Sleep: నిద్ర లేకుండా మనిషి ఎన్ని రోజులు బతకగలడు.? ఆ త‌ర్వాత ఏమ‌వుతుంది?

Sleep: మనిషి ఆహారం, నీళ్లు లేకుండా కొన్ని రోజుల పాటు బతకగలడని మనకు తెలుసు. కానీ నిద్ర లేకుండా మాత్రం ఎక్కువ కాలం జీవించడం చాలా కష్టం. నిద్ర అనేది శరీరానికి, మెదడుకు ఎంతో అవసరమైన సహజమైన విశ్రాంతి. మ‌నిషికి నిద్ర ఎందుకు అవ‌స‌రం.? ఎంత‌కాలం నిద్ర‌లేకుండా మ‌నిషి బ‌త‌క‌గ‌ల‌డు ఇప్పుడు తెలుసుకుందాం.

11 రోజులు నిద్ర లేకుండా ఉన్న వ్యక్తి

నిద్ర లేకుండా ఎక్కువసేపు ఉన్న వ్యక్తిగా అమెరికాకు చెందిన రాండీ గార్డనర్ పేరు ఎక్కువగా చెబుతుంటారు. 1964లో ఆయనకు 17 ఏళ్ల వయసులో ఉన్నప్పుడు ఒక పాఠశాల ప్రయోగంలో భాగంగా దాదాపు 11 రోజులు అంటే 264 గంటల పాటు నిద్రపోకుండా ఉన్నారు. ఈ సమయంలో ఆయన శరీరం, మెదడుపై తీవ్ర ప్రభావాలు కనిపించాయి.

ఎక్కువ సమయం నిద్ర లేకుండా ఉండటంతో ఆయనకు ఆలోచించే సామర్థ్యం బాగా తగ్గింది. విషయాలను గుర్తుపెట్టుకోవడంలో ఇబ్బంది ఏర్పడింది. మాట్లాడేటప్పుడు సరైన పదాలు గుర్తుకు రాకపోవడం వంటి సమస్యలు కూడా వచ్చాయి. అయితే కొంతకాలం విశ్రాంతి తీసుకున్న తర్వాత ఆయన ఆరోగ్యం క్రమంగా సాధారణ స్థితికి చేరుకుంది.

అయితే దీన్ని చూసి 11 రోజులు నిద్ర లేకుండా ఉండటం సురక్షితమని భావించకూడదు. ఇలాంటి ప్రయోగాలు ఆరోగ్యానికి తీవ్రమైన ప్రమాదాలను కలిగిస్తాయి. అందుకే గిన్నిస్ వరల్డ్ రికార్డ్స్ కూడా నిద్ర లేకుండా ఉండే రికార్డులను నమోదు చేయడం నిలిపివేసింది. ఆరోగ్యంపై తీవ్ర ప్రభావం పడే అవకాశం ఉండటమే ఇందుకు ప్రధాన కారణం.

24 గంటల నుంచి నిద్ర లేకపోతే ఏం జరుగుతుంది.?

ఒక వ్యక్తి 24 గంటల పాటు నిద్రపోకపోతేనే శరీరంలో మార్పులు మొదలవుతాయి. మొదట అలసట ఎక్కువగా ఉంటుంది. చిరాకు, కోపం, ఏకాగ్రత తగ్గడం వంటి సమస్యలు కనిపించవచ్చు. సాధారణంగా చేసే పనులు కూడా కష్టంగా అనిపిస్తాయి. డ్రైవింగ్ వంటి పనులు చేయడం మరింత ప్రమాదకరంగా మారుతుంది. రెండు రోజులు నిద్ర లేకుండా ఉంటే పరిస్థితి మరింత దిగజారుతుంది. జ్ఞాపకశక్తి, ఆలోచించే సామర్థ్యం తగ్గవచ్చు. చిన్న విషయాలను కూడా గుర్తుంచుకోవడం కష్టమవుతుంది. మూడు రోజుల వరకు నిద్ర లేకపోతే శరీరంపై ప్రభావం మరింత ఎక్కువగా ఉంటుంది. వికారం, చేతులు వణకడం, కళ్ల ముందు దృష్టి స్పష్టంగా లేకపోవడం వంటి సమస్యలు రావచ్చు.

