Sleeping Habits: దిండును మడిచి పడుకునే అలవాటు ఉందా.? ఏం జ‌రుగుతుందో తెలుసా.?

Sleeping Habits: రాత్రి హాయిగా నిద్రపోవడానికి ఒక్కొక్కరు ఒక్కో విధానాన్ని పాటిస్తుంటారు. కొందరు పలుచని దిండును ఉపయోగిస్తే.. మరికొందరు దిండును మడిచి ఎత్తుగా చేసుకుని పడుకుంటారు. ఇంకొందరు ఒక దిండు కింద మరో దిండు పెట్టుకుని నిద్రపోతుంటారు. ఇలా చేయడం వల్ల మొదట్లో సౌకర్యంగా అనిపించినా.. ఇబ్బందులు త‌ప్ప‌వ‌ని నిపుణులు చెబుతున్నారు.

మెద‌డుపై ప్ర‌భావం

దిండును మడిచి మరీ ఎత్తుగా చేసుకుని పడుకుంటే తల ముందుకు వంగినట్లుగా ఉండొచ్చు. దీనివల్ల మెడ కండరాలపై అదనపు ఒత్తిడి పడుతుంది. ఈ విధంగా ప్రతిరోజూ నిద్రపోతే ఉదయం లేచినప్పుడు మెడ బిగుసుకుపోవడం, నొప్పిగా ఉండటం వంటి ఇబ్బందులు ఎదురయ్యే అవకాశం ఉంది. కొన్నిసార్లు ఈ నొప్పి భుజాలు, పై వీపు వరకు కూడా వ్యాపించవచ్చు.

ముఖ్యంగా బోర్లా పడుకునే అలవాటు ఉన్నవారు మరింత జాగ్రత్తగా ఉండాలి. ఈ భంగిమలో మెడ ఇప్పటికే ఒకవైపు తిరిగి ఉంటుంది. దానికి తోడు ఎత్తైన దిండు ఉపయోగిస్తే మెడపై ఒత్తిడి మరింత పెరగవచ్చు. నిద్రపోయేటప్పుడు తల, మెడ శరీరంలోని మిగతా భాగాలతో సాధ్యమైనంత సహజమైన స్థితిలో ఉండేలా దిండు ఉపయోగించడం మంచిది.

నిద్ర నాణ్యత కూడా తగ్గొచ్చు

దిండు ఎత్తు సరిగ్గా లేకపోతే శరీరానికి సౌకర్యవంతమైన భంగిమ దొరకకపోవచ్చు. దీంతో రాత్రి తరచూ పక్కకు తిరగడం, మధ్యలో మెలకువ వ‌స్తుండొచ్చు. కొన్ని సందర్భాల్లో తగినంత నిద్ర ఉన్నా ఉదయం లేచినప్పుడు అలసటగా అనిపించొచ్చు. అలాగే దిండు మరీ మెత్తగా ఉండి తల అందులో ఎక్కువగా కూరుకుపోయినా మెడ సరైన స్థితిలో ఉండకపోవచ్చు. అందుకే దిండు ఎంపికలో కేవలం దాని మందం లేదా మెత్తదనాన్ని మాత్రమే చూడకూడదు. మనం ఏ విధంగా నిద్రపోతామనే విషయాన్ని కూడా పరిగణలోకి తీసుకోవాలి. అందరికీ ఒకే రకమైన దిండు సరిపోదు.

దిండును ఎలా ఉపయోగించాలి.?

పక్కకు తిరిగి పడుకునేవారు తల, మెడ మధ్య ఖాళీని సరిగ్గా భర్తీ చేసే దిండును ఎంచుకోవాలి. ఇలా చేయడం వల్ల మెడ ఒకవైపు ఎక్కువగా వంగకుండా ఉంటుంది. వీపు మీద పడుకునేవారికి సాధారణంగా మరీ ఎత్తైన దిండు అవసరం ఉండదు. తల శరీరం కంటే ఎక్కువగా పైకి లేవకుండా ఉండేలా దిండు ఎత్తు చూసుకోవాలి.

దిండును మడిచి పడుకునే అలవాటు ఉంటే ఒక్కసారిగా మార్చడం కష్టంగా అనిపించవచ్చు. అందుకే దిండు ఎత్తును క్రమంగా తగ్గించుకోవచ్చు. కొత్త దిండు ఉపయోగించిన తర్వాత కూడా మెడ లేదా భుజాల నొప్పి తరచూ వస్తుంటే నిర్లక్ష్యం చేయకుండా వైద్య నిపుణులను సంప్రదించడం మంచిది. సరైన నిద్ర భంగిమ శరీరానికి మంచి విశ్రాంతిని అందించడంలో కీలకంగా ఉంటుంది.