‘రంభ ఊర్వశి మేనక’ మూవీ రివ్యూ.. బాక్సాఫీస్ వద్ద అల్లరి నరేష్ మార్క్ హంగామా

Rambha Urvashi Menaka Movie Review : అల్లరి నరేష్ కథానాయకుడిగా, సురభి కథానాయికగా తెరకెక్కిన తాజా ఫన్ అండ్ సోషియో-ఫాంటసీ ఎంటర్‌టైనర్ *‘రంభ ఊర్వశి మేనక’*. రాశీ సింగ్, త్రిష సింగ్, విష్ణుప్రియ భీమినేని దేవకన్యలుగా అలరించిన ఈ చిత్రం ప్రమోషన్ల నుంచే మంచి క్రేజ్ సొంతం చేసుకుంది. దేవతలు భూమికి దిగిరావడం, అల్లరి నరేష్ తనదైన శైలి నవ్వుల మ్యాజిక్ ఇస్తానని చెప్పడంతో సినిమాపై ప్రేక్షకాలలో భారీ అంచనాలు ఏర్పడ్డాయి. మరి ఈ చిత్రం ప్రేక్షకులను ఏ స్థాయిలో ఆకట్టుకుందో ఇప్పుడు చూద్దాం.

కథ

రాజమండ్రిలో ఉండే సూరిబాబు (అల్లరి నరేష్) తండ్రి నాటక రంగంలో పేరు పొందిన వ్యక్తి. తండ్రి ఆశయాలకు తగ్గట్టుగా తాను ఎలాగైనా పెద్ద హీరో కావాలని కలలు కంటుంటాడు సూరిబాబు. వీరి కుటుంబంలో ఒక రహస్యమైన మ్యాజిక్ బుక్ ఉంటుంది. ఆ పుస్తకంపై సరైన ప్యాటర్న్ గీస్తే రంభ, ఊర్వశి, మేనకలు ప్రత్యక్షమై కోరిన వరాలు ఇస్తారని బాబాయ్ (సీనియర్ నరేష్) చెప్పిన మాటలను సూరిబాబు బలంగా నమ్ముతాడు. అదే సమయంలో తాను చిన్నప్పటి నుంచి ఇష్టపడే చిన్ని (సురభి) ఊరిలోకి అడుగుపెట్టడంతో వారి ప్రేమ చిగురిస్తుంది. అయితే, అప్పుల కారణంతో స్థానిక ఎస్సై వీరి పెళ్లికి అడ్డుపడతాడు. మరోవైపు తీవ్ర అనారోగ్యంతో బాధపడుతున్న తల్లికి ఆపరేషన్ చేయించడానికి సూరిబాబుకు అత్యంత అత్యవసరంగా డబ్బు అవసరమవుతుంది. సరిగ్గా ఈ క్లిష్ట సమయంలో ఒక రాత్రి అనుకోకుండా ఆ మ్యాజిక్ బుక్ ప్యాటర్న్ కలిసి, స్వర్గం నుంచి రంభ, ఊర్వశి, మేనకలు భూమికి దిగివస్తారు. ఆ తర్వాత సూరిబాబు జీవితంలో ఎలాంటి వినోదాత్మక మలుపులు తిరిగాయి? తల్లి ఆరోగ్యాన్ని, తన ప్రేమను కాపాడుకోవడానికి ఈ దేవతలు ఎలా ఉపయోగపడ్డారు అనేది తెరపై చూడాల్సిందే.

విశ్లేషణ

ఈ రోజుల్లో సీరియస్ థ్రిల్లర్లు, డార్క్ కాన్సెప్టుల మధ్య ఒక హాయిగా నవ్వుకునే సరదా సినిమా రావడం ప్రేక్షకులకు పెద్ద ఉపశమనం. నో లాజిక్.. ఓన్లీ మ్యాజిక్ అనే ముందస్తు హామీకి తగ్గట్టే, ఈ సినిమాను పూర్తిస్థాయి ఎంటర్‌టైన్‌మెంట్ మైండ్‌సెట్‌తో రూపొందించారు. ఎస్వీ కృష్ణారెడ్డి, ఇవివి సత్యనారాయణల క్లాసిక్ కామెడీ చిత్రాల శైలిని గుర్తుచేసేలా దర్శకుడు కథనాన్ని వినోదాత్మకంగా నడిపించారు. ముఖ్యంగా రంభ, ఊర్వశి, మేనకలు భూమిపైకి వచ్చిన తర్వాత వచ్చే సన్నివేశాలు, వారి అమాయకత్వంతో సూరిబాబు పడే పాట్లు థియేటర్లలో నవ్వుల పూవులు పూయిస్తాయి. ద్వితీయార్థంలో వచ్చే మదర్ సెంటిమెంట్ కథకు మంచి భావోద్వేగ బలాన్ని ఇచ్చి, ప్రేక్షకుడి మనసును హత్తుకుంటుంది.

నటీనటుల ప్రతిభ

కామెడీ టైమింగ్‌లో తనకెవరూ సాటిలేరని నరేష్ మరోసారి నిరూపించారు. అమాయకత్వం, కామెడీ, క్లైమాక్స్‌లో సెంటిమెంట్.. ఇలా అన్ని వేరియేషన్స్‌ను చాలా సునాయాసంగా పండించారు. కథానాయికగా తన పాత్ర పరిధి మేర అందంగా కనిపిస్తూ చక్కటి అభినయాన్ని ప్రదర్శించింది. ఈ ముగ్గురు భామలు తమ గ్లామర్‌తో స్క్రీన్‌ను రీఫ్రెషింగ్‌గా మార్చేశారు. ముఖ్యంగా డ్యాన్స్ సీక్వెన్సుల్లో వీరి ఎనర్జీ ప్రేక్షకులను బాగా ఆకట్టుకుంటుంది.సీనియర్ నరేష్, శ్రీనివాసరెడ్డి, వెన్నెల కిశోర్, హరితేజల కామెడీ ట్రాక్స్ సినిమాకు ప్రధాన బలంగా నిలిచాయి. సిచువేషనల్ కామెడీతో వీరి మధ్య వచ్చే డైలాగులు బాగా పేలాయి.

సాంకేతిక విభాగం

చైతన్ భరద్వాజ్ అందించిన పాటలు వినసొంపుగా ఉన్నాయి. బ్యాక్‌గ్రౌండ్ స్కోర్ సన్నివేశాలలోని కామెడీని, డ్రామాను బాగా ఎలివేట్ చేసింది. విజువల్స్ చాలా ప్లెజెంట్‌గా, కలర్‌ఫుల్‌గా ఉన్నాయి. నిర్మాణ విలువలు రిచ్‌గా ఉండి సోషియో-ఫాంటసీ మూడ్‌ను బాగా క్యారీ చేశాయి.

చివరగా....

‘రంభ ఊర్వశి మేనక’ ఎలాంటి లాజిక్కుల భారం లేకుండా కుటుంబసమేతంగా థియేటర్‌కు వెళ్లి హాయిగా నవ్వుకోవడానికి ఒక చక్కటి ఛాయిస్. అల్లరి నరేష్ మార్క్ కామెడీ, దేవకన్యల హంగామా, చివర్లో మంచి సెంటిమెంట్‌ కలగలసిన ఈ చిత్రం ప్రేక్షకులకు ఒక మంచి వినోదాత్మక అనుభూతిని అందిస్తుంది.

Rating: 3/5