రాయలసీమ స్పెషల్.. నాటుకోడి పులుసు, రాగిముద్ద ఇలా చేస్తే రుచి అదిరిపోతుంది!

రాయలసీమ సంప్రదాయ వంటకాల్లో నాటుకోడి పులుసు, రాగిముద్ద కాంబినేషన్‌కు ప్రత్యేకమైన స్థానం ఉంది. ఘాటైన మసాలాలతో చిక్కగా తయారయ్యే నాటుకోడి పులుసును వేడివేడి రాగిముద్దతో కలిపి తింటే ఆ రుచే వేరు. ముఖ్యంగా నాటుకోడి ముక్కలు మెత్తగా ఉడికేలా, పులుసు మంచి రుచితో చిక్కగా వచ్చేలా కొన్ని మెలకువలు పాటించాలి.

నాటుకోడి పులుసుకు కావాల్సిన పదార్థాలు

అర కిలో శుభ్రం చేసిన నాటుకోడి మాంసం, రెండు ఉల్లిపాయలు, రెండు టమోటాలు, మూడు పచ్చిమిరపకాయలు, ఒకటిన్నర చెంచా అల్లం వెల్లుల్లి ముద్ద, అర చెంచా పసుపు, రెండు చెంచాల కారం, మూడు నుంచి నాలుగు చెంచాల నూనె, పావు కప్పు కొత్తిమీర, తగినంత ఉప్పు తీసుకోవాలి.

పులుసుకు ప్రత్యేక రుచి రావాలంటే మసాలా ముద్ద కూడా సిద్ధం చేసుకోవాలి. ఇందుకోసం రెండు చెంచాల ధనియాలు, పావు కప్పు ఎండు కొబ్బరి, రెండు చిన్న దాల్చిన చెక్క ముక్కలు, నాలుగు లేదా ఐదు లవంగాలు, రెండు యాలకులు, ఒక చెంచా గసగసాలు, అర చెంచా మిరియాలు, ఒక చెంచా జీలకర్ర తీసుకోవాలి.

నాటుకోడి పులుసు తయారీ విధానం

ముందుగా బాణలిలో కొద్దిగా నూనె వేసి ధనియాలు, దాల్చిన చెక్క, లవంగాలు, యాలకులు, మిరియాలు, జీలకర్ర, గసగసాలు, ఎండు కొబ్బరిని దోరగా వేయించాలి. ఇవి చల్లారిన తర్వాత కొద్దిగా నీళ్లు పోసి మెత్తటి ముద్దలా రుబ్బి పక్కన పెట్టుకోవాలి.

ఇప్పుడు కుక్కర్‌లో నూనె వేడి చేసి ఉల్లిపాయలు, పచ్చిమిరపకాయలు వేసి దోరగా వేయించాలి. తర్వాత అల్లం వెల్లుల్లి ముద్ద వేసి పచ్చివాసన పోయే వరకు వేయించాలి. ఇందులో నాటుకోడి ముక్కలు, పసుపు, ఉప్పు వేసి బాగా కలపాలి.

మూతపెట్టి చిన్న మంటపై సుమారు 5 నుంచి 7 నిమిషాలు మగ్గించాలి. ముక్కల్లోని నీరు బయటకు వచ్చిన తర్వాత టమోటా ముక్కలు, కారం, ముందుగా సిద్ధం చేసుకున్న మసాలా ముద్ద వేసి బాగా కలపాలి. నూనె పైకి తేలే వరకు ఉడికించాలి.

ఆ తర్వాత ముక్కలు మునిగేంత వరకు సుమారు 2 నుంచి 3 కప్పుల నీళ్లు పోసి కుక్కర్ మూత పెట్టాలి. నాటుకోడి మాంసం ఉడకడానికి కొంత సమయం పడుతుంది కాబట్టి మీడియం మంటపై 5 నుంచి 6 విజిల్స్ వచ్చే వరకు ఉడికించాలి. ఆవిరి పూర్తిగా తగ్గిన తర్వాత మూత తీసి కొత్తిమీర వేసి మరో రెండు నిమిషాలు చిన్న మంటపై మరిగిస్తే నాటుకోడి పులుసు సిద్ధమవుతుంది.

రాగిముద్ద ఇలా చేస్తే మెత్తగా వస్తుంది

రాగిముద్ద కోసం ఒక కప్పు రాగి పిండి, పావు కప్పు బియ్యం, రెండున్నర కప్పుల నీళ్లు, చిటికెడు ఉప్పు, ఒక చిన్న చెంచా నెయ్యి తీసుకోవాలి.

ముందుగా పాత్రలో నీళ్లు పోసి ఉప్పు, కడిగిన బియ్యం వేసి మెత్తగా ఉడికించాలి. బియ్యం పూర్తిగా మెత్తగా ఉడికిన తర్వాత మంటను తగ్గించి రాగి పిండిని అన్నం పైన సమానంగా చల్లాలి. వెంటనే కలపకుండా మూతపెట్టి 3 నుంచి 4 నిమిషాలు ఆవిరిపై ఉంచాలి.

ఆ తర్వాత గరిటె లేదా పప్పుగుత్తి వెనుక భాగంతో అన్నం, రాగి పిండిని బాగా కలపాలి. ఉండలు లేకుండా పిండి మొత్తం అన్నంతో కలిసిపోయేలా గట్టిగా తిప్పాలి. చివరగా ఒక చెంచా నెయ్యి వేసి మూతపెట్టి మరో రెండు నిమిషాలు చిన్న మంటపై ఉంచాలి.

మిశ్రమం సిద్ధమైన తర్వాత చేతికి లేదా గిన్నెకు కొద్దిగా నీటి తడి రాసుకుని వేడివేడి రాగి మిశ్రమాన్ని తీసుకుని గుండ్రటి ముద్దలుగా చేసుకోవాలి.

వడ్డించే విధానం

వేడి రాగిముద్దను పళ్లెంలో పెట్టి మధ్యలో చిన్న గుంట చేసి కొద్దిగా నెయ్యి వేయాలి. దాని పక్కన ఘాటైన నాటుకోడి పులుసు, ఉల్లిపాయ ముక్కలు, నిమ్మచెక్క పెట్టి వడ్డిస్తే రాయలసీమ సంప్రదాయ రుచి పూర్తిగా ఆస్వాదించవచ్చు. ముక్కలు మెత్తగా, పులుసు చిక్కగా, రాగిముద్ద వెన్నలా మెత్తగా ఉండేలా ఈ విధానాన్ని పాటిస్తే ఇంట్లోనే మంచి సీమ రుచిని ఆస్వాదించవచ్చు.