన్ని తినడం వల్ల వచ్చే వ్యాధి కూడా కాదు.

చేపలు, పాలు కలిసి తినకూడదనే నమ్మకం ఎలా వచ్చింది?

ఆయుర్వేదం, సంప్రదాయ వైద్య విధానాల్లో చేపలు, పాలను "విరుద్ధ ఆహారం"గా పేర్కొన్నారు. అంటే ఒకదానికొకటి భిన్నమైన స్వభావం కలిగిన ఆహారాలు అని భావిస్తారు. ఈ కారణంగా ఈ రెండు పదార్థాలను ఒకేసారి తీసుకుంటే శరీరానికి హాని కలుగుతుందని, చర్మ వ్యాధులు వచ్చే అవకాశం ఉందని ప్రజల్లో నమ్మకం ఏర్పడింది. కాలక్రమేణా ఈ అభిప్రాయం బలపడుతూ, తెల్ల మచ్చలు వస్తాయనే ప్రచారం కూడా విస్తరించింది. అయితే ఈ నమ్మకానికి స్పష్టమైన శాస్త్రీయ ఆధారాలు లేవని వైద్య నిపుణులు చెబుతున్నారు.

నిపుణులు ఏమి చెబుతున్నారు?

చర్మ వ్యాధుల నిపుణుల ప్రకారం చేపలు, పాలు కలిసి తీసుకోవడం వల్ల తెల్ల మచ్చలు వస్తాయని నిరూపించే శాస్త్రీయ ఆధారాలు ఇప్పటివరకు లభించలేదు. విటిలిగోకు ప్రధాన కారణం ఆటోఇమ్యూన్ డిజార్డర్. అంటే శరీర రోగనిరోధక వ్యవస్థ పొరపాటున తన చర్మ కణాలపైనే దాడి చేయడం. దీనివల్ల మెలానిన్ ఉత్పత్తి తగ్గి తెల్ల మచ్చలు ఏర్పడతాయి. అలాగే జన్యుపరమైన కారణాలు, పర్యావరణ ప్రభావాలు, కొన్ని ఆరోగ్య పరిస్థితులు కూడా ఈ వ్యాధికి కారణమవుతాయి. కానీ చేపలు, పాలు కలిసి తినడం వల్ల విటిలిగో వస్తుందని ఏ పరిశోధనలోనూ తేల‌లేదు.

శాస్త్రీయ పరిశోధనలు ఏమి చెబుతున్నాయి?

ఇప్పటివరకు నిర్వహించిన వైద్య పరిశోధనల్లో చేపలు, పాలు కలిపి తీసుకోవడం, తెల్ల మచ్చల మధ్య ప్రత్యక్ష సంబంధం ఉన్నట్లు ఎక్కడా తేలలేదు. నిజానికి చేపల్లో ప్రోటీన్లు, ఒమేగా-3 ఫ్యాటీ యాసిడ్లు అధికంగా ఉంటాయి. పాలలో కాల్షియం, విటమిన్లు, ప్రోటీన్లు సమృద్ధిగా ఉంటాయి. ఈ రెండు ఆహారాలు కూడా పోషక విలువలు కలిగినవే. కాబట్టి సాధారణంగా ఆరోగ్యవంతమైన వ్యక్తుల్లో ఈ రెండు ఆహారాలను తీసుకోవడం వల్ల తెల్ల మచ్చలు వచ్చే ప్రమాదం లేదని వైద్య నిపుణులు చెబుతున్నారు.

ఆయుర్వేదం ప్రకారం ఎలాంటి జాగ్ర‌త్త‌లు తీసుకోవాలి.?

ఆయుర్వేదం ప్రకారం పాలు చల్లని స్వభావం కలిగిన ఆహారం. చేపలు మాత్రం వేడి స్వభావం కలిగిన ఆహారంగా పరిగణిస్తారు. అందువల్ల ఈ రెండింటిని ఒకేసారి తీసుకుంటే కొంతమందిలో జీర్ణక్రియ సమస్యలు, కడుపు ఉబ్బరం, అజీర్ణం వంటి ఇబ్బందులు కలగవచ్చని ఆయుర్వేద నిపుణులు చెబుతున్నారు. అయితే ఇది ప్రతి ఒక్కరికి వర్తించదు. వ్యక్తి శరీర స్వభావం, జీర్ణశక్తి, ఆరోగ్య పరిస్థితులపై ఆధారపడి ప్రభావం మారవచ్చు.