గులాబీ మొక్కల సంరక్షణలో చేసే చిన్న పొరపాట్లే.. పూలు తగ్గిపోవడానికి కారణం

Rose Gardening Tips : గులాబీ పువ్వు అంటే అందం, ప్రేమ, ఆప్యాయతకు ప్రతీకగా భావిస్తారు. సువాసన, రంగురంగుల రేకులతో ప్రతి తోటకు ప్రత్యేక ఆకర్షణగా నిలిచే గులాబీలను పెంచడం చాలా కష్టమని చాలామంది భావిస్తుంటారు. అయితే సరైన సంరక్షణ, కొద్దిపాటి జాగ్రత్తలు పాటిస్తే గులాబీ మొక్కలు ఏడాది పొడవునా ఆరోగ్యంగా పెరిగి పుష్పాలతో కళకళలాడుతాయని ఉద్యాన నిపుణులు చెబుతున్నారు.

సూర్యరశ్మి తప్పనిసరి

గులాబీ మొక్కలు బాగా పెరిగి ఎక్కువ పూలు పూయాలంటే రోజుకు కనీసం ఆరు గంటల పాటు ప్రత్యక్ష సూర్యరశ్మి అందే ప్రదేశంలో నాటాలి. తగినంత వెలుతురు లేకపోతే మొక్కలు బలహీనంగా పెరగడమే కాకుండా పూల సంఖ్య కూడా తగ్గుతుంది. అలాగే తెగుళ్లు, పురుగుల సమస్యలు వచ్చే అవకాశాలు ఎక్కువగా ఉంటాయి.

నేల ఎంపిక కూడా కీలకం

గులాబీ మొక్కలకు స్వల్ప ఆమ్లత్వం (Slightly Acidic) ఉన్న, నీరు నిల్వ కాకుండా బయటకు వెళ్లే గుల్లని లోమీ నేల అనుకూలంగా ఉంటుంది. నేలలో తగినంత తేమ ఉండేలా చూసుకోవాలి. మొక్కలు నాటే ముందు నేల నాణ్యతను పరీక్షిస్తే అవసరమైన పోషకాలు, ఎరువుల గురించి అవగాహన వస్తుంది.

నీరు ఎలా పోయాలి?

ఆరోగ్యంగా పెరిగే గులాబీ మొక్కలకు వారానికి ఒకటి నుంచి రెండు అంగుళాల మేర నీరు అందేలా చూసుకోవాలి. ఆకులపై కాకుండా మొక్క వేర్ల దగ్గర నీరు పోయడం మంచిది. ఉదయం వేళల్లో నీరు పోస్తే మొక్కలు తాజాగా ఉండటంతో పాటు ఫంగస్‌ వంటి వ్యాధుల ప్రమాదం కూడా తగ్గుతుంది.

ఎరువులు సమయానికి వేయాలి

గులాబీ మొక్కలు ఎక్కువ పోషకాలు అవసరమయ్యే మొక్కలు. అందువల్ల వసంతకాలంలో గులాబీల కోసం ప్రత్యేకంగా తయారుచేసిన ఎరువులు లేదా 15-9-12 స్లో రిలీజ్‌ ఎరువులు ఉపయోగించడం మంచిది. సేంద్రియ ఎరువులు ఉపయోగిస్తే వాటిలో పోషకాలు తక్కువగా ఉండే అవకాశం ఉన్నందున తరచూ వేయాల్సి ఉంటుంది.

సరైన సంరక్షణతో పుష్పాల వర్షం

సూర్యరశ్మి, సరైన నేల, తగినంత నీరు, సమయానికి ఎరువులు అందిస్తే గులాబీ మొక్కలు ఆరోగ్యంగా పెరిగి ఎక్కువ కాలం అందమైన పుష్పాలను ఇస్తాయి. క్రమం తప్పకుండా ఎండిన కొమ్మలను తొలగించడం, మొక్కను పరిశుభ్రంగా ఉంచడం ద్వారా కూడా పుష్పాల దిగుబడి మెరుగుపడుతుంది.