Helmet: హెల్మెట్ వాడితే నిజంగానే జుట్టు రాలుతుందా.? ఇందులో నిజ‌మెంత

Helmet: హెల్మెట్‌ ధరించడం ప్రాణ రక్షణకు చాలా అవసరం. అయితే చాలామంది “హెల్మెట్ వాడితే జుట్టు ఊడిపోతుంది” అనే సందేహం వ్యక్తం చేస్తుంటారు. ఈ కార‌ణం చెప్పి ఉప‌యోగించ‌రు కూడా. అయితే ఇందులో ఎంత వ‌ర‌కు నిజం ఉందో ఇప్పుడు తెలుసుకుందాం.

హెల్మెట్‌ వల్ల నిజంగా జుట్టు ఊడుతుందా?

హెల్మెట్‌ నేరుగా జుట్టు ఊడిపోవడానికి కారణం కాదు. కానీ దాన్ని తప్పుగా లేదా ఎక్కువసేపు వాడితే జుట్టుపై ప్రభావం పడే అవకాశం ఉంది. అంటే హెల్మెట్‌ కారణం కాకపోయినా, దాన్ని ఎలా వాడుతున్నామన్నది ముఖ్యం.

చెమట వల్ల వచ్చే సమస్యలు

హెల్మెట్‌ ఎక్కువసేపు వేసుకుంటే తలలో చెమట ఎక్కువగా వస్తుంది. ఈ చెమట ఎక్కువసేపు తలపై ఉండిపోతే జుట్టు రూట్లు బలహీనపడే అవకాశం ఉంది. దీంతో జుట్టు కాస్త ఎక్కువగా ఊడుతున్నట్టు అనిపించొచ్చు.

హెల్మెట్‌ ఫిట్‌ కూడా కీలకం

చాలా టైట్‌గా ఉన్న హెల్మెట్ ధ‌రిస్తే జుట్టు లాగిన‌ట్లు అవుతుంది. అలాగే తరచుగా హెల్మెట్‌ పెట్టడం, తీయ‌డం వల్ల జుట్టు లాగి తెగే సమస్య వస్తుంది. సరైన సైజ్‌ హెల్మెట్‌ లేకపోతే ఈ సమస్యలు మరింత పెరుగుతాయి.

హెల్మెట్‌ శుభ్రత ముఖ్యం

చాలా రోజుల పాటు హెల్మెట్‌ శుభ్రం చేయకుండా వాడితే దానిలో బ్యాక్టీరియా, దుమ్ము చేరుతుంది. ఇవి తల చర్మానికి హానికరంగా మారి డాండ్రఫ్‌ లేదా ఇతర సమస్యలు తెచ్చిపెడతాయి. దాంతో జుట్టు ఆరోగ్యం దెబ్బతింటుంది.

జుట్టు రక్షణకు తీసుకోవాల్సిన జాగ్రత్తలు

జుట్టు, తల చర్మాన్ని ఎప్పటికప్పుడు శుభ్రంగా ఉంచాలి. వారానికి 2–3 సార్లు తలస్నానం చేయడం మంచిది. త‌ల త‌డిగా ఉన్నప్పుడు హెల్మెట్‌ పెట్టకూడదు. అవసరమైతే కాటన్‌ క్యాప్‌ వాడితే చెమట తగ్గుతుంది. అలాగే సరైన సైజ్‌ హెల్మెట్‌ వేసుకుని, దాన్ని తరచుగా శుభ్రం చేయడం ద్వారా జుట్టును కాపాడుకోవచ్చు. మొత్తానికి హెల్మెట్‌ వల్ల జుట్టు నేరుగా ఊడదు. కానీ సరైన జాగ్రత్తలు తీసుకోకపోతే మాత్రం జుట్టు సమస్యలు రావచ్చు.