Chemotherapy Hair Loss: కీమోథెరపీతో జుట్టు రాలడం బాధాకరం.. చెఫ్ పంకజ్ భదౌరియా

ప్రముఖ చెఫ్, 'మాస్టర్‌చెఫ్ ఇండియా' తొలి సీజన్ విజేత పంకజ్ భదౌరియా ప్రస్తుతం క్యాన్సర్ వ్యాధితో పోరాడుతున్నారు. రొమ్ము క్యాన్సర్ చికిత్సలో భాగంగా కీమోథెరపీ పొందుతున్న ఆమె, చికిత్స కారణంగా తన ఒత్తైన జుట్టు రాలిపోవడం చూసి ఎదుర్కొన్న మానసిక వేదనను సోషల్ మీడియా వేదికగా పంచుకున్నారు. ఈ భావోద్వేగ పోస్ట్ ప్రస్తుతం నెటిజన్లను, ఆమె అభిమానులను ఎంతగానో కలచివేస్తోంది.

"ముందే తెలిసినా.. ఆ క్షణం నా ఊపిరి ఆగినంత పనైంది":

కీమోథెరపీ ప్రారంభమైన మూడో వారం నుంచి జుట్టు రాలడం మొదలవుతుందని మానసికంగా సిద్ధపడినప్పటికీ, ప్రతీరోజూ జుట్టు విపరీతంగా ఊడిపోవడం చూడటం ఎంతో బాధాకరమైన అనుభవమని పంకజ్ పేర్కొన్నారు. తన జుట్టును దువ్వుకుంటూ రాలిపోయిన వెంట్రుకలను చూస్తున్న ఒక ఫొటోను షేర్ చేస్తూ..

"అది జరుగుతుందని మీకు ముందే తెలుసు, దానికి మీరు సిద్ధంగానే ఉంటారు. కానీ అది నిజంగా సంభవించినప్పుడు దాని ప్రభావం చాలా తీవ్రంగా ఉంటుంది. నా ఒత్తైన, దృఢమైన జుట్టు అంటే నాకు ఎంతో గర్వం ఉండేది. అలాంటి జుట్టు కళ్లముందే రాలిపోతుంటే నా ఊపిరి ఆగిపోయినంత పనైంది. ఇవి మళ్లీ వస్తాయని తెలుసు.. కానీ ఈ క్షణం తట్టుకోవడం చాలా కష్టంగా ఉంది" అని ఆవేదన వ్యక్తం చేశారు.

జుట్టును ముందే చిన్నగా కత్తిరించుకుని...

కీమోథెరపీ వల్ల జుట్టు ఊడిపోతుందని ముందుగానే గ్రహించిన పంకజ్, చికిత్స ప్రారంభానికి ముందే తన పొడవైన జుట్టును చిన్నగా కత్తిరించుకున్నారు. "జుట్టు రాలినా రాలకపోయినా ఉన్న సమయాన్ని నాకు నచ్చినట్లు ఆస్వాదిస్తాను" అని అప్పట్లోనే ధైర్యంగా పోస్ట్ చేశారు.

రొమ్ము క్యాన్సర్ నిర్ధారణ – సర్జరీ మరియు కీమోథెరపీ:

ఈ ఏడాది మే నెలలో తనకు రొమ్ము క్యాన్సర్ ఉన్నట్లు పంకజ్ బహిరంగంగా వెల్లడించారు. మే 28న ఆసుపత్రి బెడ్‌పై ఉన్న ఫొటోను షేర్ చేస్తూ అభిమానుల ప్రార్థనలు కోరారు. మే 29న శస్త్రచికిత్స (Surgery) పూర్తయిన తర్వాత వచ్చిన బయాప్సీ నివేదికల్లో 2mm HER2-పాజిటివ్ భాగం బయటపడటంతో వైద్యులు ఆమెకు 12 కీమోథెరపీ సెషన్లతో పాటు ఏడాది పాటు టార్గెటెడ్ థెరపీని సూచించారు. కీమోథెరపీ ప్రక్రియ భయపెడుతున్నప్పటికీ, ధైర్యంతో ఈ క్యాన్సర్ పోరాటంలో విజయం సాధిస్తానని ఆమె నమ్మకం వ్యక్తం చేశారు.