Mancherial: ఓటరు సవరణకు 21 వరకు అవకాశం కలెక్టర్ కుమార్ దీపక్

మంచిర్యాల: ఓటరు జాబితా ప్రత్యేక సమగ్ర సవరణ (ఎస్‌ఐఆర్‌–2026) ప్రక్రియలో ముసాయిదా ఓటరు జాబితాలో పేర్లు చోటు పొందని అర్హులైన ఓటర్లకు ఎన్నికల సంఘం మరో అవకాశం కల్పించింది. గైర్హాజరు, నివాసం మార్పు, మరణం, డూప్లికేట్ తదితర కారణాలతో ఏఎస్‌డీడీ కేటగిరీలో గుర్తించబడినప్పటికీ, వాస్తవంగా అర్హులైన వారు తుది ఓటరు జాబితాలో తమ పేర్లను నమోదు చేసుకునేందుకు అవకాశం కల్పించాలని నిర్ణయించింది. ఈ ప్రక్రియను ఈ నెల 21వ తేదీలోగా పూర్తి చేయాలని రాష్ట్ర ముఖ్య ఎన్నికల అధికారి సుదర్శన్ రెడ్డి అధికారులను ఆదేశించారు.

శనివారం హైదరాబాద్ నుంచి జిల్లా కలెక్టర్లు, జిల్లా ఎన్నికల అధికారులు, ఇతర ఉన్నతాధికారులతో వీడియో కాన్ఫరెన్స్ నిర్వహించిన ఆయన ఎస్‌ఐఆర్‌ ప్రక్రియపై సమీక్షించారు. ముసాయిదా జాబితాలో పేర్లు లేని అర్హులైన ఓటర్లకు మరో అవకాశం కల్పించాలని సూచించారు. ఇందుకోసం పోలింగ్ కేంద్రాలు, గ్రామపంచాయతీ, మున్సిపల్ కార్యాలయాల్లో సంబంధిత జాబితాలను ప్రదర్శించడంతో పాటు ఎన్నికల సంఘం వెబ్‌సైట్‌లో అందుబాటులో ఉంచాలని ఆదేశించారు.

బూత్ స్థాయి అధికారులు (బీఎల్ఓలు) ఇంటింటికీ వెళ్లి ఏఎస్‌డీడీ జాబితాలో ఉన్న ఓటర్లను సంప్రదించాలని సూచించారు. అర్హులకు ఎన్యుమరేషన్ ఫారాలు అందించి, వాటిని ఎలా సమర్పించాలో వివరించాలని తెలిపారు. ఇప్పటికే అదే చిరునామాలో నివసిస్తున్నప్పటికీ ఫారం సమర్పించలేకపోయిన వారు సంబంధిత ప్రకటనతో పాటు ఎన్యుమరేషన్ ఫారం అందజేయవచ్చని స్పష్టం చేశారు. రాష్ట్రంలోనే మరో ప్రాంతానికి నివాసం మారిన వారు పాత, కొత్త చిరునామాలు, అసెంబ్లీ నియోజకవర్గ వివరాలతో పాటు నివాస ధ్రువీకరణ పత్రాన్ని సమర్పించాల్సి ఉంటుందని తెలిపారు.

మూడు రకాల అనుబంధ పత్రాలతో అవకాశం

ఓటర్లు తమ పరిస్థితిని బట్టి అనుబంధం-ఎ, అనుబంధం-బి, అనుబంధం-సి ద్వారా దరఖాస్తు చేసుకోవచ్చని ఎన్నికల అధికారులు తెలిపారు. అనుబంధం-ఎ ద్వారా పేరు, ఓటరు గుర్తింపు సంఖ్య, చిరునామా, కుటుంబ సభ్యుల వివరాలతో ఎన్యుమరేషన్ ఫారం సమర్పించాలి. అనుబంధం-బి ద్వారా గతంలో ఫారం సమర్పించలేకపోయినా ప్రస్తుతం అదే చిరునామాలో నివసిస్తున్న వారు ఫారం సమర్పించలేకపోయిన కారణాన్ని వివరిస్తూ ప్రకటన పత్రం అందించాలి. అనుబంధం-సి ద్వారా రాష్ట్రంలోనే మరో ప్రాంతానికి నివాసం మారిన వారు పాత, కొత్త చిరునామాలు, నియోజకవర్గ వివరాలు, నివాస ధ్రువీకరణ పత్రంతో దరఖాస్తు చేయాలి.

ఈ పత్రాలను సంబంధిత ఈఆర్‌ఓ, ఏఈఆర్‌ఓ, బీఎల్ఓలకు అందజేయవచ్చని, ఈసీఐ నెట్ యాప్ ద్వారా ఆన్‌లైన్‌లోనూ దరఖాస్తు చేసుకునే అవకాశం ఉందని తెలిపారు. ఎస్‌ఐఆర్‌ ప్రక్రియలో కొత్త ఓటరు నమోదుకు ఇప్పటికే ఫారం-6 సమర్పించిన వారు మళ్లీ ఎన్యుమరేషన్ ఫారం సమర్పించాల్సిన అవసరం లేదని స్పష్టం చేశారు.

జిల్లాలో 1.15 లక్షల మంది గుర్తింపు

మంచిర్యాల జిల్లాలో ఎస్‌ఐఆర్‌ ప్రక్రియలో భాగంగా 1.15 లక్షల మంది ఏఎస్‌డీడీ ఓటర్లను గుర్తించినట్లు జిల్లా ఎన్నికల అధికారి, కలెక్టర్ కుమార్ దీపక్ తెలిపారు. సంబంధిత జాబితాలను ఇప్పటికే బూత్ స్థాయి అధికారులకు అందజేసినట్లు వెల్లడించారు. ముసాయిదా ఓటరు జాబితాలో పేర్లు లేని అర్హులైన ఓటర్లకు మరో అవకాశం కల్పించే అంశంపై జిల్లాలోని అన్ని రాజకీయ పార్టీల ప్రతినిధులతో సమావేశం నిర్వహించి, దరఖాస్తుల సమర్పణ విధానంపై అవగాహన కల్పిస్తామని చెప్పారు.

బీఎల్ఓలు ఇంటింటికీ వెళ్లి ఏఎస్‌డీడీ జాబితాలో ఉన్న వారిని సంప్రదించి, వారి అర్హతను బట్టి సంబంధిత అనుబంధ పత్రాల సమర్పణపై అవగాహన కల్పిస్తారని తెలిపారు. జిల్లాలో అర్హులైన ప్రతి ఓటరుకు తుది జాబితాలో పేరు నమోదు చేసుకునే అవకాశం కల్పించేందుకు సంబంధిత అధికారుల సమన్వయంతో చర్యలు తీసుకుంటామని కలెక్టర్ పేర్కొన్నారు.