Aamir Khan: మూడో పెళ్లిపై అమీర్ ఖాన్ ఓపెన్ కామెంట్స్!

Aamir Khan: బాలీవుడ్ మిస్టర్ పర్ఫెక్ట్, సూపర్ స్టార్ అమీర్ ఖాన్ తన వ్యక్తిగత జీవితానికి సంబంధించి సంచలన నిర్ణయం తీసుకున్నారు. 61 ఏళ్ల అమీర్ ఖాన్ మూడోసారి పెళ్లి పీటలు ఎక్కబోతున్నారు. గత కొంతకాలంగా ఆయన డేటింగ్‌లో ఉన్న తన గర్ల్‌ఫ్రెండ్ గౌరీ స్ప్రాట్ ను జూలై 5న ముంబైలో వివాహం చేసుకోబోతున్నట్లు అధికారికంగా ప్రకటించారు. ఈ విషయాన్ని స్వయంగా అమీర్ ఖాన్ ఒక ఇంటర్వ్యూలో ధృవీకరించడంతో బాలీవుడ్‌తో పాటు దేశవ్యాప్తంగా ఈ వార్త హాట్ టాపిక్‌గా మారింది.

జూలై 5న ముంబైలో రిజిస్టర్ మ్యారేజ్!

ప్రస్తుతం అమెరికా పర్యటనలో ఉన్న అమీర్ ఖాన్ తన పెళ్లి వార్తలపై వస్తున్న వార్తలను నిజమేనని తేల్చేశారు."నేను ప్రస్తుతం యూఎస్‌లో ఉన్నాను. మా పెళ్లి గురించి వస్తున్న వార్తలు నిజమే. జూలై 5న మా వివాహం జరగనుంది. మా బంధాన్ని తదుపరి స్థాయికి తీసుకెళ్లడానికి ఇద్దరం సిద్ధంగా ఉన్నామని భావిస్తున్నాం. గౌరీ, నేను ఒకరినొకరు చాలా సీరియస్‌గా ప్రేమిస్తున్నాం, కమిట్ అయ్యాము. మేము ఇద్దరం ఇప్పటికే సహజీవనం చేస్తున్నాం. నా మనసులో నేను ఇప్పటికే ఆమెను పెళ్లాడాను. ఇక చట్టబద్ధంగా ఒక్కటవ్వడం అనేది మా బంధంలో ఒక సహజమైన ప్రక్రియ మాత్రమే" అని అమీర్ ఖాన్ వెల్లడించారు.

ఈ వివాహం ముంబైలోని అమీర్ ఖాన్ నివాసంలో అత్యంత సన్నిహితులు, కుటుంబ సభ్యుల సమక్షంలో చాలా ప్రైవేట్‌గా, రిజిస్టర్డ్ మ్యారేజ్ పద్ధతిలో జరగనున్నట్లు తెలుస్తోంది.

ఇంతకీ ఎవరీ గౌరీ స్ప్రాట్?

బెంగళూరుకు చెందిన గౌరీ స్ప్రాట్ ఫ్యాషన్ , బ్యూటీ ఇండస్ట్రీలో గుర్తింపు తెచ్చుకున్నారు. ముంబైలోని ఒక ప్రముఖ సెలూన్ బాధ్యతలు చూసుకుంటున్న ఆమె, ప్రస్తుతం అమీర్ ఖాన్ ప్రొడక్షన్ హౌస్ లో కూడా భాగస్వామిగా వర్క్ చేస్తున్నారు. గౌరీకి గతంలోనే వివాహం జరిగి ఒక కుమారుడు (క్విన్) కూడా ఉన్నాడు.

గత ఏడాది (2025 మార్చిలో) అమీర్ ఖాన్ తన 60వ పుట్టినరోజు సందర్భంగా గౌరీని మీడియాకు, అభిమానులకు అధికారికంగా పరిచయం చేశారు. తమకు 25 ఏళ్లుగా ఒకరినొకరు తెలుసని, ఏడాదిన్నర క్రితం మళ్లీ కలిసి ప్రేమలో పడ్డామని అమీర్ అప్పట్లో చెప్పారు.

అమీర్ ఖాన్ గత వివాహాలు

అమీర్ ఖాన్‌కు ఇది మూడో వివాహం. ఆయన గతంలో ఇద్దరిని వివాహం చేసుకుని విడాకులు తీసుకున్నారు: 1986లో అమీర్ మొదట రీనా దత్తాను వివాహం చేసుకున్నారు. వీరికి ఇరా ఖాన్, జునైద్ ఖాన్ అనే ఇద్దరు పిల్లలు ఉన్నారు. 2002లో వీరు విడాకులు తీసుకున్నారు. ఆ తర్వాత 2005లో ప్రముఖ ఫిల్మ్ మేకర్ కిరణ్ రావును పెళ్లాడారు. వీరికి సరోగసీ ద్వారా ఆజాద్ అనే కుమారుడు జన్మించాడు. 16 ఏళ్ల దాంపత్య జీవితం తర్వాత 2021లో వీరు విడిపోతున్నట్లు ప్రకటించారు.

విడాకులు తీసుకున్నప్పటికీ అమీర్ ఖాన్ తన ఇద్దరు మాజీ భార్యలతో ఎంతో స్నేహపూర్వకంగా ఉంటారు. ఫ్యామిలీ ఈవెంట్స్‌లో వీరంతా కలిసి కనిపిస్తూ ఉంటారు. ఇప్పుడు అమీర్ ఖాన్ తన జీవితంలో మూడో ఇన్నింగ్స్ ప్రారంభించబోతుండటంతో బాలీవుడ్ ప్రముఖులు, అభిమానులు ఆయనకు శుభాకాంక్షలు తెలుపుతున్నారు.