Veldanda: గణేష్ ఉత్సవాలపై సీఐ కీలక సూచనలు - డీజేలకు అనుమతి లేదు

వెల్దండ: గణేష్ ఉత్సవాలను భక్తిశ్రద్ధలతో, ప్రశాంత వాతావరణంలో నిర్వహించాలని వెల్దండ సర్కిల్ ఇన్‌స్పెక్టర్ సూచించారు. ఉన్నతాధికారుల ఆదేశాల మేరకు డీజే సౌండ్‌కు అనుమతి లేదని, మండపాల వద్ద లౌడ్‌స్పీకర్లను అనుమతించిన శబ్ద పరిమితిలోనే వినియోగించాలని తెలిపారు.

మండపాల్లో విద్యుత్ వైరింగ్‌ను సురక్షితంగా ఏర్పాటు చేసి, అగ్నిమాపక భద్రతా చర్యలు చేపట్టాలని సూచించారు. మద్యం సేవించి ఉత్సవాల్లో పాల్గొనడం, గొడవలు చేయడం, అసభ్యకర పాటలు, రెచ్చగొట్టే నినాదాలు చేయరాదన్నారు. ఇతర మతాలు, వర్గాల మనోభావాలను దెబ్బతీసే బ్యానర్లు, పోస్టర్లు, నినాదాలకు తావివ్వకూడదని స్పష్టం చేశారు.

మైనర్లను వాహనాలు నడపనివ్వకూడదని, ఊరేగింపులో వాహనాలపై ప్రమాదకరంగా ప్రయాణించరాదన్నారు. నిమజ్జనం సమయంలో చిన్నపిల్లలు, ఈత రాని వ్యక్తులు నీటిలోకి వెళ్లకుండా తల్లిదండ్రులు, నిర్వాహకులు జాగ్రత్తలు తీసుకోవాలని సూచించారు.

అనుమానాస్పద వ్యక్తులు, వస్తువులు కనిపిస్తే వెంటనే పోలీసులకు సమాచారం ఇవ్వాలని, సోషల్ మీడియాలో తప్పుడు వార్తలు, వదంతులు, రెచ్చగొట్టే పోస్టులను ప్రచారం చేయడం లేదా ఫార్వర్డ్ చేయడం చేయరాదన్నారు. భక్తితో ఉత్సవాలు నిర్వహిస్తూ శాంతి, సామరస్యాలు, భద్రతను కాపాడాలని వెల్దండ సీఐ కోరారు.