Road Accident : మహబూబ్‌నగర్‌లో ఘోర ప్రమాదం.. కారును ఢీకొన్న స్పోర్ట్స్ బైక్.. ఐదుగురు మృతి

Road Accident : మహబూబ్‌నగర్ జిల్లాలో సోమవారం ఉదయం పెను విషాదం చోటుచేసుకుంది. పాలకొండ చౌరస్తా వద్ద జరిగిన భయంకరమైన రోడ్డు ప్రమాదంలో ఐదుగురు ప్రాణాలు కోల్పోయారు. అతివేగమే ఈ ప్రమాదానికి ప్రధాన కారణమని తెలుస్తోంది. ఒక స్పోర్ట్స్ బైక్, కారు బలంగా ఢీకొనడంతో ఈ ఘోరం జరిగింది. మృతుల్లో ఇద్దరు పసికందులు ఉండటం స్థానికులను తీవ్రంగా కలచివేస్తోంది.

అతివేగమే కొంపముంచిందా?

స్థానికులు, పోలీసులు తెలిపిన వివరాల ప్రకారం.. పాలకొండ చౌరస్తా సమీపంలో ఒక కారు యూటర్న్ తీసుకుంటోంది. అదే సమయంలో వాయువేగంతో దూసుకొచ్చిన ఒక స్పోర్ట్స్ బైక్, అదుపుతప్పి నేరుగా కారును బలంగా ఢీకొట్టింది. బైక్ వేగం ఎంత ఎక్కువగా ఉందంటే, ఢీకొన్న ధాటికి కారు తునకలైపోయింది. ఈ ప్రమాదంలో బైక్ మీద ఉన్న వారితో పాటు కారులో ఉన్న వ్యక్తులు కూడా తీవ్రంగా గాయపడి అక్కడికక్కడే మరణించారు.

చెల్లాచెదురుగా మృతదేహాలు

ప్రమాదం జరిగిన తీరు చూస్తుంటే ఒళ్లు గగుర్పు పొడుస్తోంది. బైక్ బలంగా తగలడంతో కారు బోల్తా పడి పూర్తిగా నలిగిపోయింది. మృతదేహాలు రోడ్డుపై చెల్లాచెదురుగా పడిపోవడంతో ఆ ప్రాంతమంతా రక్తసిక్తమైంది. మృతుల్లో ఇద్దరు చిన్నారులు ఉండటంతో ఘటనా స్థలంలో బాధితుల బంధువుల ఆర్తనాదాలు మిన్నంటాయి. స్థానికులు వెంటనే పోలీసులకు సమాచారం అందించారు.

పోలీసుల దర్యాప్తు..

సమాచారం అందుకున్న వెంటనే మహబూబ్‌నగర్ పోలీసులు ఘటనా స్థలానికి చేరుకుని మృతదేహాలను పోస్టుమార్టం నిమిత్తం జిల్లా ఆసుపత్రికి తరలించారు. మృతులు ఎవరు? వారు ఎక్కడి నుండి వస్తున్నారు? అనే వివరాలపై పోలీసులు ఆరా తీస్తున్నారు. అతివేగం వల్లే ఈ ప్రమాదం జరిగిందని ప్రాథమికంగా నిర్ధారించారు. కేసు నమోదు చేసుకుని దర్యాప్తు ముమ్మరం చేశారు.