ANR: అక్కినేని పాత్రల్లో ఒదిగిపోవడానికి కారణం ఇదే...అలాంటి పాత్రలు ఎప్పుడూ కష్టమే
అక్కినేని నాగేశ్వరరావు పాత్రల్లో అంత సహజంగా ఎలా ఒదిగిపోయారు? పాత్ర పరిధి దాటకుండా నటించడం, సహజ నటనతో ప్రేక్షకులను ఆకట్టుకోవడమే ఆయన విజయ రహస్యం.
ANR: తెలుగు చలనచిత్ర సీమలో ఎందరో దిగ్గజ నటులు ఉన్నప్పటికీ, సగటు ప్రేక్షకుడి గుండెల్లో నాటుకుపోయిన నటుడు అక్కినేని నాగేశ్వరరావు. ఏ పాత్రనైనా తనలోని సహజ నటనతో, కళ్లలోని నిర్మలత్వంతో పండించి, ప్రేక్షకులు ఆ పాత్రలో తమను తాము చూసుకునేలా చేయడం అక్కినేనికి ఉన్న అసాధారణమైన నైపుణ్యం. పాత్ర పరిధి దాటకుండా, అతి చేయకుండా నటించడమే ఆయనను ఎవర్ గ్రీన్ నటుడిగా నిలబెట్టింది.
పాత్ర పరిధిలోనే అద్భుతమైన నటన
సినిమా రంగంలో కొందరు నటులు పాత్ర పరిధి దాటి నటించి కొన్నిసార్లు అద్భుతాలు చేస్తే, మరికొన్నిసార్లు విమర్శల పాలవుతారు. కానీ అక్కినేని ఎప్పుడూ పాత్ర గీసిన గీత దాటకుండా నిలబడేవారు. దేవుడైనా, వికటకవియైనా, వాగ్గేయకారుడైనా తన ఆహార్యాన్ని పాత్రకు తగ్గట్లుగా మార్చుకునేవారు. అంతేకాదు, ప్రేమికుడిగా, భగ్నప్రేమికుడిగా ఆయన పలికించిన హుందాతనం ప్రేక్షకులను ఎంతగానో ఆకట్టుకుంది. ఈ పాత్రలే నాగేశ్వర రావుకు అత్యంత పేరు తెచ్చిపెట్టాయి. అక్కినేని అంటే ప్రేమికుడు, లేదా భగ్నప్రేమికుడిగా ప్రేక్షకులు గుర్తుంచుకున్నారు.
చాణక్యుడి ప్రయోగం .. అరుదైన మినహాయింపు
సాధారణంగా నటులతో అతి చేయించాలని చూసే ఇండస్ట్రీ ధోరణికి అక్కినేని కూడా ఒకానొక సందర్భంలో గురయ్యారు. అక్కినేని కెరీర్లో పాత్ర పరిధిని దాటించి చేయించిన అరుదైన పాత్ర 'చాణక్యుడు'. ఇలాంటి బరువైన, తనకు సూటుకాని పాత్రలో నటించినా ఆయన క్రేజ్ ఏమాత్రం తగ్గలేదు. కొన్ని పరాజయాలు ఎదురైనప్పటికీ, ఆయన కెరీర్ గ్రాఫ్ ఎప్పుడూ కిందకు దిగజారలేదు.
విజయానికి కారణం ... సొంత ప్రతిభ మాత్రమే
అక్కినేని ఉన్నతికి ఆయన అభిమానులో, నిర్మాతో, పిఆర్ టీమ్లో కారణం కాదు. కేవలం ఆయనలోని అసాధారణ నటనా నైపుణ్యమే కారణం. గొప్ప నటన కనబరచడానికి ఆయన ప్రత్యేకంగా గొప్ప పాత్రల కోసం వేచి చూడలేదు. లభించిన సాధారణ పాత్రల్లోనే వైవిధ్యాన్ని చూపిస్తూ వాటిని అమరమైన పాత్రలుగా మలిచారు. సాధారణ మనిషికి ఉండే భావోద్వేగాలను తెరపై ఆయన పండించడంతో ప్రతీ ఒక్కరూ ఆ పాత్రల్లో అక్కినేనిని కాకుండా తమని తాము చూసుకున్నారు. ఎలాంటి ఆర్టిఫిషియల్ డ్రామా లేకుండా నటనను జీవితంలో ఒక భాగంగా మార్చి, పాత్రల్లో ఒదిగిపోవడమే అక్కినేని నాగేశ్వరరావు సాధించిన అసలైన విజయం.
Balachander
బాలచందర్ పెళ్లూరి తెలుగు మీడియా రంగంలో 12 ఏళ్లకు పైగా అనుభవం కలిగిన సీనియర్ న్యూస్, పొలిటికల్, భక్తి కంటెంట్ రైటర్, ఎడిటర్. హైదరాబాద్ కేంద్రంగా టీవీ, డిజిటల్ జర్నలిజంలో పనిచేశారు. పొలిటికల్ విశ్లేషణ, ఆధ్యాత్మిక రచనల్లో నైపుణ్యం కలిగి, పొలిటికోస్, ఎన్టీవీ డిజిటల్, మల్లెమాల ఎంటర్టైన్మెంట్లో సేవలందించారు. ఎడిటోరియల్ లీడర్షిప్, కథనం చెప్పే శైలిలో ప్రత్యేక గుర్తింపు పొందారు.