చేనేత కళాకారులకు అండగా రవీనా టాండన్.. స్వదేశీపై ప్రశంసలు

నేషనల్ హ్యాండ్లూమ్ డే సందర్భంగా బాలీవుడ్ నటి రవీనా టాండన్ భారతీయ చేనేత కార్మికులు, కళాకారులకు తన మద్దతు ప్రకటించారు. సంప్రదాయ చేనేత కళలను తరతరాలుగా కాపాడుతూ వస్తున్న మాస్టర్ వీవర్స్, కళాకారుల కృషిని ప్రశంసిస్తూ సోషల్ మీడియాలో ప్రత్యేక సందేశాన్ని పంచుకున్నారు.

తన సోషల్ మీడియా ఖాతాలో చేనేత చీరలు ధరించిన ఫొటోలను రవీనా టాండన్ షేర్ చేశారు. స్థానికంగా తయారైన వస్త్రాలను ప్రోత్సహించడంతో పాటు భారతీయ చేనేత వారసత్వాన్ని కాపాడుకోవాల్సిన అవసరాన్ని ఆమె ప్రస్తావించారు.

“స్వదేశీ అనేది మన సొంత ప్రజలకు అండగా నిలబడాలనే ఆలోచనతో ఏర్పడింది. అది మన మాస్టర్ వీవర్స్‌తోనే ప్రారంభమవుతుంది. మన సంస్కృతిని సజీవంగా ఉంచుతున్న వారి చేతులకు కృతజ్ఞతగా ఈ రోజు స్థానికంగా తయారైన వస్త్రాలను ధరిస్తున్నాను” అంటూ రవీనా పేర్కొన్నారు.

చేనేత కళాకారుల చేతుల్లో రూపుదిద్దుకున్న చీరలను ధరించిన ఫొటోల ద్వారా భారతీయ హ్యాండ్లూమ్స్‌పై తనకున్న అభిమానం, స్థానిక ఉత్పత్తులపై మద్దతును ఆమె చాటుకున్నారు. భారతీయ నేత కార్మికుల నైపుణ్యం, సంప్రదాయ వస్త్రాల ప్రత్యేకతను ఈ సందర్భంగా ప్రస్తావించారు.

జాతీయ చేనేత దినోత్సవం సందర్భంగా పలువురు సినీ తారలు కూడా భారతీయ చేనేత వారసత్వానికి మద్దతుగా సోషల్ మీడియాలో పోస్టులు చేశారు. నటి శ్రియా శరణ్ చేనేత కార్మికుల కృషిని ప్రశంసిస్తూ.. ప్రతి దారం వెనుక ఒక కుటుంబం, సంప్రదాయం, ఎన్నో రోజుల కష్టం ఉంటుందని పేర్కొన్నారు.

‘క్యుంకీ సాస్ భీ కభీ బహు థీ’ నటి అపరా మెహతా కూడా దేశంలోని చేనేత కార్మికులు, కళాకారులకు శుభాకాంక్షలు తెలిపారు. భారతదేశానికి గొప్ప వస్త్ర వారసత్వం ఉందని, చిన్నప్పటి నుంచే తన తల్లి ద్వారా చేనేత వస్త్రాలపై పరిచయం ఏర్పడిందని చెప్పారు. ప్రతి ఒక్కరూ భారతీయ చేనేత, స్థానిక వస్త్రాలను ఆదరించి దేశ సంప్రదాయాన్ని కొనసాగించాలని ఆమె కోరారు.

భారతదేశంలో ఆగస్టు 7న 12వ జాతీయ చేనేత దినోత్సవాన్ని నిర్వహించారు. దేశంలో శతాబ్దాలుగా కొనసాగుతున్న చేనేత సంప్రదాయాలను గౌరవించడంతో పాటు నేత కార్మికులు, కళాకారుల కృషిని గుర్తించడం ఈ రోజు ప్రధాన ఉద్దేశం. 1905 ఆగస్టు 7న ప్రారంభమైన స్వదేశీ ఉద్యమాన్ని కూడా ఈ రోజు గుర్తుచేస్తుంది. భారతీయ ఉత్పత్తులను ప్రోత్సహించడం, స్వదేశీ వస్తువులను వినియోగించడాన్ని ప్రోత్సహించడం ఈ ఉద్యమం ప్రధాన లక్ష్యాల్లో ఒకటి.