లీలా తాండవంలో హరిహర తత్వానికి నృత్యరూపం

మాదాపూర్‌లోని శిల్పకళా వేదికలో టీమ్ శివాంశ్ ఆధ్వర్యంలో ‘లీలా తాండవం – శాశ్వత లయ’ అనే భరతనాట్య, సంగీత, కథా ప్రదర్శన ప్రేక్షకులను ఆకట్టుకుంది. మైత్రి రావు భావన, నృత్య దర్శకత్వం, దర్శకత్వంలో రూపొందిన ఈ ప్రదర్శనలో హరి–హరులైన విష్ణుమూర్తి, శివుడి విభిన్న రూపాలు, శక్తులు, పరస్పర అనుబంధాన్ని భరతనాట్యం, ప్రత్యక్ష సంగీతం, గానం, కథాకథనం ద్వారా ఆవిష్కరించారు.

30 మందికి పైగా కళాకారులు పాల్గొన్న ఈ ప్రదర్శనలో టీమ్ శివాంశ్ నృత్యకారులతో పాటు సంగీతకారులు, గాయకులు, కోరస్ కళాకారులు, కథకురాలు పరిధి మంగళంపల్లి పాల్గొన్నారు. సౌమ్య వారణాసి గానం ప్రదర్శనకు ప్రత్యేక ఆకర్షణగా నిలిచింది.

ప్రారంభంలో దేవతా విగ్రహాలకు పుష్ప నైవేద్యాలు సమర్పిస్తూ చేసిన ప్రార్థనతో కార్యక్రమం మొదలైంది. అనంతరం ‘అలరిప్పు’తో శివుడు, విష్ణువు భౌతిక రూపాలు, దృశ్య గుర్తింపులను నృత్య భాషలో పరిచయం చేశారు.

దశావతారం ద్వారా విష్ణువు విశ్వ క్రమాన్ని పరిరక్షించే శక్తిని, ‘చంద్ర చూడా’ ద్వారా శివ తత్వంలోని శక్తి స్వరూపాన్ని ప్రదర్శించారు. తదుపరి భాగాల్లో పురాణ కథనాల ఆధారంగా హరి–హరుల పరస్పర సంబంధాన్ని ఆవిష్కరించగా, ‘హనుమాన్ చాలీసా’, ‘శివ తాండవ స్తోత్రం’ భక్తి, బలం, దైవిక శక్తుల సమ్మేళనాన్ని ప్రతిబింబించాయి.

లక్ష్మి, కామాక్షి రూపాల ద్వారా దైవిక స్త్రీత్వం హరి–హరుల విశ్వలీలలో అంతర్భాగమనే భావనను ప్రదర్శన చాటి చెప్పింది. ద్వైతం, అద్వైతం వంటి తాత్విక భావనలను ‘సాగర శయన’, ‘ఆనంద నటన’ వంటి అంశాల ద్వారా ప్రేక్షకుల ముందుకు తీసుకొచ్చారు. అనంతరం పండర్‌పూర్ జానపద కథతో హరి–హరుల మధ్య ఉన్న అంతర్లీన ఏకత్వాన్ని వివరించారు.

చివరగా ‘నామ స్మరణ’ భజనతో ప్రదర్శన ముగిసింది. నృత్యం, సంగీతం, కథనం, పురాణాలు, తత్వశాస్త్రం, జానపద కథలను మేళవించిన ఈ ప్రదర్శన హరి, హరులు వేర్వేరు దైవ స్వరూపాలా, లేక ఒకే దైవ చైతన్యానికి భిన్న వ్యక్తీకరణలా అనే ఆలోచనను ప్రేక్షకుల ముందుంచింది.

వేదికపై కోరస్ కళాకారుల కదలికలు, ఆకట్టుకునే లైటింగ్, నేపథ్య దృశ్యాలు ప్రదర్శనకు మరింత అందాన్ని తీసుకొచ్చాయి. చివర్లో యువ నృత్యకారులు ప్రేక్షకుల మధ్యకు రావడంతో ఉత్సాహభరితమైన వాతావరణం నెలకొంది. ప్రేక్షకులు లేచి నిలబడి చప్పట్లతో కళాకారులను అభినందించారు.