Narsapur: వర్షాకాలంలో ప్రజలు, రైతులు అప్రమత్తంగా ఉండాలి ఎస్‌ఐ రంజిత్ రెడ్డి

నర్సాపూర్: వర్షాకాలం నేపథ్యంలో ప్రజలు, రైతులు, వాహనదారులు అప్రమత్తంగా ఉండాలని నర్సాపూర్ పోలీస్ స్టేషన్ స్టేషన్ హౌస్ ఆఫీసర్ రంజిత్ కుమార్ సూచించారు. భారీ వర్షాల సమయంలో నిర్లక్ష్యంగా వ్యవహరిస్తే ప్రమాదాలు జరిగే అవకాశం ఉందని, ప్రతి ఒక్కరూ ముందస్తు జాగ్రత్తలు పాటించాలని ఆయన కోరారు.

భారీ వర్షాలు కురిసే సమయంలో లోతట్టు ప్రాంతాలు, వాగులు, కాలువలు, చెరువులు, కుంటలు, నీటితో నిండిన కల్వర్టుల వైపు వెళ్లకూడదని సూచించారు. ముఖ్యంగా నీటి ప్రవాహం ఉధృతంగా ఉన్న ప్రాంతాల్లో వాగులు, కాలువలు దాటే ప్రయత్నం చేయడం ప్రమాదకరమని హెచ్చరించారు.

రైతులు మరింత అప్రమత్తంగా ఉండాలి

వర్షాకాలంలో రైతులు విద్యుత్ విషయంలో ప్రత్యేక జాగ్రత్తలు తీసుకోవాలని ఎస్‌హెచ్‌ఓ సూచించారు. పొలాల్లోని విద్యుత్ మోటార్లు, ట్రాన్స్‌ఫార్మర్లు, విద్యుత్ తీగల విషయంలో అప్రమత్తంగా ఉండాలని తెలిపారు.

తెగిపడిన విద్యుత్ తీగలను ఎట్టి పరిస్థితుల్లోనూ తాకకూడదని, వాటికి దూరంగా ఉండి వెంటనే సంబంధిత అధికారులకు సమాచారం అందించాలని సూచించారు. వర్షపు నీటితో నిండిన వాగులు, కాలువలు, కుంటలు దాటేందుకు ప్రయత్నించవద్దని, భారీ వర్షాల సమయంలో అత్యవసరమైతే తప్ప పొలాలకు వెళ్లకపోవడం మంచిదని తెలిపారు. పంటలు, వ్యవసాయ పరికరాలు, ఎరువులను వీలైనంత వరకు సురక్షితమైన ప్రదేశాల్లో భద్రపరచుకోవాలని రైతులకు సూచించారు.

వాహనదారులు వేగం తగ్గించాలి

వర్షాల సమయంలో రోడ్లపై నీరు నిలిచే అవకాశం ఉన్నందున వాహనదారులు అప్రమత్తంగా ప్రయాణించాలని పోలీసులు సూచించారు. వాహనాల వేగాన్ని తగ్గించి, రహదారి పరిస్థితులను గమనిస్తూ ప్రయాణించాలని కోరారు.

నీటితో నిండిన రోడ్లు, కల్వర్టుల వద్ద మరింత జాగ్రత్తగా ఉండాలని తెలిపారు. నీటి ప్రవాహం ఎక్కువగా ఉన్న ప్రాంతాల్లో వాహనాలతో దూసుకెళ్లే ప్రయత్నం చేయవద్దని సూచించారు.

పిల్లల విషయంలో తల్లిదండ్రులు జాగ్రత్త

వర్షాకాలంలో చిన్నారులను చెరువులు, కుంటలు, వాగులు, కాలువలు, నీటితో నిండిన ప్రాంతాల వద్దకు ఒంటరిగా వెళ్లనివ్వకూడదని తల్లిదండ్రులకు ఎస్‌హెచ్‌ఓ రంజిత్ కుమార్ సూచించారు.

వర్షాకాలంలో అప్రమత్తతే ప్రాణ రక్షణకు మొదటి అడుగు అని ఆయన పేర్కొన్నారు. ప్రజలు పోలీసుల సూచనలు పాటిస్తూ జాగ్రత్తలు తీసుకోవాలని కోరారు.

అత్యవసర పరిస్థితుల్లో వెంటనే డయల్ 112కు సమాచారం అందించాలని నర్సాపూర్ పోలీసులు సూచించారు. “జాగ్రత్తగా ఉంటే ప్రమాదాలను నివారించవచ్చు.. వర్షాకాలంలో ప్రతి ఒక్కరూ అప్రమత్తంగా ఉండాలి” అని ఎస్‌హెచ్‌ఓ రంజిత్ కుమార్ తెలిపారు.