Rubella Virus: రుబెల్లా వైరస్ అలర్ట్.. పిల్లల్లో ఈ లక్షణాలు ఉంటే అప్రమత్తమవ్వాల్సిందే!

Rubella Virus: జార్ఖండ్‌లోని సిమ్‌డేగా జిల్లాలో పదేళ్ల చిన్నారికి 'రుబెల్లా' (Rubella Virus) సోకినట్లు నిర్ధారణ కావడంతో వైద్య ఆరోగ్య శాఖ తీవ్ర ఆందోళన వ్యక్తం చేసింది. బాధితురాలిలో ఈ ఇన్ఫెక్షన్‌ను గుర్తించగానే అధికారులు వెంటనే రంగంలోకి దిగి, ప్రభావిత ప్రాంతాల్లో పర్యవేక్షణను తీవ్రతరం చేశారు. అలాగే మీజిల్స్-రుబెల్లా (MR) టీకాల పంపిణీ డ్రైవ్‌ను ముమ్మరం చేశారు. దీనిని సాధారణ భాషలో 'జర్మన్ మీజిల్స్' (German Measles) అని పిలుస్తారు, కానీ ఇది సాధారణ తట్టు (మీజిల్స్) కంటే భిన్నమైనది.

ముఖ్య లక్షణాలు మరియు వ్యాప్తి:

రుబెల్లా బారినపడిన వారిలో మొదట ముఖంపై ప్రారంభమై క్రమంగా శరీరమంతటా వ్యాపించే ఎర్రటి దద్దుర్లు (Rashes) కనిపించడం ప్రధాన లక్షణం. వీటితో పాటు తేలికపాటి జ్వరం, తలనొప్పి, గొంతు మంట, కళ్లు ఎర్రబడటం, మెడ లేదా చెవుల వెనుక శోషరస గ్రంథులు (Lymph nodes) వాచడం వంటి ఇతర లక్షణాలు ఉంటాయి. ఇది శ్వాసకోశ తుంపరల (Respiratory droplets) ద్వారా ఒకరి నుంచి మరొకరికి వేగంగా సోకుతుంది. వ్యాధి సోకిన దాదాపు సగం మందిలో ఎలాంటి బాహ్య లక్షణాలు కనిపించకపోయినా, వారు ఇతరులకు ఇన్ఫెక్షన్‌ను వ్యాప్తి చేయగలగడం ఆందోళన కలిగించే అంశం.

గర్భిణులకు తీవ్ర ముప్పు & నివారణ:

సాధారణ వ్యక్తులలో ఇది స్వల్ప ప్రభావం చూపినప్పటికీ, గర్భిణులకు మాత్రం అత్యంత ప్రమాదకరంగా మారుతుంది. ముఖ్యంగా గర్భధారణ తొలి మూడు నెలల్లో ఈ వైరస్ సోకితే గర్భస్రావం జరిగే ప్రమాదం ఉంది. అంతేకాకుండా పుట్టబోయే పిల్లలు వినికిడి లోపం, అంధత్వం, గుండె జబ్బులు వంటి తీవ్ర సమస్యలతో జన్మించే అవకాశాలు పెరుగుతాయి. దీనిని వైద్య పరిభాషలో 'కాంజెనిటల్ రుబెల్లా సిండ్రోమ్' (CRS) అంటారు. రుబెల్లాకు ప్రత్యేకంగా యాంటీవైరల్ మందులు లేవు కాబట్టి, ముందస్తుగా MMR లేదా MR టీకా వేయించడమే ఏకైక ఏకైక మార్గమని వైద్య నిపుణులు స్పష్టం చేస్తున్నారు.