Mancherial: మంచిర్యాలలో పేకాట స్థావరంపై దాడి: నలుగురు అరెస్ట్!

మంచిర్యాల: మంచిర్యాల పట్టణంలో డబ్బులు పందెంగా పెట్టి పేకాట ఆడుతున్నారనే సమాచారంతో పోలీసులు దాడి నిర్వహించి నలుగురిని అదుపులోకి తీసుకున్నారు. ఈ ఘటన పట్టణంలోని కాలేజ్ రోడ్డులో ఉన్న హరినిలయ విల్లాస్‌లో బుధవారం సాయంత్రం చోటుచేసుకుంది.

విశ్వసనీయ సమాచారం మేరకు రామగుండం పోలీస్ కమిషనరేట్ పరిధిలోని నార్కోటిక్ టీమ్‌/టాస్క్‌ఫోర్స్ ఏసీపీ శ్రీనివాస్ నేతృత్వంలో ఎస్‌ఐ లక్ష్మణ్ రావు, మంచిర్యాల టౌన్ పోలీసులు సంయుక్తంగా దాడి నిర్వహించారు. ఈ సందర్భంగా డబ్బులు పందెంగా పెట్టి పేకాట ఆడుతున్న నలుగురిని అదుపులోకి తీసుకున్నారు.

పోలీసులు వారి నుంచి రూ.40,300 నగదు, మూడు సెల్‌ఫోన్లు, ఒక స్కూటీని స్వాధీనం చేసుకున్నారు. అదుపులోకి తీసుకున్న వారిలో మంచిర్యాల కాలేజ్ రోడ్డుకు చెందిన కత్రె గణేష్ (34), రాంనగర్‌కు చెందిన ఆరె రాజేష్ (42), జమ్మికుంటకు చెందిన మహమ్మద్ అన్వర్ పాషా (29), ఎన్టీఆర్ నగర్‌కు చెందిన పోలక మల్లేష్ (38) ఉన్నారు.

అనంతరం నలుగురు వ్యక్తులతో పాటు స్వాధీనం చేసుకున్న నగదు, సెల్‌ఫోన్లు, స్కూటీని తదుపరి చట్టపరమైన చర్యల నిమిత్తం మంచిర్యాల టౌన్ పోలీస్ స్టేషన్‌కు అప్పగించినట్లు పోలీసులు తెలిపారు. పట్టణంలో అక్రమ కార్యకలాపాలపై నిఘా కొనసాగుతుందని పోలీసులు స్పష్టం చేశారు.