Seagulling Dating: ప్రేమించరు.. వదలరు! లవ్ పేరుతో బంధించే సీగల్లింగ్ ట్రెండ్ ఇదే

ప్రస్తుత డేటింగ్ ప్రపంచంలో కొత్త కొత్త రిలేషన్‌షిప్ ట్రెండ్స్ తెరపైకి వస్తున్నాయి. అందులో తాజాగా చర్చనీయాంశంగా మారిన పదం “సీగల్లింగ్ డేటింగ్ (Seagulling Dating)”. ఈ ట్రెండ్‌లో ఒక వ్యక్తికి నిజమైన ప్రేమ లేకపోయినా.. ఎదుటి వ్యక్తిని తమ జీవితంలో నుంచి పూర్తిగా వెళ్లనివ్వకుండా మానసికంగా బంధించే ప్రయత్నం చేస్తారని నిపుణులు చెబుతున్నారు.

సాధారణంగా ప్రేమ అంటే ఒకరిపై ఒకరికి గౌరవం, నమ్మకం, స్వేచ్ఛ ఇవ్వడం. కానీ సీగల్లింగ్‌లో మాత్రం అవతలి వ్యక్తిపై ప్రేమ లేకపోయినా.. వారు మరొకరితో కొత్త బంధంలోకి వెళ్లకుండా అడ్డుకోవడమే ప్రధాన లక్షణంగా ఉంటుంది.

సీగల్లింగ్ అనే పేరు ఎలా వచ్చింది?

సముద్రపు పక్షులను ఇంగ్లిష్‌లో సీగల్స్ (Seagulls) అంటారు. వాటి ప్రవర్తన ఆధారంగానే ఈ పదం వచ్చిందని చెబుతున్నారు. ఆకలి లేకపోయినా.. మరో పక్షికి ఆహారం దక్కకూడదనే స్వభావంతో కొన్ని సీగల్స్ ఆహారాన్ని ఆక్రమిస్తాయి.

అదే విధంగా రిలేషన్‌షిప్‌లో కూడా కొందరు వ్యక్తులు తమకు నిజమైన ప్రేమ లేకపోయినా.. ఎదుటి వ్యక్తిని వేరొకరికి దక్కకుండా తమ దగ్గరే ఉంచుకోవాలని ప్రయత్నిస్తారు. దీన్నే సీగల్లింగ్ డేటింగ్‌గా పేర్కొంటున్నారు.

సీగల్లింగ్ చేసే వ్యక్తుల లక్షణాలు ఇవే

అప్పుడప్పుడు ప్రేమ చూపించడం:

బంధం కొనసాగేందుకు అప్పుడప్పుడు మెసేజ్‌లు చేయడం, శ్రద్ధ చూపించడం, ప్రశంసలు ఇవ్వడం చేస్తారు. దీంతో ఎదుటి వ్యక్తిలో ఆశలు కొనసాగుతాయి.

చిన్న చిన్న బహుమతులు, అప్పుడప్పుడు మాట్లాడటం వంటి వాటితో సంబంధం ఇంకా కొనసాగుతోందనే భావన కలిగిస్తారు.

ఇతర సంబంధాలకు అడ్డుపడటం:

తాము పూర్తిగా కమిట్ కాకపోయినా.. ఎదుటి వ్యక్తి జీవితంలోకి మరో వ్యక్తి రాకుండా అడ్డుకునే ప్రయత్నం చేస్తారు.

బ్రేకప్ తర్వాత కూడా వదలకపోవడం:

బంధం ముగిసిన తర్వాత కూడా పూర్తిగా దూరం కాకుండా ఉండటం వల్ల ఎదుటి వ్యక్తి కొత్త జీవితాన్ని ప్రారంభించడంలో ఇబ్బందులు ఎదుర్కొంటారు.

ఎందుకు ఇలా ప్రవర్తిస్తారు?

సైకాలజీ నిపుణుల ప్రకారం సీగల్లింగ్ వెనుక పలు కారణాలు ఉండవచ్చు.

ఎదుటి వ్యక్తిని కోల్పోవాలనే భయం

స్వార్థం, వ్యక్తిగత అవసరాలు

నియంత్రణ భావన, అహం

అసూయ, మరొకరు మంచి భాగస్వామిని పొందకూడదనే ఆలోచన

సీగల్లింగ్ వల్ల కలిగే నష్టాలు

ఇలాంటి బంధంలో ఉన్నవారు చాలా సందర్భాల్లో మానసిక ఒత్తిడికి గురవుతారు. విలువైన సమయం వృథా కావడంతో పాటు.. సంబంధంపై స్పష్టత లేకపోవడం వల్ల అయోమయం పెరుగుతుంది.

అంతేకాకుండా ఆత్మవిశ్వాసం తగ్గడం, తమ నిర్ణయాలను అనుమానించడం వంటి సమస్యలు కూడా ఎదురయ్యే అవకాశం ఉంటుంది.

సీగల్లింగ్ నుంచి ఎలా బయటపడాలి?

బంధంపై స్పష్టమైన అవగాహనకు రావాలి.

ఎదుటి వ్యక్తిని నేరుగా వారి ఉద్దేశం గురించి ప్రశ్నించాలి.

మాటల కంటే వారి ప్రవర్తనను గమనించాలి.

గౌరవం, ప్రేమ లేని బంధంలో ఎక్కువ కాలం కొనసాగకూడదు.

అవసరమైతే ధైర్యంగా ఆ సంబంధం నుంచి బయటకు రావాలి.

నిజమైన ప్రేమ ఎప్పుడూ స్వేచ్ఛను, గౌరవాన్ని ఇస్తుందని నిపుణులు సూచిస్తున్నారు. కేవలం తమ అవసరాల కోసం ఎవరినైనా భావోద్వేగంగా బంధించే సంబంధాలు ఆరోగ్యకరమైనవి కావని చెబుతున్నారు.