తాతల కాలం నాటి ఫుడ్ అని తీసిపారేసేరు.. పొద్దుగాల ఒక్కటి తిని చూడండి.. తస్సాదియ్యా..!

Dibba Rotti Recipe: ఉదయాన్నే లేవగానే ఏం టిఫిన్ చేయాలా అని ఆలోచిస్తున్నారా? రోజువారీ ఇడ్లీ, దోసలు తిని బోర్ కొట్టిందా? అయితే ఆంధ్రా, ముఖ్యంగా గోదావరి జిల్లాల సంప్రదాయ వంటకమైన 'దిబ్బ రొట్టె'ను ఒకసారి ప్రయత్నించండి. పైన కరకరలాడుతూ, లోపల దూదిలా మెత్తగా ఉండే ఈ వంటకం పాతకాలపు అద్భుతమైన రుచులను గుర్తుచేస్తుంది. నోరూరించే రోటి టమాటా పచ్చడితో లేదా తీపి ఇష్టపడేవారు చెరుకు పానకంతో దీనిని ఆస్వాదించవచ్చు. ఈ దిబ్బ రొట్టెను ఎలా తయారు చేసుకోవాలో ఇప్పుడు చూద్దాం..

కావాల్సిన పదార్థాలు..

అచ్చమైన పల్లెటూరి రుచిని పొందడానికి పొట్టు మినప్పప్పును ఉపయోగించడం చాలా ఉత్తమం.

పొట్టు మినప్పప్పు: అర కిలో

బియ్యం రవ్వ: 700 గ్రాములు

అల్లం ముక్క, పచ్చిమిర్చి, జీలకర్ర: తగినంత (కచ్చాపచ్చాగా దంచుకోవడానికి)

నూనె: వంటకు సరిపడా

ఉప్పు: రుచికి తగినంత

పిండి తయారీ విధానం..

మొదటగా అర కిలో పొట్టు మినప్పప్పును, బియ్యం రవ్వను విడివిడిగా కనీసం నాలుగు గంటల పాటు నీళ్లలో బాగా నానబెట్టుకోవాలి. నానిన మినప్పప్పును పొట్టు పూర్తిగా పోకుండా రెండు సార్లు లైట్‌గా కడిగి, రుబ్బుడు బండపై లేదా గ్రైండర్‌లో కాస్త గట్టిగా, మెత్తగా రుబ్బి పక్కన పెట్టుకోవాలి. ఆ తర్వాత, నానిన బియ్యం రవ్వలోని నీటిని అస్సలు లేకుండా గట్టిగా పిండేసి, ఈ మినప పిండిలో కలపాలి. ఇందులోనే కచ్చాపచ్చాగా దంచిన అల్లం, పచ్చిమిర్చి, జీలకర్ర ముద్దను, సరిపడా ఉప్పును వేసి పిండిని బాగా కలుపుకోవాలి.

ప్రత్యేకమైన టమాటా రోటి పచ్చడి..

దిబ్బ రొట్టెలోకి నంజుకోవడానికి అద్భుతమైన కాంబినేషన్ టమాటా పచ్చడి. దీనికోసం అర కిలో టమాటాలు, ఒక ఉల్లిపాయ, పచ్చిమిర్చి, వెల్లుల్లి రేకలు, కొద్దిగా చింతపండు, కరివేపాకు, కొత్తిమీర సిద్ధం చేసుకోవాలి. ఒక పాత్రలో రెండు చెంచాల నూనె వేసి జీలకర్ర, పచ్చిమిర్చి వేయించిన తర్వాత, కోసిన టమాటా, ఉల్లిపాయ ముక్కలు, పసుపు, ఉప్పు వేసి బాగా మగ్గనివ్వాలి. ఈ మిశ్రమం చల్లారిన తర్వాత రోట్లో వేసి కమ్మని పచ్చడిగా రుబ్బి పక్కన పెట్టుకోవాలి.

దిబ్బ రొట్టె కాల్చే వినూత్న పద్ధతి..

ఇప్పుడు స్టవ్ మీద ఒక మందపాటి కడాయి పెట్టుకుని మూడు చెంచాల నూనె వేయాలి. నూనె కాస్త వేడెక్కగానే నాలుగు గరిటల పిండిని కడాయి మధ్యలో వేసి సమానంగా పరచాలి. ఇక్కడే ఒక చిన్న చిట్కా ఉంది. ఒక చిన్న గ్లాసులో సగం వరకు నీళ్లు పోసి, ఆ గ్లాసును పిండి మధ్యలో అడుగుకు తగలకుండా నిటారుగా ఉంచాలి. దీనివల్ల లోపల ఆవిరి తయారై రొట్టె లోపలి భాగం కూడా చక్కగా ఉడుకుతుంది. మంటను పూర్తిగా సిమ్ లో పెట్టి మూత పెట్టి 20 నిమిషాల పాటు కాల్చాలి. చుట్టూ గోధుమ రంగులోకి రాగానే మెల్లగా గ్లాస్ తీసి, రొట్టెను రెండో వైపు తిప్పి మరో ఏడు నుంచి ఎనిమిది నిమిషాలు కాలిస్తే వేడివేడి, కరకరలాడే దిబ్బరొట్టె సిద్ధం..!

బయట పొర క్రిస్పీగా, లోపలి భాగం ఎంతో సాఫ్ట్‌గా ఉండే ఈ దిబ్బ రొట్టెను ముక్కలుగా కోసి, కారంగా ఉండే టమాటా పచ్చడితో ముంచుకుని తింటుంటే వచ్చే తృప్తే వేరు. ఇది కేవలం కడుపు నింపే టిఫిన్ మాత్రమే కాదు, మన పాతకాలపు ఆరోగ్యకరమైన ఆహార సంస్కృతికి ప్రతీక. ఈ వీకెండ్‌లో మీ ఇంట్లో కూడా ఈ ప్రత్యేక వంటకాన్ని ప్రయత్నించి, మీ కుటుంబ సభ్యులకు పల్లెటూరి రుచులను పరిచయం చేయండి!