ఇంకా ఎక్కువ సమయం నిద్ర లేకుండా ఉంటే మెదడు పనితీరు తీవ్రంగా దెబ్బతినవచ్చు. వాస్తవంగా లేని విషయాలు కనిపించడం లేదా వినిపించడం వంటి హాల్యూసినేషన్స్ కూడా రావచ్చు. అంటే వ్యక్తికి నిజంగా జరుగుతున్నది, తన మెదడు ఊహిస్తున్నది ఏదో గుర్తించడం కష్టమయ్యే పరిస్థితి ఏర్పడవచ్చు.

శరీరం తట్టుకోలేని స్థాయి ఎప్పుడు వస్తుంది.?

నిద్ర లేకుండా మనిషి ఎన్ని రోజులు బతకగలడో ఖచ్చితంగా చెప్పడానికి ఒక నిర్దిష్ట పరిమితి లేదు. ప్రతి వ్యక్తి శరీరం, ఆరోగ్యం, పరిస్థితులను బట్టి ప్రభావం మారుతుంది. 7 నుంచి 11 రోజులు నిద్ర లేకుండా ఉండటం చాలా తీవ్రమైన పరిస్థితిగా ప‌రిగ‌ణిస్తారు. అయితే దీనిని మనిషి శరీరానికి ఖచ్చితమైన ‘చివరి పరిమితి’గా చెప్పడం సరైనది కాదు.

నిద్ర పూర్తిగా దూరమయ్యే అరుదైన జన్యుపరమైన వ్యాధుల్లో ఒకటి ఫేటల్ ఫ్యామిలియల్ ఇన్సోమ్నియా (Fatal Familial Insomnia). ఈ వ్యాధి ఉన్నవారిలో నిద్ర సామర్థ్యం క్రమంగా తీవ్రంగా దెబ్బతింటుంది. ఇది చాలా అరుదైన వ్యాధి. నిద్ర పూర్తిగా లేకపోవడం వల్ల శరీరం, మెదడు పనితీరు తీవ్రంగా దెబ్బతిని చివరకు ప్రాణాంతక పరిస్థితికి దారితీయవచ్చు. అయితే సాధారణ వ్యక్తి కొన్ని రోజులు నిద్రపోకుండా ఉంటే తప్పనిసరిగా 7 లేదా 11 రోజులకు మరణిస్తాడని చెప్పడానికి శాస్త్రీయ ఆధారం లేదు. అందుకే ‘11 రోజులే మనిషి ప్రాణాలతో ఉండే చివరి గడువు’ అని భావించడం సరికాదు.

నిద్ర తక్కువైనా ప్రమాదమే.. రోజూ సరిపడా నిద్ర అవసరం

పూర్తిగా నిద్రపోకపోవడం అరుదైన పరిస్థితి అయినప్పటికీ, తగినంత నిద్ర లేకపోవడం మాత్రం చాలామందిలో కనిపించే సమస్య. రోజూ తక్కువ సమయం నిద్రపోవడం వల్ల అలసట, చిరాకు, ఏకాగ్రత తగ్గడం, జ్ఞాపకశక్తిపై ప్రభావం వంటి సమస్యలు రావచ్చు. దీర్ఘకాలంగా నిద్రకు ప్రాధాన్యం ఇవ్వకపోవడం ఆరోగ్యంపై కూడా ప్రతికూల ప్రభావం చూపే అవకాశం ఉంది.

అందుకే శరీరం అలసిపోయినప్పుడు దాన్ని పట్టించుకోకుండా నిద్రను తగ్గించడం మంచిది కాదు. వయసును బట్టి అవసరమైనంత నిద్ర పొందడం చాలా ముఖ్యం. మంచి నిద్ర వల్ల మెదడు చురుగ్గా పనిచేయడంతో పాటు శరీరం కూడా కోలుకుంటుంది. మొత్తంగా చూస్తే.. ఆహారం, నీటితో పాటు నిద్ర కూడా మనిషి ఆరోగ్యానికి అత్యంత అవసరమైన ప్రాథమిక అవసరాల్లో ఒకటి. నిద్రను నిర్లక్ష్యం చేస్తే దాని ప్రభావం ముందుగా మెదడుపై, ఆ తర్వాత మొత్తం శరీరంపై కనిపిస్తుంది.