Soha Ali Khan: సోహా అలీ ఖాన్ ప్రోటీన్ మచ్చా డ్రింక్ రెసిపీ ఇదే

Soha Ali Khan: ఫిట్‌నెస్‌కు ప్రాధాన్యత ఇచ్చే బాలీవుడ్ నటి సోహా అలీ ఖాన్ మరో సింపుల్‌ రెసిపీని అభిమానులతో పంచుకున్నారు. రెండు నిమిషాల్లోనే తయారు చేసుకోగల ప్రోటీన్ మచ్చా ప్రీ-వర్కౌట్ డ్రింక్‌ తయారీ విధానాన్ని ఆమె తన ఇన్‌స్టాగ్రామ్‌లో షేర్ చేశారు. తరచూ తన వర్కౌట్ వీడియోలను సోషల్ మీడియాలో పోస్ట్ చేసే సోహా.. రోజువారీ ఆహారంలో ప్రోటీన్‌ పరిమాణాన్ని పెంచుకునే ప్రయత్నంలో ఈ రెసిపీ తన దృష్టికి వచ్చిందని తెలిపారు.

ముఖ్యంగా శాకాహార ఆహారం తీసుకునేవారు రోజువారీ ప్రోటీన్ అవసరాలను తీర్చుకోవడానికి కొంత ముందస్తు ప్రణాళిక అవసరమవుతుందని సోహా పేర్కొన్నారు. అలాంటి వారికి ఈ తరహా రెసిపీలు ఉపయోగపడతాయని ఆమె చెప్పారు.

ఈ ప్రీ-వర్కౌట్ డ్రింక్‌లో మచ్చా ప్రధాన పదార్థం. కెఫీన్‌, ఎల్‌-థియానైన్‌, కాటెచిన్స్‌, పాలీఫెనాల్స్‌ వంటి సమ్మేళనాలు ఇందులో ఉంటాయని సోహా తన పోస్ట్‌లో వివరించారు.

ప్రోటీన్ మచ్చా డ్రింక్‌కు కావాల్సిన పదార్థాలు:

⇒ 1 టీస్పూన్ మచ్చా

⇒ 1 స్కూప్ ప్రోటీన్ పౌడర్

⇒ చల్లటి నీరు

⇒ కొద్దిగా బాదం పాలు లేదా కొబ్బరి పాలు

⇒ ఐస్ క్యూబ్స్

⇒ తీపి రుచి కోసం కొద్దిగా వెనీలా ఎసెన్స్‌, స్టీవియా

తయారీ విధానం:

ముందుగా మచ్చాను కొద్దిగా చల్లటి నీటిలో వేసి బాగా కలపాలి. మచ్చా నునుపుగా మారిన తర్వాత అందులో ప్రోటీన్ పౌడర్‌, మరికొంత నీరు వేసి బాగా షేక్ చేయాలి. మిశ్రమం కొద్దిగా నురుగు వచ్చే వరకు కలిపిన తర్వాత మిగిలిన నీరు, బాదం లేదా కొబ్బరి పాలు, ఐస్ క్యూబ్స్‌ వేసుకోవాలి. మరోసారి బాగా కలిపితే ప్రోటీన్ మచ్చా డ్రింక్‌ సిద్ధమవుతుంది.

మచ్చా అంటే తనకు మొదటి నుంచి పెద్దగా ఇష్టం లేదని చెప్పిన సోహా.. ఈ డ్రింక్ రుచి చూసిన తర్వాత మాత్రం తన అభిప్రాయం కొంత మారిందని తెలిపారు. ముఖ్యంగా చాక్లెట్‌ ఫ్లేవర్‌ ప్రోటీన్ పౌడర్‌, వెనీలా, స్టీవియా కలిపినప్పుడు రుచి తనకు నచ్చిందని చెప్పారు. ‘బహుశా మచ్చా, నేను స్నేహితులం కావచ్చేమో’ అంటూ సరదాగా వ్యాఖ్యానించారు.

అయితే ఈ డ్రింక్‌లో మచ్చా ఉండటం వల్ల కెఫీన్‌ కూడా ఉంటుందని సోహా గుర్తుచేశారు. రోజులో తీసుకునే మొత్తం కెఫీన్‌ పరిమాణంపై జాగ్రత్తగా ఉండాలని సూచించారు. ముఖ్యంగా కెఫీన్‌ పట్ల సున్నితత్వం ఉన్నవారు లేదా రాత్రి సమయంలో తీసుకునేవారు మరింత జాగ్రత్త వహించాలని తెలిపారు. గర్భిణులు, పాలిచ్చే తల్లులు, ఆరోగ్య సమస్యలు ఉన్నవారు లేదా క్రమం తప్పకుండా మందులు వాడుతున్నవారు కెఫీన్‌ తీసుకునే విషయంలో వైద్యుల సలహా తీసుకోవాలని సూచించారు.

ఈ రెసిపీని కేవలం తన వ్యక్తిగత అనుభవంగా మాత్రమే పంచుకుంటున్నానని, దీనిని వైద్యపరమైన లేదా ఆరోగ్య సలహాగా భావించవద్దని సోహా స్పష్టం చేశారు.