Dandepalli: గుడిరేవులో పద్మల్‌పురి కాకో జాతర వైభవం.. కిక్కిరిసిన గోదావరి తీరం!

మంచిర్యాల జిల్లా, దండేపల్లి: ఆదివాసీల ఆధ్యాత్మిక విశ్వాసాలు, సంస్కృతి సంప్రదాయాలకు ప్రతీకగా నిలిచే గుడిరేవు శ్రీ పద్మల్‌పురి కాకో ఆలయంలో దీపావళి జాతర ఉత్సవాలు వైభవంగా కొనసాగుతున్నాయి. గోదావరి నది తీరాన వెలసిన ఈ పురాతన ఆలయానికి భక్తులు భారీగా తరలివస్తుండటంతో జాతర ప్రాంగణం సందడిగా మారింది.

తెలంగాణలోని వివిధ జిల్లాలతో పాటు మహారాష్ట్ర, ఛత్తీస్‌గఢ్ రాష్ట్రాల నుంచి వేలాదిగా ఆదివాసీ గిరిజనులు తరలివచ్చి తమ ఆరాధ్య దైవమైన పద్మల్‌పురి కాకో అమ్మవారిని దర్శించుకుంటున్నారు. ప్రత్యేక పూజలు నిర్వహించి మొక్కులు చెల్లించుకుంటున్నారు. తరతరాలుగా వస్తున్న సంప్రదాయం ప్రకారం దీపావళి సమయంలో ఇక్కడికి చేరుకుని 12 రోజుల పాటు ప్రత్యేక పూజలు నిర్వహించడం ఆనవాయితీగా కొనసాగుతోంది.

గిరిజన సంస్కృతికి అద్దం పట్టే గుస్సాడి నృత్యాలు

జాతరలో ఆదివాసీ సంప్రదాయ గుస్సాడి నృత్యాలు ప్రత్యేక ఆకర్షణగా నిలుస్తున్నాయి. సంప్రదాయ వేషధారణ, నెమలి పించాలతో అలంకరించిన టోపీలు ధరించి డప్పుల దరువులకు అనుగుణంగా కళాకారులు చేస్తున్న నృత్యాలు భక్తులను ఆకట్టుకుంటున్నాయి. దీంతో గోదావరి తీరం ఆధ్యాత్మిక శోభతో పాటు గిరిజన కళాసంపదతో కళకళలాడుతోంది.

అమ్మవారిని దర్శించుకున్న ప్రముఖులు

జాతర ఉత్సవాల్లో ఎమ్మెల్యే వెడ్మ బొజ్జు, తెలంగాణ గిరిజన సహకార సంస్థ చైర్మన్ కోట్నాక తిరుపతి, ఎంపీ గెడం నాగేష్, డీసీసీ మాజీ అధ్యక్షురాలు కొక్కిరాల సురేఖ, మాజీ ఎంపీ సోయం బాపూరావు తదితర ప్రముఖులు పాల్గొని అమ్మవారిని దర్శించుకుని ప్రత్యేక పూజలు నిర్వహించారు. ఆదివాసీల విశిష్ట సంస్కృతి, సంప్రదాయాలను భావితరాలకు అందించడంలో ఇలాంటి జాతరలు కీలక పాత్ర పోషిస్తాయని వారు పేర్కొన్నారు.

భక్తులకు ఎలాంటి ఇబ్బందులు కలగకుండా జాతర నిర్వాహకులు, అధికారులు ఏర్పాట్లు చేపట్టారు. భక్తుల రాకతో గుడిరేవు పద్మల్‌పురి కాకో ఆలయ పరిసరాలు ఆధ్యాత్మిక సందడితో నిండిపోయాయి.