Mancherial: మంచిర్యాలలో పంటల కొనుగోలుకు పూర్తి సహకారం అందించాలి కలెక్టర్!

Mancherial: జిల్లాలో పత్తి, వరి తదితర పంటల కొనుగోలు ప్రక్రియ సజావుగా సాగేందుకు లారీ యజమానులు, జిల్లా లారీ అసోసియేషన్ ప్రతినిధులు పూర్తిస్థాయిలో సహకరించాలని జిల్లా కలెక్టర్ కుమార్ దీపక్ కోరారు. రైతులకు ఎలాంటి ఇబ్బందులు కలగకుండా పంటల కొనుగోలు, రవాణా ప్రక్రియ నిరంతరాయంగా కొనసాగాలని స్పష్టం చేశారు.

ఈ మేరకు శుక్రవారం విడుదల చేసిన ప్రకటనలో కలెక్టర్ మాట్లాడుతూ.. కొనుగోలు కేంద్రాల వద్ద అవసరమైన సమయంలో లారీలను అందుబాటులో ఉంచాలని, పంటలను సకాలంలో గమ్యస్థానాలకు తరలించేందుకు తగిన రవాణా సదుపాయాలు కల్పించాలని సూచించారు. పంటల కొనుగోలు ప్రక్రియకు ఎలాంటి ఆటంకాలు కలిగించరాదని తెలిపారు.

రైతుల ప్రయోజనాలను దృష్టిలో ఉంచుకొని లారీ యజమానులు బాధ్యతాయుతంగా వ్యవహరించాలని పేర్కొన్నారు. కొనుగోలు, రవాణా ప్రక్రియకు ఆటంకాలు కలిగించిన వారిపై చట్టప్రకారం చర్యలు తీసుకోవడంతో పాటు, లైసెన్సులు, వాహన రిజిస్ట్రేషన్ల రద్దుకు చర్యలు చేపడతామని హెచ్చరించారు.

పంటల తరలింపునకు అవసరమైన రవాణా సదుపాయాలు కల్పించేందుకు అవసరాన్ని బట్టి ఇతర ప్రాంతాల నుంచి కూడా లారీలను జిల్లాలోకి అనుమతిస్తామని కలెక్టర్ వెల్లడించారు. జిల్లా లారీ అసోసియేషన్ ప్రతినిధులు, లారీ యజమానులు జిల్లా యంత్రాంగానికి సహకరించి, పంటల కొనుగోళ్లు సజావుగా జరిగేలా చూడాలని ఆయన కోరారు