Achampet: అచ్చంపేటలో రక్తదాన శిబిరానికి విశేష స్పందన

అచ్చంపేట: అచ్చంపేట, పోలీస్ అమరవీరుల వారోత్సవాల్లో భాగంగా అచ్చంపేట పోలీస్ శాఖ, లైన్స్ క్లబ్ సంయుక్త ఆధ్వర్యంలో మంగళవారం పోలీస్ స్టేషన్ ఆవరణలో భారీ రక్తదాన శిబిరాన్ని నిర్వహించారు. ఈ శిబిరానికి యువకుల నుండి విశేష స్పందన లభించింది.

ఎమ్మెల్యే వంశీకృష్ణ హాజరు:

ఈ కార్యక్రమానికి ముఖ్య అతిథులుగా అచ్చంపేట ఎమ్మెల్యే డాక్టర్ చిక్కుడు వంశీకృష్ణ, నాగర్ కర్నూల్ జిల్లా అదనపు ఎస్పీ వెంకటేశ్వర్లు హాజరయ్యారు. ముందుగా అమరవీరులైన పోలీసులకు నివాళులర్పించి, ఆ తరువాత రక్తదాన శిబిరాన్ని ప్రారంభించారు.

32 సార్లు రక్తదానం చేశానన్న ఎమ్మెల్యే:

ఈ సందర్భంగా ఎమ్మెల్యే డాక్టర్ వంశీకృష్ణ మాట్లాడుతూ.. దేశ రక్షణ, శాంతిభద్రతల పరిరక్షణ కోసం ప్రాణాలర్పించిన పోలీస్ అమరవీరుల త్యాగాలు మరువలేనివని అన్నారు. వారి సేవలను స్మరించుకోవడం మనందరి బాధ్యత అన్నారు. ప్రతి ఒక్కరూ రక్తదానం చేయడానికి ముందుకు రావాలని పిలుపునిచ్చారు.

నేను ఇప్పటివరకు 32 సార్లు రక్తదానం చేశాను. రక్తదానం చేయడం వల్ల ఎలాంటి నీరసం రాదు. ప్రతి మనిషి శరీరంలో దాదాపు 5 లీటర్ల రక్తం ఉంటుంది. అందులో కేవలం 300 గ్రాములు (ఒక యూనిట్) దానం చేయడం వల్ల పాత రక్తం పోయి, కొత్త రక్తం ఉత్పత్తి అవుతుంది. ఇది ఆరోగ్యానికి ఎంతో మేలు చేస్తుంది. రక్తదానం ప్రాణదానంతో సమానం" అని ఎమ్మెల్యే తెలిపారు.

100 మంది యువకుల రక్తదానం:

ఈ శిబిరంలో లైన్స్ క్లబ్ సభ్యులతో పాటు సుమారు 100 మంది యువకులు స్వచ్ఛందంగా ముందుకు వచ్చి రక్తదానం చేశారు. రక్తదాతలకు నిర్వాహకులు సర్టిఫికెట్లు అందజేశారు. యువతలో ఉన్న ఈ సేవా భావం అభినందనీయమని, ఇదే స్ఫూర్తితో ముందుకు సాగాలని అదనపు ఎస్పీ వెంకటేశ్వర్లు కొనియాడారు.

పాల్గొన్న అధికారులు:

ఈ కార్యక్రమంలో అచ్చంపేట డీఎస్పీ పల్లె శ్రీనివాస్, సీఐ నాగరాజు, ఎస్ఐలు మహేష్, రాజశేఖర్, చంద్రకాంత్, రాజేందర్, నరేష్, లైన్స్ క్లబ్ అధ్యక్షులు, సభ్యులు, పోలీస్ సిబ్బంది, పెద్ద సంఖ్యలో యువకులు పాల్గొన్నారు.