తల్లిపాలతో బిడ్డకే కాదు.. తల్లి ఆరోగ్యానికీ ఎన్నో లాభాలు. వైద్యులు చెప్పిన ఆస‌క్తిక‌ర విష‌యాలు

World Breastfeeding Week: ప్రపంచ తల్లిపాల వారోత్సవం (ఆగస్టు 1–7) సందర్భంగా వైద్య నిపుణులు తల్లిపాల ప్రాముఖ్యతను మరోసారి గుర్తు చేస్తున్నారు. తల్లిపాలు కేవలం శిశువుకు ఆహారం మాత్రమే కాదని, జీవితాంతం ఆరోగ్యానికి బలమైన పునాది వేస్తాయని చెబుతున్నారు. అలాగే తల్లిపాలు ఇవ్వడం వల్ల బిడ్డతో పాటు తల్లికి కూడా అనేక ఆరోగ్య ప్రయోజనాలు ఉంటాయని వివరిస్తున్నారు.

తల్లిపాలు బిడ్డకు తొలి టీకా లాంటివి

వైద్యుల ప్రకారం తల్లిపాలను "ప్రకృతి ప్రసాదించిన తొలి టీకా"గా చెప్పవచ్చు. పుట్టిన బిడ్డ ఎదుగుదలకు అవసరమైన ప్రోటీన్లు, కొవ్వులు, కార్బోహైడ్రేట్లు, విటమిన్లు, ఖనిజాలు, నీరు వంటి అన్ని పోషకాలు సరైన మోతాదులో తల్లిపాలలోనే ఉంటాయి. ముఖ్యంగా పుట్టిన తొలి ఆరు నెలల వరకు తల్లిపాలు మాత్రమే ఇవ్వడం వల్ల శిశువుకు అవసరమైన సంపూర్ణ పోషకాహారం అందుతుంది. అంతేకాదు, బిడ్డ ఎదుగుదలకు అనుగుణంగా తల్లిపాల పోషక విలువలు కూడా సహజంగానే మారుతూ ఉండటం దీని ప్రత్యేకత.

పుట్టిన వెంటనే వచ్చే పసుపు రంగు పాలు ఎంతో విలువైనవి

బిడ్డ పుట్టిన వెంటనే తల్లికి వచ్చే చిక్కటి పసుపు రంగు పాలను కొలస్ట్రం (Colostrum) అంటారు. ఇది శిశువుకు అత్యంత విలువైన ఆహారంగా వైద్యులు పేర్కొంటున్నారు. ఇందులో యాంటీబాడీలు, రోగనిరోధక శక్తిని పెంచే ప్రత్యేక పదార్థాలు అధికంగా ఉంటాయి. ఇవి శిశువును డయేరియా, శ్వాసకోశ ఇన్ఫెక్షన్లు, చెవి ఇన్ఫెక్షన్లు వంటి అనేక వ్యాధుల నుంచి రక్షించడంలో కీలక పాత్ర పోషిస్తాయి. అలాగే శిశువు పేగుల్లో ఆరోగ్యకరమైన సూక్ష్మజీవుల పెరుగుదలకు కూడా తల్లిపాలు దోహదపడతాయి.

తల్లిపాలు బిడ్డకే కాదు.. తల్లి ఆరోగ్యానికీ మేలు చేస్తాయి

తల్లిపాలు ఇవ్వడం వల్ల ప్రయోజనాలు కేవలం బిడ్డకే పరిమితం కావు. తల్లిపాలు ఇస్తున్న సమయంలో శరీరంలో ఆక్సిటోసిన్ అనే హార్మోన్ విడుదల అవుతుంది. ఇది ప్రసవం తర్వాత గర్భాశయం త్వరగా సాధారణ స్థితికి చేరేందుకు, అధిక రక్తస్రావం తగ్గేందుకు సహాయపడుతుంది.

అలాగే తల్లిపాలు ఇచ్చే మహిళల్లో భవిష్యత్తులో రొమ్ము క్యాన్సర్, అండాశయ క్యాన్సర్, టైప్-2 మధుమేహం, అధిక రక్తపోటు వంటి సమస్యలు వచ్చే ప్రమాదం కొంత మేర తగ్గుతుందని వైద్యులు చెబుతున్నారు. మరోవైపు తల్లిపాలు తాగిన పిల్లల్లో ఊబకాయం, టైప్-2 మధుమేహం వంటి సమస్యల ప్రమాదం కూడా తక్కువగా ఉండే అవకాశం ఉందని అధ్యయనాలు సూచిస్తున్నాయి. అంతేకాకుండా మెదడు అభివృద్ధికి కూడా తల్లిపాలు ఎంతో ఉపయోగపడతాయి.

కొత్త తల్లులకు విమర్శలు కాదు.. కుటుంబం అండగా ఉండాలి

చాలా మంది మొదటిసారి తల్లులైన మహిళలు "నా పాలు బిడ్డకు సరిపోతున్నాయా?", "బిడ్డ సరిగ్గా పాలు తాగుతున్నాడా?" వంటి సందేహాలతో ఆందోళన చెందుతుంటారు. ఇలాంటి సమయంలో వారిని విమ‌ర్శించ‌డం లేదా అనవసర సలహాలు ఇవ్వడం కంటే మానసికంగా ధైర్యం చెప్పడం చాలా అవసరమని వైద్యులు సూచిస్తున్నారు. ఒత్తిడి, ఆందోళన వల్ల తల్లిపాల ఉత్పత్తిపై కూడా ప్రభావం పడే అవకాశం ఉంటుంది.

అందుకే కుటుంబ సభ్యులు ఇంటి పనుల్లో సహాయం చేయడం, తల్లికి తగిన విశ్రాంతి కల్పించడం, పోషకాహారం అందించడం, ప్రశాంతమైన వాతావరణాన్ని కల్పించడం ఎంతో ముఖ్యం. తల్లిపాలు ఇవ్వడం కేవలం తల్లి బాధ్యత మాత్రమే కాదని, కుటుంబ సభ్యులు, వైద్యులు, కార్యాలయాలు కలిసి సహకరిస్తేనే తల్లి, బిడ్డ ఇద్దరూ దీని పూర్తి ప్రయోజనాలను పొందగలరని నిపుణులు సూచిస్తున్నారు.