Cancer: ఒకే రక్త పరీక్షతో 50కి పైగా క్యాన్సర్ల గుర్తింపు.. సంచలనం సృష్టిస్తున్న 'గల్లెరి' టెస్ట్ అసలు నిజాలు ఇవే!

Galleri Blood Test for Cancer Detection: క్యాన్సర్‌ను వీలైనంత ముందుగానే గుర్తించడం ద్వారా ప్రాణాలను కాపాడుకోవచ్చనే ఉద్దేశంతో వైద్య రంగంలో నిరంతరం పరిశోధనలు జరుగుతున్నాయి. ఈ నేపథ్యంలో, కేవలం ఒకే రక్త నమూనాతో 50కి పైగా రకాల క్యాన్సర్లను గుర్తించగలుగుతామని చెబుతున్న ‘గల్లెరి’ (Galleri) పరీక్షపై ప్రపంచవ్యాప్తంగా తీవ్ర ఆసక్తి నెలకొంది. లక్షణాలు కనిపించకముందే క్యాన్సర్‌ ఆచూకీని కనిపెట్టగలదని చెబుతున్న ఈ పరీక్షపై తాజా అధ్యయనాలు, నిపుణుల హెచ్చరికలు మరియు దీనికి సంబంధించిన సమగ్ర వివరాలు ఇలా ఉన్నాయి.

గల్లెరి పరీక్ష అంటే ఏమిటి? ఇది ఎలా పనిచేస్తుంది?

గల్లెరి పరీక్ష అనేది ఒక మల్టీ-క్యాన్సర్ ఎర్లీ డిటెక్షన్ (MCED) బ్లడ్ టెస్ట్. ఇది రక్తంలోని క్యాన్సర్ కణాల నుంచి విడుదలయ్యే డీఎన్‌ఏ ముక్కలను పరిశీలిస్తుంది. వాటిపై ఉండే ప్రత్యేకమైన మిథైలేషన్‌ గుర్తులను గుర్తించి, యంత్ర అభ్యాస (Machine Learning) పద్ధతుల ద్వారా శరీరంలో క్యాన్సర్ సంకేతాలు ఉన్నాయా లేదా అని ఫలితాన్ని వెల్లడిస్తుంది. 50కి పైగా క్యాన్సర్లను గుర్తించడం, క్యాన్సర్ ఏ అవయవం నుంచి మొదలై ఉంటుందో కచ్చితంగా అంచనా వేయగలగడం ఈ పరీక్ష ప్రత్యేకతలు.

ఒక అధ్యయనంలో పరీక్ష చేయించుకున్న 32 వేల మందిలో 173 మందికి క్యాన్సర్ నిర్ధారణ కాగా, వారిలో 91 శాతం మందికి క్యాన్సర్ రకాన్ని ఈ పరీక్ష సరిగ్గా అంచనా వేసింది. తప్పుడు పాజిటివ్‌ ఫలితాలు కూడా సుమారు 0.5 శాతమేనని పరిశోధకులు తెలిపారు.

గల్లెరి పరీక్షపై పలు పరిశోధనలు జరుగగా, ఇందులో కొన్ని కీలకమైన పరిమితులు ఉన్నట్లు వెల్లడైంది.

ప్రారంభ దశలో తక్కువ సామర్థ్యం: మూడు సంవత్సరాల పాటు పరీక్షించినప్పుడు అన్ని దశల్లోని క్యాన్సర్లను గుర్తించే సామర్థ్యం 31 శాతం కంటే తక్కువగా ఉంది. అంటే దాదాపు 69 శాతం కేసులను ఇది గుర్తించలేకపోయింది. ముఖ్యంగా ప్రారంభ దశ క్యాన్సర్లను గుర్తించే సామర్థ్యం కేవలం 21 శాతమే ఉండటం గమనార్హం.

మరణాల తగ్గింపుపై అస్పష్టత: ఈ పరీక్ష వల్ల క్యాన్సర్‌ను ముందుగానే గుర్తించి మరణాల ప్రమాదాన్ని తగ్గించవచ్చని ఆశించినప్పటికీ, ఇప్పటివరకు అలాంటి ప్రయోజనం నిరూపితం కాలేదు. మూడు సంవత్సరాల్లో ముదిరిన దశ క్యాన్సర్ల సంఖ్యను తగ్గించాలన్న పరిశోధన లక్ష్యాన్ని కూడా ఇది పూర్తిగా చేరుకోలేకపోయింది.

అదనపు పరీక్షల భారం: పాజిటివ్‌ ఫలితం వస్తే నిర్ధారణ కోసం మరిన్ని పరీక్షలు, కొన్నిసార్లు బయాప్సీ చేయాల్సి వస్తుంది. ఒక అధ్యయనంలో 0.6 శాతం మందికి ఇన్వేసివ్‌ (Invasive) పరీక్షలు అవసరమయ్యాయి.

అమెరికా ఎఫ్‌డీఏ సలహా మండలి సిఫారసులు:

అమెరికా ఆహార, ఔషధ నియంత్రణ సంస్థ (US FDA) సలహా మండలి గ‌త సెప్టెంబర్‌ 23న ఈ పరీక్షకు అనుమతి ఇవ్వాలని సిఫారసు చేసింది. అయితే ఇది తుది అనుమతి కాదు. పరీక్షకు సంబంధించిన వివరాల్లో 'ప్రారంభ దశ క్యాన్సర్ గుర్తింపు' అనే పదాన్ని తొలగించాలని మండలి సభ్యులు సూచించారు. పరీక్ష సురక్షితమని ఏకగ్రీవంగా సిఫారసు చేసినప్పటికీ, దీని కచ్చితమైన ప్రభావంపై సభ్యుల మధ్య భిన్నాభిప్రాయాలు వ్యక్తమయ్యాయి.

వైద్యుల సలహా తప్పనిసరి:

ఈ పరీక్ష చేయించుకోవాలా వద్దా అనే విషయాన్ని ఎప్పుడూ స్వయంగా నిర్ణయించుకోకుండా, నిపుణులైన వైద్యులతో చర్చించిన తర్వాతే నిర్ణయం తీసుకోవాలి. అమెరికాలో ప్రస్తుతం దీని ధర 949 డాలర్లుగా ఉండగా, ప్రభుత్వ లేదా ప్రైవేట్ ఆరోగ్య బీమా సంస్థలు దీని ఖర్చును భరిస్తాయనే హామీ లేదు.

తప్పుడు నెగెటివ్‌ ఫలితం వచ్చిందంటే శరీరంలో క్యాన్సర్ లేదని పూర్తిగా నమ్మకూడదు. ముఖ్యంగా పెద్దపేగు, రొమ్ము, గర్భాశయ ముఖద్వారం, ఊపిరితిత్తుల క్యాన్సర్ల కోసం ప్రస్తుతం వైద్యులు సిఫారసు చేస్తున్న ప్రామాణిక పరీక్షలను ఎట్టి పరిస్థితుల్లోనూ నిర్లక్ష్యం చేయకూడదని నిపుణులు గట్టిగా హెచ్చరిస్తున్నారు.