Narayanpet: వైద్య వృత్తిలో కరుణ, మానవత్వం కీలకం నారాయణపేట కలెక్టర్ ప్రియాంక

నారాయణపేట: నారాయణపేట మండలంలోని అప్పక్‌పల్లి వద్ద గల ప్రభుత్వ జనరల్ జిల్లా ఆస్పత్రిలో శుక్రవారం ఎంబీబీఎస్ మూడో బ్యాచ్ విద్యార్థుల కోసం ఓరియంటేషన్ డే, వైట్ కోట్ సెర్మనీ కార్యక్రమాన్ని నిర్వహించారు. ఈ కార్యక్రమానికి జిల్లా కలెక్టర్ ప్రియాంక ముఖ్య అతిథిగా హాజరై వైద్య విద్యార్థులను ఉద్దేశించి మాట్లాడారు.

ఈ సందర్భంగా జిల్లా కలెక్టర్ మాట్లాడుతూ.. వైద్య విద్యలో ప్రవేశం పొందడం విద్యార్థులతో పాటు వారి తల్లిదండ్రుల కృషి, పట్టుదల, ఎన్నో రోజుల శ్రమకు ఫలితమని పేర్కొన్నారు. వైద్య విద్యలో సీటు సాధించేందుకు విద్యార్థులు ఎంతో కష్టపడి చదివారని, తల్లిదండ్రులు కూడా అనేక ఒత్తిళ్లను ఎదుర్కొంటూ తమ పిల్లల భవిష్యత్తు కోసం కృషి చేశారని అన్నారు. వైద్యులుగా మారే దిశగా ప్రయాణం ప్రారంభించిన విద్యార్థులందరికీ శుభాకాంక్షలు తెలిపారు.

నారాయణపేట ప్రభుత్వ వైద్య కళాశాలలో విద్యార్థులకు వైద్య సేవలను ప్రత్యక్షంగా నేర్చుకునేందుకు మంచి అవకాశాలు ఉన్నాయని, ఆస్పత్రికి వచ్చే వివిధ రకాల కేసుల ద్వారా విస్తృతమైన అనుభవం పొందవచ్చని తెలిపారు. కళాశాలలో అనుభవజ్ఞులైన అధ్యాపకులు అందుబాటులో ఉన్నారని, విద్యార్థులు ఈ అవకాశాలను సద్వినియోగం చేసుకొని నైపుణ్యం కలిగిన వైద్యులుగా ఎదగాలని సూచించారు.

వైద్య వృత్తిలో కరుణ, మానవత్వం అత్యంత కీలకమని కలెక్టర్ పునరుద్ఘాటించారు. ప్రతి రోగిని గౌరవంతో, ఓర్పుతో, బాధ్యతాయుతంగా చూడాలని, వైద్యం కోసం ఆస్పత్రికి వచ్చే వ్యక్తి అనేక బాధలు, ఇబ్బందులతో సతమతమవుతూ ఉంటారని గుర్తుంచుకోవాలని అన్నారు. రోగులకు చికిత్స అందించడమే కాకుండా, వారికి ధైర్యం కల్పించి, మానవీయంగా వ్యవహరించడం కూడా వైద్యుల బాధ్యత అని పేర్కొన్నారు. సమాజం వైద్యులను ఎంతో నమ్మకంతో చూస్తుందని, ఆ నమ్మకాన్ని నిలబెట్టుకునేలా ప్రతి వైద్యుడు తన వృత్తిని అంకితభావంతో నిర్వహించాలని సూచించారు.

వైద్య విద్య అనేది ఎంబీబీఎస్ డిగ్రీతో ముగిసిపోయేది కాదని, జీవితాంతం నేర్చుకుంటూ ఉండాల్సిన నిరంతర ప్రక్రియ అని కలెక్టర్ తెలిపారు. వైద్యరంగంలో నూతన సాంకేతిక పరిజ్ఞానం, ఆధునిక చికిత్సా విధానాలు, పరిశోధనలు నిరంతరం అభివృద్ధి చెందుతున్నందున వైద్యులు తమ జ్ఞానాన్ని ఎప్పటికప్పుడు నవీకరించుకోవాలని సూచించారు. నేర్చుకోవడం, అవసరమైనప్పుడు పాత పద్ధతులను విడనాడటం, కొత్త విషయాలను మళ్లీ నేర్చుకోవడం ద్వారా వృత్తిపరమైన నైపుణ్యాన్ని పెంపొందించుకోవాలని చెప్పారు.

నారాయణపేట జిల్లాలో పనిచేయడం, ఇక్కడి ప్రజలకు సేవలందించడం ఒక మంచి అవకాశమని కలెక్టర్ పేర్కొన్నారు. జిల్లాలోని ప్రజలు, ముఖ్యంగా ఆర్థికంగా వెనుకబడిన వర్గాలకు చెందిన వారు మెరుగైన వైద్య సేవల కోసం ప్రభుత్వ ఆస్పత్రులపై ఆధారపడతారని తెలిపారు.

కళాశాల అభివృద్ధికి, విద్యార్థులకు అవసరమైన సదుపాయాల కల్పనకు జిల్లా యంత్రాంగం తరఫున సహకారం అందిస్తామని కలెక్టర్ తెలిపారు. కళాశాల ప్రిన్సిపాల్, వైస్ ప్రిన్సిపాల్, విభాగాధిపతులు విద్యార్థులకు అవసరమైన మార్గదర్శకత్వం అందించాలని కోరారు.చివరిగా, వైద్య విద్యను అభ్యసిస్తున్న విద్యార్థులందరూ క్రమశిక్షణ, కరుణ, సేవాభావం, నిరంతర అధ్యయనాన్ని అలవర్చుకొని సమాజానికి ఆదర్శవంతమైన వైద్యులుగా ఎదగాలని ఆకాంక్షిస్తూ కలెక్టర్ వారికి శుభాకాంక్షలు తెలిపారు.

ఈ కార్యక్రమంలో మెడికల్ కళాశాల ప్రిన్సిపల్/ జిల్లా ఆస్పత్రి సూపరింటెండెంట్ డాక్టర్ సంపత్ కుమార్, డిప్యూటీ సూపరింటెండెంట్ ఆదిత్య గౌడ్, ఆర్ ఎం వో బాలాజీ సింగాడే, మెడికల్ కళాశాల కు చెందిన అన్ని విభాగాల అధిపతులు,తదితరులు పాల్గొన్నారు.