Aamani: ఆమని చెప్పిన అలనాటి ముచ్చట్లు...అందుకే చిరంజీవితో సినిమా చేయలేదు

Aamani: తెలుగు సినీ పరిశ్రమలో తన సహజ నటనతో గుర్తింపు పొందిన నటి ఆమని తాజాగా తన కెరీర్‌లోని ఓ ఆసక్తికర విషయాన్ని వెల్లడించారు. చిన్నప్పటి నుంచి మెగాస్టార్ చిరంజీవిపై ఉన్న అపారమైన అభిమానమే, ఆయనతో సినిమా చేసే అవకాశాన్ని కూడా వదులుకునేలా చేసిందని ఆమె చెప్పడం సినీ వర్గాల్లో చర్చనీయాంశమైంది.

చేజారిన మెగా అవకాశం

తన కెరీర్‌ పీక్‌లో ఉన్న సమయంలో “రిక్షావోడు” సినిమాలో నటించే అవకాశం వచ్చింది. ఆ సినిమాకు ఆమె డేట్స్ కూడా ఇచ్చారు. షూటింగ్ ప్రారంభానికి సుమారు 15 రోజుల ముందు చిరంజీవితో మాట్లాడిన అనుభవం తనకు ఎంతో ఆనందాన్ని ఇచ్చిందని ఆమె గుర్తుచేసుకున్నారు. అయితే అనూహ్యంగా దర్శకుడు మారడం వల్ల, ఆ ప్రాజెక్ట్ నుంచి ఆమెను తప్పించి మరో హీరోయిన్‌ను తీసుకోవడంతో ఆ అవకాశం కోల్పోయారు. ఈ సంఘటన తన జీవితంలో రెండుసార్లు మాత్రమే కన్నీళ్లు పెట్టుకున్న సందర్భాల్లో ఒకటిగా ఆమె పేర్కొన్నారు.

స్టాలిన్‌ వదులుకోవడానికి కారణం

ఇక మరో ముఖ్యమైన విషయం “స్టాలిన్” సినిమా. ఈ చిత్రంలో చిరంజీవి సోదరి పాత్ర కోసం ఆమనిని సంప్రదించారు. అయితే ఆ పాత్రను ఆమె నేరుగా తిరస్కరించారు. చిన్నప్పటి నుంచి తనకు డ్రీమ్ హీరోగా ఉన్న చిరంజీవిని తెరపై “తమ్ముడు” అని పిలవడం తనకు సాధ్యం కాదని ఆమె స్పష్టం చేశారు. అభిమానానికి విరుద్ధంగా అలాంటి పాత్ర చేయలేనని భావించి, ఆ అవకాశాన్ని వదులుకున్నారని తెలిపారు.

ఒక నటిగా అవకాశాలు రావడం ఒక విషయం, కానీ మనసుకు నచ్చిన పాత్రలు చేయడం మరో విషయం. కెరీర్‌లో ఎన్నో విజయాలు సాధించినప్పటికీ, చిరంజీవితో స్క్రీన్ పంచుకోలేకపోయాననే చిన్న అసంతృప్తి మాత్రం ఇంకా మిగిలే ఉందని ఆమె చెప్పడం గమనార్హం. అంతేకాదు, శ్రీదేవి చేసిన మీనుం కోకిల పాత్ర, బాహుబలిలో రమ్యకృష్ణ పోషించిన శివగామి పాత్రలంటే తనకు చాలా ఇష్టమని, అలాంటి పాత్రల్లో నటించాలని ఉందని మనసులోని మాటను బయటపెట్టారు ఆమని. మరి ఇలాంటి పాత్రలు ఆమనికి దక్కుతాయా చూడాలి.