Snake: పాము కాటు వేస్తే.. టెన్షనొద్దు.! గంటలో ఇలా చేస్తే మీ ప్రాణాలు సేఫ్.. లేదంటే..

Snake: పాము కాటు వేసిందనే వార్త వినగానే ఎవరికైనా వెన్నులో వణుకు పుడుతుంది. మనలో చాలామందికి పాము అంటేనే చాలా భయం, అందులోనూ కాటు వేస్తే ప్రాణాలు పోతాయేమోనని కంగారు పడిపోయి తప్పుడు నిర్ణయాలు తీసుకుంటాం. కానీ, శాస్త్రీయంగా చెప్పాలంటే పాము కాటు వేసిన ప్రతిసారీ మరణం సంభవించదు. పాము కాటు వేసినప్పుడు భయం కంటే, మనం ప్రదర్శించే చురుకుదనం ప్రాణాలను కాపాడుతుంది. ముఖ్యంగా మొదటి గంటలో మనం చేసే చిన్న చిన్న పనులు ప్రాణాపాయం నుంచి మనల్ని రక్షించగలవు.

పాము కాటు వేసినప్పుడు మనం పాటించాల్సిన ప్రాథమిక జాగ్రత్తలు ఇవే:

భయం వద్దు, స్థిరంగా ఉండండి: కాటు వేసిన తర్వాత బాధితుడు కంగారుపడితే గుండె వేగం పెరుగుతుంది. దీనివల్ల రక్త ప్రసరణ వేగవంతమై, విషం శరీరంలోకి త్వరగా వ్యాపిస్తుంది. కాబట్టి, బాధితుడిని ప్రశాంతంగా ఉంచడం చాలా ముఖ్యం.

కదలికను తగ్గించండి: కాటు వేసిన భాగాన్ని కదపకుండా చూడాలి. వీలైతే ఆ భాగాన్ని కట్టు కట్టి లేదా ఒక స్ప్లింట్ సహాయంతో కదలిక లేకుండా జాగ్రత్త వహించాలి.

వెంటనే వైద్య సదుపాయం: పాము కాటుకు ఏకైక పరిష్కారం యాంటీ వెనమ్. కాబట్టి, సమయం వృథా చేయకుండా ఎంత త్వరగా వీలైతే అంత త్వరగా దగ్గరలోని ప్రభుత్వ ఆసుపత్రికి వెళ్లడం అత్యంత ముఖ్యం.

చేయకూడని తప్పులు:

చాలామంది అపోహలతో కొన్ని ప్రమాదకరమైన పనులు చేస్తుంటారు. పాము కాటు వేసిన చోట నోటితో విషాన్ని పీల్చడం, కత్తితో గాట్లు పెట్టడం, నాటు వైద్యం కోసం మంత్రగాళ్ల దగ్గరకు వెళ్లడం లాంటివి ప్రాణాలకే ప్రమాదం. ఇవి ఇన్ఫెక్షన్‌కు దారితీయడమే కాకుండా, సరైన సమయంలో మందు అందక బాధితుడిని చావు అంచు వరకు తీసుకెళ్తాయి. నిజానికి పాము కాటుకు సరైన చికిత్స ఆసుపత్రిలోనే లభిస్తుంది. కాబట్టి, మూఢనమ్మకాలను వీడి, ఆధునిక వైద్యంపై నమ్మకం ఉంచడమే నిజమైన రక్షణ.