Kakarakaya Kaju Fry: చేదు లేని కాకరకాయ కాజు ఫ్రై.. ఒక్కసారి తింటే మళ్లీ మళ్లీ తింటారు!

ముఖ్యంగా కాకరకాయ చేదును తగ్గించే పద్ధతిలో తయారు చేయడం ఈ రెసిపీ ప్రత్యేకత. తయారీ విధానం కూడా చాలా సులభం. ఒకసారి తయారు చేసుకుంటే ఫ్రిజ్‌లో నిల్వ చేసుకుని వారం రోజుల వరకు ఉపయోగించుకోవచ్చని రెసిపీ సూచిస్తోంది. మరి ఈ టేస్టీ కాకరకాయ కాజు ఫ్రై ఎలా తయారు చేసుకోవాలో తెలుసుకుందాం.

కావాల్సిన పదార్థాలు

మసాలా పేస్ట్ కోసం:

• ధనియాలు – ఒకటిన్నర టీస్పూన్లు

• జీలకర్ర – అర టీస్పూన్

• వెల్లుల్లి రెబ్బలు – 8

• ఎండుమిర్చి – 2

• పచ్చి కొబ్బరి ముక్కలు – 2 టేబుల్ స్పూన్లు

కాకరకాయ ఫ్రై కోసం:

• కాకరకాయలు – 250 గ్రాములు

• పసుపు – 1 టీస్పూన్

• నూనె – 4 టేబుల్ స్పూన్లు

• మినప్పప్పు – అర టీస్పూన్

• వెల్లుల్లి రెబ్బలు – 6

• జీలకర్ర – అర టీస్పూన్

• ఆవాలు – అర టీస్పూన్

• జీడిపప్పు – ఒక గుప్పెడు

• కరివేపాకు – 2 రెమ్మలు

• కారం – తగినంత

• ఉప్పు – రుచికి సరిపడా

కాకరకాయ కాజు ఫ్రై తయారీ విధానం

స్టెప్ 1: కాకరకాయ ముక్కలను సిద్ధం చేసుకోవాలి

ముందుగా కాకరకాయలను శుభ్రంగా కడిగి, వాటిపై తడి లేకుండా తుడుచుకోవాలి. అనంతరం చివర్లు తొలగించి పలుచటి గుండ్రని ముక్కలుగా కట్ చేసుకోవాలి. ఈ ముక్కలను ఒక గిన్నెలోకి తీసుకుని ఒక టీస్పూన్ ఉప్పు, అర టీస్పూన్ పసుపు వేసి బాగా కలపాలి. మూత పెట్టి సుమారు అరగంట పాటు పక్కన ఉంచాలి.

స్టెప్ 2: చేదు తగ్గించుకోవాలి

అరగంట తర్వాత కాకరకాయ ముక్కల నుంచి నీరు బయటకు వస్తుంది. ఆ నీటిని పూర్తిగా పారబోసి, ముక్కలను రెండు సార్లు శుభ్రమైన నీటితో కడగాలి. అనంతరం చేతులతో గట్టిగా పిండుతూ నీటిని తొలగించి మరో గిన్నెలోకి తీసుకోవాలి.

స్టెప్ 3: మసాలా పేస్ట్ తయారీ

ఇప్పుడు మిక్సీ జార్‌లో ధనియాలు, జీలకర్ర, వెల్లుల్లి రెబ్బలు, ఎండుమిర్చి, పచ్చి కొబ్బరి ముక్కలు వేసుకోవాలి. వీటిని మరీ మెత్తగా కాకుండా కొద్దిగా బరకగా గ్రైండ్ చేసుకోవాలి.

స్టెప్ 4: కాకరకాయ ముక్కలను వేయించాలి

స్టవ్‌పై కడాయి పెట్టి నూనె పోసి వేడి చేయాలి. అందులో ముందుగా సిద్ధం చేసుకున్న కాకరకాయ ముక్కలు వేసి తక్కువ మంటపై వేయించాలి. మధ్యమధ్యలో కలుపుతూ ముక్కలు బాగా వేగి బంగారు గోధుమ రంగులోకి వచ్చే వరకు ఉంచాలి. అనంతరం వాటిని ప్లేట్‌లోకి తీసుకోవాలి.

స్టెప్ 5: కాజు మసాలా సిద్ధం చేయాలి

అదే కడాయిలో మిగిలిన నూనెలో వెల్లుల్లి రెబ్బలు, మినప్పప్పు, జీలకర్ర, ఆవాలు, జీడిపప్పు వేసి వేయించాలి. జీడిపప్పు కొద్దిగా రంగు మారిన తర్వాత కరివేపాకు, పసుపు వేసి కలపాలి.

స్టెప్ 6: కాకరకాయ కాజు ఫ్రై పూర్తి చేయాలి

ఇప్పుడు ముందుగా గ్రైండ్ చేసుకున్న కొబ్బరి మసాలా మిశ్రమాన్ని కడాయిలో వేసి పచ్చివాసన పోయే వరకు సుమారు రెండు నిమిషాలు వేయించాలి. అనంతరం వేయించి పెట్టుకున్న కాకరకాయ ముక్కలను వేసి బాగా కలపాలి. రుచికి సరిపడా ఉప్పు, కారం జోడించి మరో ఐదు నిమిషాల పాటు తక్కువ మంటపై వేయించాలి. అంతే.. ఎంతో రుచికరమైన కాకరకాయ కాజు ఫ్రై సిద్ధమవుతుంది.

రుచిని పెంచే ముఖ్యమైన చిట్కాలు

• కాకరకాయలను మరీ మందంగా కాకుండా పలుచటి గుండ్రని ముక్కలుగా కట్ చేసుకోవాలి. అప్పుడే అవి నూనెలో బాగా వేగుతాయి.

• కాకరకాయ ముక్కలకు ఉప్పు, పసుపు పట్టించి అరగంట పాటు ఉంచడం వల్ల చేదు తగ్గించుకోవచ్చు.

• పచ్చి కొబ్బరి అందుబాటులో లేకపోతే వేయించిన పల్లీలను ఉపయోగించవచ్చు.

• జీడిపప్పుకు బదులుగా పల్లీలు కూడా వేసుకోవచ్చు.

• మసాలా మిశ్రమాన్ని మరీ మెత్తగా కాకుండా బరకగా గ్రైండ్ చేసుకుంటే రుచి బాగుంటుంది.

ఈ విధంగా తయారు చేసుకున్న కాకరకాయ కాజు ఫ్రైని వేడి వేడి అన్నంలోకి తింటే ఎంతో రుచిగా ఉంటుంది. మీరు కూడా ఇంట్లో ఈ రెసిపీని ప్రయత్నించండి.