Pregnancy Diet: ప్రెగ్నెన్సీలో పసుపు పాలు తాగవచ్చా? నిపుణులు చెబుతున్న నిజాలు ఇవే!

Pregnancy Diet: భారతీయ సంప్రదాయంలో పసుపు పాలను ఒక గొప్ప దేశీ వైద్యంగా భావిస్తారు. ఇందులో ఉండే కర్కుమిన్ అనేక ఆరోగ్య ప్రయోజనాలను ఇస్తుందని నమ్ముతారు. అయితే గర్భధారణ సమయంలో మహిళలు ఆహారపు అలవాట్ల విషయంలో చాలా జాగ్రత్తగా ఉండాలి. ముఖ్యంగా పసుపు పాలు తాగడం వల్ల వేడి చేసే గుణం ఉంటుందని, ఇది కడుపులోని శిశువుకు హాని చేస్తుందనే అపోహ చాలామందిలో ఉంటుంది. ఢిల్లీకి చెందిన ప్రముఖ ఆయుర్వేద నిపుణులు డాక్టర్ చంచల్ శర్మ ప్రకారం, పరిమిత మోతాదులో పసుపు తీసుకోవడం ఆరోగ్యానికి మేలు చేస్తుంది. అయితే ప్రెగ్నెన్సీ సమయంలో వైద్యుల సలహా తీసుకోవడం చాలా ముఖ్యం.

పసుపు వాడకంపై నిపుణుల సూచనలు

గర్భధారణ సమయంలో కూరల్లో సాధారణంగా వేసే మోతాదులో పసుపును వినియోగించడం పూర్తిగా సురక్షితమని నిపుణులు స్పష్టం చేస్తున్నారు. దీనివల్ల ఎలాంటి ఇబ్బంది ఉండదు. కానీ పాలు కప్పుల్లోకి తీసుకునేటప్పుడు ఎక్కువ మొత్తంలో పసుపు కలపడం, మార్కెట్లో లభించే కర్కుమిన్ సప్లిమెంట్లు వాడటం మాత్రం ప్రమాదకరంగా మారవచ్చు. పసుపులో యాంటీ ఇన్ఫ్లమేటరీ గుణాలు ఉన్నప్పటికీ, ప్రెగ్నెన్సీ సమయంలో పసుపు పాలు తాగడం వల్ల కలిగే లాభాలపై కచ్చితమైన శాస్త్రీయ ఆధారాలు లేవు. కాబట్టి దీనిని ఏ ప్రత్యేక వ్యాధికి మందులా భావించకూడదు.

మూడు నెలల్లో తీసుకోవాల్సిన జాగ్రత్తలు

గర్భధారణ దశలో మొదటి మూడు నెలలు అత్యంత కీలకమైనవి. ఈ సమయంలో సాధారణ కూరల్లో పసుపు వాడొచ్చు కానీ రోజువారీగా పసుపు పాలు తాగే అలవాటు ముందుగా గైనకాలజిస్ట్ సంప్రదించకుండా చేయవద్దు. రెండవ త్రిమాసంలో కూడా సమతుల్య ఆహారం తీసుకోవడం మంచిది. ఇక చివరి త్రిమాసమైన ఏడు నుంచి తొమ్మిదవ నెలల మధ్యలో పసుపు అధికంగా తీసుకోవడం వల్ల ప్రసవ సమయంలో రక్తస్రావ సమస్యలు వస్తాయనే భయం ఉంటుంది. డెలివరీ తేదీ దగ్గర పడుతున్నప్పుడు పసుపు సప్లిమెంట్లకు పూర్తిగా దూరంగా ఉండటం శ్రేయస్కరం.

తాగేటప్పుడు పాటించాల్సిన ముఖ్యమైన నియమాలు

పసుపు పాలు తాగే అలవాటు ఉన్నవారు తగిన మోతాదు పాటిస్తే సరిపోతుంది. రోజూ గ్లాసు పాలలో చిటికెడు పసుపు వేసుకోవడం వరకు ఫర్వాలేదు. అయితే ఎల్లప్పుడూ బాగా మరిగించిన పాలు లేదా పాశ్చరైజ్ చేసిన పాలను మాత్రమే ఉపయోగించాలి. ఒకవేళ గర్భిణీలు రక్తం పలుచబడే మందులు వాడుతున్నా లేదా పిత్తాశయంలో రాళ్ల సమస్య ఉంటే వైద్యుల పర్యవేక్షణలో మాత్రమే పసుపు వినియోగించాలి.