Kothakota: కొత్తకోటలో శ్రీ అన్నపూర్ణాదేవి అలంకారంలో అంబ భవాని అమ్మవారు

Kothakota: పట్టణంలోని శ్రీ భవానీ శంకర దేవాలయంలో నిర్వహిస్తున్న దేవి శరన్నవరాత్రి ఉత్సవాలు భక్తిశ్రద్ధలతో వైభవంగా కొనసాగుతున్నాయి. ఉత్సవాల్లో భాగంగా మూడో రోజు మంగళవారం శ్రీ అంబ భవాని అమ్మవారు శ్రీ అన్నపూర్ణాదేవి అలంకారంలో భక్తులకు దర్శనమిచ్చారు.

ఈ సందర్భంగా ఉదయం అమ్మవారికి ప్రత్యేక పంచామృతాలతో అభిషేకం నిర్వహించి, అనంతరం వివిధ పుష్పాలతో అన్నపూర్ణాదేవిగా విశేషంగా అలంకరించారు. ఉదయం నుంచే ఆలయానికి భక్తులు పెద్ద సంఖ్యలో తరలివచ్చి అమ్మవారిని దర్శించుకున్నారు.

అనంతరం ఆలయంలో ప్రత్యేక పూజా కార్యక్రమాలు, కుంకుమార్చనలు, లలితా సహస్రనామ పారాయణం నిర్వహించారు. అమ్మవారి దర్శనంతో ఆలయం భక్తిపారవశ్యంలో మునిగిపోయింది.