పిల్లల ఆరోగ్యంపై తండ్రి జీవనశైలి ప్రభావం.. గర్భధారణకు ముందే పురుషుల ఆరోగ్యం ఎంత ముఖ్యమో తెలుసా?

గర్భధారణకు ముందు తల్లి ఆరోగ్యంతో పాటు తండ్రి ఆరోగ్యంపైనా శ్రద్ధ పెట్టాల్సిన అవసరం ఉందని తాజా అధ్యయనం చెబుతోంది. Men’s Health జర్నల్‌లో ప్రచురితమైన ఈ సమీక్ష ప్రకారం.. కాబోయే తండ్రి శారీరక, మానసిక ఆరోగ్యం, ఆహారపు అలవాట్లు, మద్యపానం, పొగాకు వినియోగం, జీవనశైలి వంటి అంశాలు భవిష్యత్‌లో పుట్టబోయే బిడ్డ ఆరోగ్యంతో సంబంధం కలిగి ఉండే అవకాశం ఉంది. గర్భధారణకు ముందు తండ్రుల ఆరోగ్యానికి సంబంధించి గతంలో నిర్వహించిన పలు అధ్యయనాలను పరిశోధకులు పరిశీలించారు. వీటిలో తండ్రి ఆరోగ్యం, పిల్లల ఆరోగ్య ఫలితాల మధ్య సంబంధం ఉన్నట్లు గుర్తించారు. ముఖ్యంగా మద్యపానం వల్ల కొన్ని పుట్టుకతో వచ్చే లోపాల ప్రమాదం 35 శాతం వరకు పెరిగినట్లు ఓ అధ్యయనం సూచించింది. అయితే.. ఇలాంటి పరిశీలనా అధ్యయనాల ఆధారంగా నేరుగా కారణ-ఫలిత సంబంధాన్ని నిర్ధారించలేమని పరిశోధకులు స్పష్టం చేశారు.

అలాగే తండ్రి వయస్సు కూడా కీలక అంశంగా కనిపించిందని సమీక్ష పేర్కొంది. ముఖ్యంగా 45 ఏళ్లు లేదా అంతకంటే ఎక్కువ వయస్సులో తండ్రులుగా మారే వారిలో కొన్ని ఆరోగ్య సమస్యల ప్రమాదం పెరిగే అవకాశం ఉందని గత పరిశోధనలు సూచించాయి. తండ్రి వయస్సు, ఆటిజం స్పెక్ట్రమ్ డిజార్డర్స్ వంటి కొన్ని పరిస్థితుల మధ్య సంబంధాన్ని కూడా పలు అధ్యయనాలు గుర్తించాయి. అయితే దీనికి వయస్సు ఒక్కటే కారణమని చెప్పలేమని పరిశోధకులు చెబుతున్నారు.

మరోవైపు.. పురుషుల మానసిక ఆరోగ్యాన్ని కూడా నిర్లక్ష్యం చేయకూడదని అధ్యయనం సూచించింది. డిప్రెషన్‌తో బాధపడుతున్న తండ్రుల పిల్లల్లోనూ డిప్రెషన్ వచ్చే అవకాశం ఎక్కువగా ఉన్నట్లు కొన్ని పరిశోధనలు వెల్లడించాయి. దీనిపై జన్యుపరమైన అంశాలతో పాటు కుటుంబ వాతావరణం, సామాజిక పరిస్థితులు కూడా ప్రభావం చూపే అవకాశం ఉందని పరిశోధకులు పేర్కొన్నారు.

ఇప్పటివరకు అందుబాటులో ఉన్న ఆధారాల్లో ఎక్కువ భాగం పరిశీలనా అధ్యయనాలే కావడంతో.. గర్భధారణకు ముందు తండ్రి ఆరోగ్యం, బిడ్డ ఆరోగ్యం మధ్య ఉన్న సంబంధంపై మరింత స్పష్టత కోసం అధిక నాణ్యత కలిగిన పరిశోధనలు అవసరమని సమీక్ష తెలిపింది. అయినప్పటికీ.. గర్భధారణకు ముందు సంరక్షణ విషయంలో తల్లి ఆరోగ్యానికే పరిమితం కాకుండా తండ్రి ఆరోగ్యాన్నీ సమానంగా పరిగణించాల్సిన అవసరం ఉందని పరిశోధకులు స్పష్టం చేశారు. కాబోయే తండ్రులు ముందుగానే తమ మానసిక ఆరోగ్యం, ఆహారం, జీవనశైలిపై శ్రద్ధ పెట్టడం కుటుంబ ఆరోగ్యానికి మేలు చేసే చర్యగా వారు సూచించారు.